شكرا ورشة نايل موتورز.. شكرا كريم منير :)
السلام عليكم ورحمة الله وبركاته..
أحب اتوجه بخالص الشكر والتحية للأستاذ كريم منير ولجميع العاملين بورشة نايل موتورز..
بصراحة الناس هناك بيشتغلوا بضمير وبدقة وكفاءة عالية بالإضافة للسرعة والإنجاز كمان..
كانت حصلتلي حادثة بسيطة الأسبوع اللي فات ووديت العربية عندهم والحمد لله استلمتها ومبسوط جدا من الشغل اللي تم فيها بحرفية عالية وفي وقت قليل جدا..
بعض النقاط اللي لفتت نظري:
1- أول ما رحت بالعربية ويدوب ركنتها ونزلت منها لقيت 3 أفراد استلموها وفكوها وابتدوا الشغل فيها فورا قدام عيني..
مش زي أماكن تانية يقولك سيب المفتاح وهانشتغل فيها من بكرة..
2- علبة بلاستيك صغيرة كدة ماسكها واحد كل شغلته انه يلم المسامير والكلبسات اللي بتتفك أول بأول في العلبة دي عشان مفيش حاجة تضيع :)
3- العربية تقريبا ماتفتحتش من جوة غير عشان ينقلوها من مكانها.. لأني كنت غاسل العربية في المحطة ومعطرها وحاجتي كلها في التابلوه والأبواب ماتلمستش..
والمنطقة عند الورشة لو سبت شباك العربية مفتوح 10 دقايق هتلاقيها لمت تراب الشارع كله جوة.. فدي الحقيقة ناس عارفة مفهوم الأمانة وبتشتغل بيه..
مش زي صنايعية تانيين يناموا في العربيات ويشغلوا التكييف ولو سايب فيها فلاشة حتى بترجع ماتلاقيهاش..
4- مفيش عميل بيستلم عربيته من هناك إلا مغسولة غسلة محترمة وطالعة بتبرق من كتر النضافة..
5- أنا ماروحتش هناك غير مرتين.. مرة وانا بسيب العربية ومرة وانا باستلمها..
لما سلمت العربية شرحتلهم كل طلباتي ولما لقيتهم بدأوا الشغل فورا فضلت واقف معاهم حوالي ساعة باتفرج على شغلهم..
وطول منا واقف عمال يجيلي الشاي والقهوة والله حتى بدون ماطلبها فجأة الاقي حد بينزللي مشروب وضيافة..
بصراحة حاجة قمة في الذوق لأن فيه صنايعية كتير تحس انهم بيطفشوا صاحب العربية من قدامهم عشان يشتغلوا (أو مايشتغلوش) براحتهم..
6- لما رحت استلم العربية لقيت كل طلباتي معمولة بالشكل اللي انا عايزه مانسيوش حاجة ولا نفضوا لحاجة..
ده غير ان محدش طلب مني اكراميات نهائيا بأي شكل من الأشكال سواء صريح او مستتر تحت اي مسميات..
لا شاي ولا صباح الخير ولا كل سنة وانت طيب ولا الكلام ده خالص..
لكني صممت اسيبلهم مبلغ بسيط مع كريم يوزعه عليهم كتشجيع لأني عجبني الشغل والناس تستاهل الحقيقة :)
7- فيه هناك عربية رينو لوجان جواها خلطة سرية اسمها (كيكو) ومش هاوضح اكتر من كدة..
بس لو روحت تعمل حاجة في الورشة ومالقيتش اللوجان دي راكنة يبقا تمشي وتحاول تاخد معاد جديد تيجي فيه عشان تكون اللوجان موجودة وتشوف بنفسك إيه الكيكو ده ^_^
8- الأسعار معقولة ومنطقية وتعتبر صفقة ممتازة لو حسبنا الجودة مقابل القيمة
9- اشتريت كارت عضوية نايل موتورز من عندهم وكريم بيه عمللي خصم فوري محترم جدا بأكتر من سعر الكارت كمان..
ورشة نايل موتورز: سرعة.. كفاءة.. أمانة.. التزام
صورة للعربية وهي بتتلمع التلميع النهائي للفينيش قبل ما استلمها :)
http://nileup.com/up/uploads/nilemotors_14336862681.jpg
وده سيلفي مع الكيكو.. قصدي مع كريم ههههههه
http://nileup.com/up/uploads/nilemotors_14336866001.jpg