الموضوع: توكيل منصور ( فرع الطريق الصحراوي )

توكيل منصور فرع الصحراوي

رحت من كام يوم عشان كان عندي كذا ملاحظه في العربيه كنت عايز اقولهم عليها زي ان المفتاح بيعصلج شويه لما اجي ادخله في الكونتاكت و مراية الصالون كانت سايبه شويه والفرامل كانت واطيه جدا واضاءه المصابيح الاماميه كانت واطيه جدا على الارض وحاجات من هذا القبيل ..
دخلت التوكيل في الحاره بتاعت الاوبل وفضلت واقف شويه ومهندسين الاستقبال بيعدوا من قدامي ولا واحد جه يقولي هتعمل ايه في العربيه او سألني على اي حاجه ، قمت انا دخلت المكتب وكان قاعد الاستاذ مش عارف اذا كان مهندس ولا لأ اسمه احمد شحاته قولتله لو سمحت العربيه عندي فيها كام ملحوظه كده قاللي دقيقه وهاجي لحضرتك وبيتكلم بكل احترام ،، المهم فضلت واقف شويه لغايه ما جه الاستاذ احمد شحاته وقاللي خير العربيه مالها قولتله على الحاجات اللي فيها وكنت كل ما اقوله حاجه يقولي لا عادي هي كده !
يا استاذ المفتاح بيعصلج في الكونتاكت ، اخد المفتاح يجربه وقاللي ايوه ماله بقى المفتاح ( جه في بالي المشهد بتاع فيلم عسل اسود " ماله الكاسيت " ) لقيت ان اي حاجه مش مظبوطه في العربيه هييجي يقولي لأ ده عادي و " هي كده "
رحنا فتحنا عربيه استرا تانيه وجربنا المفتاح لقيناه بيدخل ويطلع من الكونتاكت بسهوله ، لاقيته فتح عربيه اخرى وجرب المفتاح لاقاه برده بيعلق شويه قاللي اهو برده بيعلق ، قولتله يعني عشان عربيه تانيه فيها نفس مشكلتي يبقى المفروض ان انا اسيب المشكله عندي يعني ومحلهاش ؟؟
ومرايا الصالون اللي مش مظبوطه و سخونه من هوايات التكييف وكل حاجه اقوله عليها يقولي لا عادي "هي كده"
قولتله كان في عضو في جروب على الفيس عنده السخونه اللي بتطلع من الفتحات دي وطلع ان سينسور الحراره بايظ ، اول ما سمع سيره الجروب قاللي هو المشكله في الجروبات دي محسساني ان العربيه ١٢٨ ، ماتسمعش ياباشا كلام الناس اللي في الجروب العربيه مفهاش حاجه ، وبعد مناقشات قولتله لو سمحت اكتب ملاحظاتي في امر الشغل والمهندس يتصرف فيها ،، وكتبها

واستلمها بعد كده المهندس عمرو الشيمي وقولتله على الملاحظات اللي فيها ، وقولتله عايز اعمل السوفت الجديد ايه رأيك ؟ قاللي بلاش عشان ممكن يبقى كويس وممكن يعمل مشاكل زي ما حصل مع ناس تانيه وبقى في نتشه في الفتيس اقوى من الاول ، قولتله طب ايه الحل في الرعشه اللي مع التكييف والحاجات دي قاللي مفيش حل لغاية دلوقتي . ! قولتله طيب خلاص مش هعمله ، واخد العربيه ودخل بيها الورشه ..

وبعد كده دخلت اسأل في قسم قطع الغيار على سعر تيل فرامل امامي وشداد عفشه خلفي يمين لأن عربيتي كانت محتاجاهم على حسب ما قاللي المهندس عمرو الشيمي وانا بعمل صيانه ال ٣٥ من اسبوعين ( واتضحلي بعد كده ان التيل لسه فيه ييجي النص ) ، المهم الموظف اللي قاعد قاللي سعر التيل بالضريبه ٧٨٠ جنيه وسعر شداد عفشه خلفي بالضريبه ٣٧٠ جنيه .
قولت خلاص بقى اركبهم بالمره عشان اخلص ، وبلغت المهندس عمرو يركب تيل امامي والشداد الخلفي ،
وبعد شويه لقيت المهندس عمرو بيعدي من عند مكتب مهندسين الاستقبال وقاللي العربيه عايزه شدادين خلفي يمين وشمال ( مع ان الملحوظه اللي كانت مكتوبه في فاتوره الصيانه من اسبوعين انها تحتاج تيل امامي وشداد عفشه خلفي يمين ) وكان ساعتها ركب التيل والشداد اليمين ، ولقيته بيقولي سعر الشداد حوالي ٦٠٠ جنيه او ٥٨٠ حاجه كده ،، قولتله نعم !!! قالولي في قطع الغيار سعره ٣٧٠ بالضريبه ؟؟

دخلنا لقسم قطع الغيار عند نفس الموظف ولقيته بيقول سعر الشداد الواحد ٥٨٤ جنيه ! قولتله انت مش قولتلي انه ب ٣٧٠ جنيه ؟ قاللي معلش السيستم كان مش شغال وقولتلك اخر سعر انا فاكره قبل الزياده ، قولته وانا زنبي ايه انا بلغت المهندس يركبهم على اساس السعر اللي سمعته منك في الاول ، قاللي ياباشا هنعملك خصم ١٠ ٪ ، وبعد حوارات كتير وصل الخصم ل ١٥ ٪ وقولت للمهندس خلاص كمل وركب الشداد التاني .
وبعد ما ركبهم وخلصنا كل حاجه والكونتاكت اتشحم وبقى دخول المفتاح اسهل ومرايا الصالون اتقرط عليها وبقت افضل ( الحاجات اللي كان بيقولي عليها الاستاذ احمد شحاته " هي كده " ) !
المهم بعد ما خلصنا كل حاجه رحت اخدت الفاتوره ولقيتهم عاملين الخصم ال ١٥ على قطع الغيار بس المفاجأه بقى اللي لقيتها انهم كاتبين في الفاتوره سعر التيل الامامي بالضريبه ٩٩٠ جنيه !! وسعر التركيب حوالي ١٨٠ جنيه وسحب هواء من الفرامل ١١٠ جنيه !!!!! يعني اجمالي قيمه التيل بالتركيب حوالي ١٢٨٠ جنيه !!!
عملولي خصم ١٥ ٪ وقصادها زودوا سعر التيل من ٧٨٠ ل ٩٩٠ يعني زياده اكتر من ٢٥ ٪ !!
لما سألت المهندس عمرو قاللي ده تيل ايطالي مختلف التيل ده بتاع الكروز ! قولتله هو بتاع الكروز اغلى من بتاع الاسترا ؟؟ وقولتله لما هو تيل مختلف وتمنه ازيد من بتاع الاسترا مش المفروض تبلغوا صاحب العربيه الاول اذا كان هيوافق على الزياده دي ولا لأ ؟؟
كان طول الوقت رد المهندس عمرو ليا بأسلوب مستفز وكان متضايق اوي من قصه انه اتعملي خصم ١٥ ٪ مش عارف ليه وكأن الخصم ده هو اللي هيدفعه من جيبه ،،
وقاللي على موضوع التيل ان مكانش في غير التيل ده اللي موجود في المخزن

وبعد كل الحوارات دي والزياده اللي على التيل وغير طبعا اسعار التركيب الخرافيه للتيل والشدادات و ضريبه على التركيب وانا طبعا مكنتش عامل حسابي على الاسعار دي ومكنتش عامل حسابي اصلا اني هركب التيل او الشداد في اليوم ده ، الفاتوره طلعت برقم وانا مكانش معايا يكمل الرقم ده عشان لما حسبتها من الاول محسبتش ان التيل بالسعر ده ، وغير كده الملاحظات اللي كنت قايل عليها للاستاذ احمد شحاته من الاول قولتله المفروض الحاجات دي تبع الضمان قاللي معرفش تبع الضمان او لأ قولتله طب عرفني لو سمحت الاول ايه اللي هيبقى تبع الضمان وايه اللي مش تبع الضمان قاللي اوك ، ولما لاقيته مقاليش على اي حاجه قولت يبقى كده الحاجات دي اتعملت داخل الضمان ، واتفاجئ في الاخر ان كل حاجه اتضافت في الفاتوره بفلوس !

وفضلت واقف بتكلم مع المهندس عمرو الشيمي والاستاذ هيثم مدير قسم قطع الغيار في الزياده اللي حصلت في سعر التيل وكان المفروض يبلغوني قبل ما يركبوه ، وقاللي مش هنقدر ننزل حاليا من سعر التيل ، وواقفين بنتلكم والساعه ٤ ونص وميعاد مرواح الموظفين والخزنه قفلت ولقيت المهندس عمرو مشي عشان يلحق الباص بتاع الشغل وراح محصله الاستاذ هيثم !
ولقيت نفسي انا واقف لوحدي في الفرع من غير موظفين ومدفعتش الفاتوره ومعيش طبعا تصريح خروج للسياره ، وطلعت برا مكانش في غير موظفين الامن ، وواحد منهم قالي المشاكل دي بتحصل كتير واتصل بالمهندس مجدي سالم مهندس برده في التوكيل ، وبعد حوار طويل معاه قاللي معلش اطلع اركب اي مواصله من برا وتعالى بكره الصبح وهنحل الموضوع ده !
كان في مهندس من قسم السمكره والدهان واقف متابع الحوار وانا بتكلم في التليفون وراح مشكورا اخدني معاه في عربيته ووصلني في سكته للهرم

وجيت تاني يوم واتكلمت مع المهندس مجدي سالم وشرحتله الموضوع وفي الاخر شال الزياده اللي على سعر التيل ودفعت الفاتوره واخدت تصريح الخروج .

من تجربتي المنيله دي مع توكيل منصور اللي كرهته وكرهني في العربيه ، عايز انصح كل الناس لازم تسألوا على سعر كل حاجه من قسم قطع الغيار قبل ما تركب ، وتراجع الفاتوره كويس جدا قبل ما تدفع ، وتبقى عارف كويس ايه اللي المفروض يتعمل على الضمان وايه اللي المفروض يتعمل على حسابك ، لأن توكيل منصور ده بيتلذذ في شفط الفلوس من جيب الناس بمصنعيات خرافيه واسعار قطع غيار مهوله و غير مناسبه تماما مع الفئه السعريه لهذه السياره ، ليا صديق شغال في توكيل مرسيدس بيقولي احنا معندناش اسعار المصنعيات بالشكل ده !

انا اشتريت عربيتي الاسترا مستعمله ، ولو قدامي اي اختيار تاني غير الاسترا مكنتش جبتها ، ولكن المشكله ان رنج السعر ده مفيش عربيه فيه افضل من الاسترا ، مفيش غير السيراتو وانا مبحبش الكوري و لكن شكلي اخرة ما ازهق من التوكيل ده ولو لقيت مشاكل تاني في العربيه هبيعها واشتري سيراتو مستعمله توب لاين واريح دماغي من قرف منصور .
وبصراحه لو كنت هشتري زيرو مش هفكر خالص في الاسترا واشتريها ب ٢٠٠ الف ، الهوندا سيفيك في وجهة نظري هتبقى افضل ومفهاش مشاكل وخصوووووصا لأن توكيلها محترررم جدا وشتان الفارق بينه وبين منصور ، انا كنت بتعامل معاه في عربيتي القديمه ( سيفيك ٢٠٠٧ ) وكانوا ناس في منتهى الاحترام والشياكه والتفهم و اسعار معقوله جداا بالنسبه لمنصور

وارجو من اي حد بيتعامل مع توكيل منصور انه ميسبش حقه في اي حاجه واللي عنده اي مشكله في العربيه ميسكتش عليها الا لما تتحل ، وتراجع اسعار قطع الغيار في التوكيل بنفسك وتراجع الفاتوره كويس قبل ما تدفع وماتدفعش مليم زياده في اي حاجه .

واسف على الاطاله