انهاردة كنت بعمل صيانة 110 ألف عند عصام وصفا، رجعت لقيت العربية بتسخن ومروحة التبريد بتدور كل شوية وبعدين الحرارة تنزل تاني للطبيعي
حد يدلني ممكن يكون ايه السبب وأمشي بيها كده ولا لأ لحد لما أروح تاني يوم السبت
عرض للطباعة
انهاردة كنت بعمل صيانة 110 ألف عند عصام وصفا، رجعت لقيت العربية بتسخن ومروحة التبريد بتدور كل شوية وبعدين الحرارة تنزل تاني للطبيعي
حد يدلني ممكن يكون ايه السبب وأمشي بيها كده ولا لأ لحد لما أروح تاني يوم السبت
مبدئياً كدة ادام العربية بتسخن مينفعش تمشي بيها الا لو زودتلها ماية دة في حالة ان المية مش مظبوطة لو في حالة المروحة بتاعت الردياتير فيها مشكلة دية كهربائي ممكن يظطهالك بس متمشيش بيها لاي سبب من الاسباب وهي كدة الا لما تحل المشكلة دية
ثانياً : نصيحة مني متروحش لعصام وصفا تاني الناس دية فعلاً صيانتهم بقت اي كلام
ثالثاً : انا عندي تعمل صيانة الزيوت في البنزينة افضل بكتير من اي مكان تاني ( كتغيير زيت موتور - زيت فيتيس اوتوماتيك - تغيير فلتر زيت - فلتر بنزين - فلتر هوا - تنظيف دورة تبريد (الردياتير) ) ويفضل موبيل او توتال
دية نصايح بسيطة الاقدر اساعدك بيها وربنا يكفيك شر الطريق
خلي حد يحل الرادياتير ويغسله كويس وهات جركن ميه خضرا توتال
وياريت تشيل ثرموستات الكوعة ومتركبهاش تاني
ليه يشيل ثرموستات الكوع وميركبهاش تاني ؟؟؟!!!ليه يشيل ثرموستات الكوع وميركبهاش تاني ؟؟؟!!!..دي نصيحه تنصحها للراجل برضه ؟؟؟؟هو يغسل الريداتير ..يشوف لو فيه شغل إتعمل في التاكيهات يراجع عليه ..يشوف لو كان مغير تقسيمه يبقى ممكن تكون التقسيمه مش مظبوطه ..يشوف غطا الريداتير يكون مش مقفول كويس ..لو المياه بتنقص يبص عليها ..كده يعني ..يعني يعمل تشيك ..لكن يشيل ثرموستات الكوع وميركبهاش تاني ...ليييييييييييييييييييييه :_Alshmokh08[1]: :_Alshmokh08[1]: :_Alshmokh08[1]:
هدي أعصابك يا اكسلانس
الإجابة ببساطة لإن ثرموستات الكوعة بتبوظ على طول ولما بتبوظ بتسخن العربية
أنا عن نفسي باظت عندي 5 مرات وغيرتها ضمان ولما باظت اخر مرة شيلتها خالص
هي وظيفتها انها بتسخن العربية الصبح بسرعة يعني دقيقة واحدة بس بتلاقي العربية سخنت
اما من غيرها هتقعد 5 دقايق عشان تسخن العربية
عشان كده بقوله شيلها :original:
ياباشا ..ياباشا ..ثرموستات الكوع وظيفتها إنها تحافظ على درجة حرارة تشغيل المحرك في مستويات محدده حتى مع السرعات العالية في عز السقعه ..وده ميخليش مؤشر الحرارة عندك ينزل مع السرعة على الطرق المفتوحه ..
حضرتك أنا كنت بقول زيك كده ..كنت بقول إن ثرموستات الكوع دي وظيفتها تقليل وقت تسخين المحرك في بداية التشغيل فقط ..لغاية ما قريت تحقيق معمول في مجلة أجنبيه ..وكان بيتكلم عن ثرموستات الكوع وبيقول إن العربية لما بتمشي وهي بارده ..وده على الطرق المفتوحه وخاصة في الشتا ..ده بيخلي الإسطوانات بارده اللي هي الشمايز ..وبناء عليه لما البنزين بيدخل الإسطوانات دي وهي بارده بيحصل تكثيف للبنزين ده على سطح الإسطوانات من جوه ..وما بيتحرقش كله..وده بيؤدي لتآكل سطح الإسطوانه من جوه ..أو بيؤدي لحدوث تآكل في الماده المغطيه لسطح الإسطوانه من الداخل واللي بتحمي الإسطوانه من الصدمات والإحتكاكات والإهتزازات ..وده اللي إحنا بنسميه في اللغه العامية عندنا ..الإسطوانه بتتسلخ من جوه ..
بص ..هتلاقي ناس تقولك تركيب ثرموستات الكوع هيوفر معاك في الوقود ..وده عن تجربة إنه فعلا وجود ثرموستات الكوع بيوفر في إستهلاك الوقود وخصوصا في الشتا..مع إني مكنتش مقتنع ..وناس ممكن تهيألك إنك لو مشيت من غير ثرموستات الكوع العربية ممكن تنفجر بيك..أو إن العربية هتجيب جوان وش سلندر علطول ..أنا مش هوصل معاك للمرحله دي في اهمية ثرموستات الكوع ...لكن أنا بصراحه لما قريت التحقيق ده عن ثرموستات الكوع في المجلة دي رحت بعديها بأسبوع واحد ركبته ..طبعا مش عاوز أقولك بسم الله ماشاء الله ..توفير البنزين والسحب والتجميع ..لكن أنا بتكلم عن نقطه ماديه مهمة قوي ..إن الشمايز هتتسلخ فعلا معاك ...وأظن ده كلام الخواجات بقى اللي عملو العربية مش كلامي
ملحوظة كمان ..ثرموستات الكوع ملوش أي علاقة بإنه يعمل خلل في منظومة التبريد بتاعة العربية ..أو بلغة تانيه ...هو اللي بيخلي العربية تسخن أكتر من اللازم ..ليه بقى ..لإن ثرموستات الكوع ليه درجة حرارة معينة ..لما الكولانت بيوصلها بيكون فاتح فتح كامل ..درجة الحرارة دي قبل درجة حرارة تشغيل المروحة ببتاع 15 درجة مثلا ...هديك مثال ..أنا عندي ثرموستات الكوع بتكون فتحت فتح كامل لما مياه التبريد بتوصل ل 82 درجة مئوية ..عارف حضرتك يعني إيه فتحت فتح كامل ؟؟؟يعني كأنها مش موجوده أصلا ..ما هي فتحت فتح كامل يعني كأنها مش راكبه أساسا ..لإن المياه بتعدي عادي في الدورة التبريديه بتوع أي عائق ..المروحة عندي بتشتغل لما درجة حرارة مياة التبريد بتوصل ل 95 درجة مئوية ..يعني المفروض فيه فرق ما بين فتح ثرموستات الكوع فتح كامل وما بين تشغيل المروحة بتاع كام درجه ؟؟؟بتاع 13 درجة..لإن إبتداء من درجة حرارة 82 بيبقى فعليا مفيش ثرموستات كوع راكبه ..لإنها مفتوحه على الآخر ...المفروض بقى إن ثرموستات الكوع متخليش درجة حرارة المحرك تنزل عن 82 والمروحه متخليش درجة حرارة مياه التبريد توصل لأعلى من 95 ..يبقى ثرموستات الكوع بتضبط من تحت ..والمروحه بتضبط من فوق ..يبقى إيه علاقة ثرموستات الكوع بالحرارة المفرطه للمحرك غير وجود خلل أصلا في دورة التبريد ؟؟؟؟
لو حضرتك شايل ثرموستات الكوع ..نصيحه من أخ ..روح ركبها تاني ..ونضف دورة التبريد كويس ..وهات ثرموستات أصلي ..وحط كولانت يكون براند نضيف ...وحافظ على المحرك بتاعك عمر طويل ..على الأقل لما تيجي تعمر المكنه بتاعتك بدل ما تدخل منك في عمره كامله ..يبقى ترسى على طقم شنبر بس
إقرا الموضوع ده ..هيعجبك قوي
http://www.nilemotors.net/Nile/328708-a.html
وإقرا الموضوع ده من ويكبيديا ..وتقريبا التحقيق اللي أنا قريته كان منقول من الموقع ده أو العكس ..بس ده اللي أنا إكتشفته بعد كده ..وهتلاقي الكلام بتاع تسليخ الشمايز في الموضوع ده برضه
https://en.wikipedia.org/wiki/Wax_thermostatic_element