-
اعادة بيع
السلام عليكم ،
بعد تفكير وعمل مواضيع هنا في المنتدي والرد من الأعضاء الكرام قررت ان شاء علي مازدا على هاتشباك ( هاي لاين ) بس كل شويه يحصل حاجه ارجع أفكر وآخر حاجه صحابي قالولي ان المازدا لما نيجي تبيعها هتخسر فيها جامد علشان سوقها هنا مش قوي وكمان أنا هجيبها اقساط ٤ سنين تقريبا فسعرها هيزيد عن ٢١٣ فكل ده بيخوفوني منه انك هتخسر جامد وهتخسر فلوس الزيادة بتاعة الفايده كمان فا رايكم في الكلام علشان الواحد داخ يا جماعه ، وشكرا
-
شوف كل فوله ولها كيال
بس انت شوف اللي بيشتري انواع معينه من العربيات ذي المازدا بيكون ليه فكر ووجهات نظر معينه
ساعه لما حتيجي تبيع حتكون مستني حد يوافق وجهه نظرك
ويكون محتاج محفز لدعم اختياره ذيك كده دلوقت
والمحفز ده حيكون السعر لانه في الاغلب حيشتري العربيه ويبتدي يصرف عليها مستهلكات
انا شايف ان مدام الحسبه جيه معاك بقروض و زنقه
يبقه فكر في بدايل تانيه انت مش غني حرب
اتمني مكنتش زودت حيرتك
بالتوفيق
-
فى نظريتين فالموضوع ده
فى اللى بيحسب هيبيع بكام لما يحب يغير.
و فى اللى بيحب يركب و يتبسط.
كل وجهة نظر ليها احترامها, و حضرتك اللى تحدد.
انا عن نفسي بحب اتبسط, لانى بجيب العربيه عشان اركبها, مش عشان ابيعها.
و فى اللى مابيركبش زيرو عشان خسارة اعادة البيع, و مالهاش دعوه بقدرته الماديه, يعنى ناس بتركب مرسيدس و bmw و ماتجيبهاش غير مستعمل عشان فعلا خسارتها فالزيرو مهوله.
اتمنى اكون وضحت وجهات النظر, و حضرتك تقرر.
تحياتى.
-
الكلام دة مية مية الله ينور انا مش هاروح اشتري عربية جديدة زيرو و انا اصلا بفكر ابيعها ماعتقدش اي واحد هايفكر يشتري عربية متوسطة في رانج المازدا او الهوندا او التويوتا عندة مقدره انه بعد سنتين يزهق منها ويغير و ماعنديش استعداد اني افضل متعايش مع عربية مش عجباني و مش مستريحلها و انتريور بلاستيك في بلاستيك لمدة ٥ او ٦ سنين وساعات ممكن توصل ل ١٠ سنين عشان لما اجي ابيع ماخسرش كتير .... يبقي الاحسن ندور علي كسر زيرو مش زيرو
-
يبقى المفروض حضرتك تجاوب على السؤال ده ...حضرتك شاري عشان ناوي تبيع ؟؟؟...ولا شاري عشان تركب وتحقق اللي حضرتك عايزه من أمان ورفاهية من خلال العربية ؟؟؟
-
اسف موضحتش اني برد علي الرد اللي قبلي .... انا طبعا ضد اني افضل احسب سعر اعادة البيع.... انا مع اني اركب العربية الكويسة اللي عجباني بغض النظر عن السوق بتاعنا
-
الشعب المصري غريب جداً بيفكر يبيع العربية قبل مايشتريها ... لعلمك الموضوع ده مش موجود في أي مكان في العالم غير مصر ... اركب و اتبسط و عيش حياتك لأن محدش عارف هيحصل ايه خلال 4 سنين و ممكن المازدا مبيعاتها تزيد و تبقي زي الكورولا كدة و سعر إعادة بيعها يبقي تمام و بعدين انت هتخسر ايه بعد 4 سنين لما تيجي تبيع ؟! ما انت كدة كدة هتبقي ركبت عربية 4 سنين و استمتعت بيها يعني الموضوع نسبي ولا انت عايز تجيب العربية ب 200000 و تركبها 4 سنين تعمل بيها 100000 كم و تبيعها ب 190000؟! كلام doesn't make sense !!!
-
عامل اعاده البيع بتاع اي سلعه من المحددات الرئيسية في قرار شراء
لما كمان تكون السلعه متميزه و غاليه و تكون اساسا موجهه لزبون وفءه معينه
يبقه لازم اعظم في قرار اقتناءها عامل اعاده البيع
خصوصا خصوصا اني عشان اقتنيها حتكلف اكتر من المشتري العادي ليها نتيجه اني معييش تمنها
لاكن اني اتجاهل ده واعيش بعيد عن ارض الواقع ومحددات السوق المصري الغريبه
يبقه انه واحد الفلوس مش عامل مؤثر في قراري وببحث عن التميز والاداء و ماشابه وساعتها مش حيكون عندي ازمه من الأول اني اشتريها .
وده طبعا ليه احترامه
متعه الاداء و الاستمتاع محدش ضدها وكلنا بندور عليها
اتمني اكون اوضحت وجهه نظري
والاحترام للجميع
_
-
كلمه في ودنك
المازدا في مصر عمله ذي الطفل اللي اتولد من جوازه عرفي
محدش عايز يجوزه بنته ومش بيقوله السبب ايه
اهو بيترفض وخلاص
-
شكرررا لكل الردود الطيبه من الأعضاء المشكلة زي ما أنتم قايلين ان الكلام ده مش موجود بره وانا كنت عايش بره مصر واستقريت نهائي هنا فا لقيت حوارات كتير زي أعاده البيع أقول للصحابي هو أنا هفكر أبيع حاجه لسه مركبتهاش يقولوا آه هنا تفكر في الحوار ده فقولت اسالكم مع أني مش عارف ليه يعني موضوع المازدا مش ماشي سوقها مع انها عربيه ممتازة زي الهوندا والنيسان وكده
Content Relevant URLs by
vBSEO 3.6.0 PL2