الموضوع: اصبحت برتوناوى :)

السلام عليكم ..
الحمد لله رب العالمين استلمت النهارده بيرسونا 2014 موكا من توكيل عز العرب .. ماشاء الله العربيه جميله جدا ربنا يبارك فيها .. المهم عندى كذا احب اقولكم عليها :
1) فى عندى حدفه بسيطه نحيه اليمين .. هل استنى لصيانه الالف ولا اروح اعملها فى بريدجستون ؟
2) شغلت التكيف بعد ما حطيت بنزين لان الجو كان بشع .. بس بصراحه اداءه مكنش زى ما كنت متوقع .. على الرغم انى عامل المروحه على النص و مخلى الحراره فوق ال 18 ب 4 شرط ..وطبعا قافل دخول الهوا من بره .. اه حاجه كمان سمعت صوت دخ الفريون كذا مره مع طلعه العربيه و مع تغير النقله ..فهل اروح التوكيل ولا برضو استنى لصيانه الالف ؟
3) عندى رجه خفيفه فى الدركسيون مع الفرمله .. فهل ده عيب طنابير ولا لسه التيل بيطبع على الطنابير .. ولو مشكله ايه علاجها ؟
الف شكر


-----

تقرير العربيه بعد 500 كيلو :
1) الرجه اللى كنت بشتكى منها راحت الحمد لله واداء الفرامل الحمد لله كويس جدا .
2) الكاوتش كان ناشف فى الاول و مع الاستخدان النشفان بيروح .
3) الحدفه زى ما هيا بعد ظبط الهوا عند اكتر من حد .. فهعملها فى التوكيل فى صيانه الالف .
4) التكيف اصبح كويس عن الاول بس محتاج اشيك على الفريون فى التوكيل من باب العلم .
5) مساحات الزجاج ناشفه مش بتنشف الزجاج كويس ( اظن من الركنه و الشمس ) .
6) استهلاك البنزين .. اول تفويه عملت معايا حوالى 350 كيلو بالتكيف .. التفويله التانيه الشرطه الاولى عملت معايا 85 كيلو بالتكيف و من غير تكيف .. مش قادر احكم بصراحه ازا كان كويس ولا عادى .. و ياريت اللى عنده نصيحه يقولى smile emoticon
7) الريموت بتاع العربيه مش كويس فى القفل .. ساعات كتير مش بيفتح الا من رابع مره .. اما فى الفتح بيفتح من اول مره زائد ان مداه قصير جدا !
8) التزيق .. وانا كنت قريت ان فى مشكله فى البيرسونه و الجين تو متعلقه بموضوع التزيق ده .. اللى عرفته انه بيلف شيكرتون على قفل الكنبه اللى وره وانتهى الموضوع على كده .. بس بامانه هو مستفز جدا وبيبان اوى على البطيئ فى الشوارع المش مستويه .

يا ريت لو حد يقولى استهلاك البنزين ده كويس ولا لا وهل هيتحسن .. وكمان بالنسبه للحدفه و التزيق .

الف شكر

احمد

بسم الله الرحمن الرحيم

الأخ الفاضل bluemagic11

بارك الله لك فيها و منحك كل خيرها و كف عنك كل أذاها. . . أود سؤالك عن بعض الأمور لأننى من أشد من المعجبين بالبروتون بيرسونا تحديدآ فوق الجين 2.

1 - من أى فرع من فروع عزب العرب إشتريتها؟

2 - كم من الوقت إنتظرت حتى إستلمت السياره؟

3 - هل توجد مسافة تليين؟ و إن كانت توجد فكم هذه المسافه؟ و ما هى شروط التليين؟

4 - كم سعة خزان الوقود ؟

5 - هل تشعر بالرضا أن أنك تشعر أنه كان بإمكانك الحصول على سياره أفضل بنفس الثمن؟

6 - هل فعلآ صاج السياره ثقيل و قوى ؟

آسف على الإطاله و لكننى أطمع فى الحصول على إجابات

السلام عليكم ورحمة الله و بركاته