كروز ٢٠١٥...أسئلة كتير

**dr.3omda** · 17-06-2015 05:33 AM

انا كل ما اتزنق في حاجة الاقي نفسي جي على نايل موتورز اسأل الناس الخبرة، وعمرهم ما خيبوا ظني حتى الآن، فجاي أسألكم وأتمنى الجواب.

أنا كنت ناوي اشتري مازدا 3 زيرو شكلها عاجبني جدا، بس الفلوس عجزت معايا وقررت اتجه للكروز علشان هي بالنسبالي وعلى الورق افضل من الالنترا وارخص كتير.
بس عايز اعرف كام حاجة كدة:

١) مميزات وعيوب العربية في ايجاز لو امكن؟

٢) كنت سامع ان في مشاكل في الفتيس. اتحلت؟ التوكيل بقى بيغير زيت مظبوط ولا لسة بيحط زيت وحش؟

٣) العربية فيها مرايات ضم كهربا ولا لأ؟

٤) الـUSB بيشغل iPhone ولا لأ؟

٥) المفتاح شكله ايه؟ والشنطة بتتفتح من جوة العربية ازاي؟

٦) ايه النصايح اللي تقولوهالي أو ايه اللي المفروض اعمله بعد ما استلم؟

**Mostafa Bedo** · 17-06-2015 06:59 AM

بس حضرتك خلي بالك الشكل الجديد منها قرب ينزل

**ENG.MaRk** · 17-06-2015 07:46 AM

أنا مش عارف كل حاجة عن العربية لأني مامتلكتهاش بس اللي أعرفه هأقوله لحضرتك :)
1) عربية ممتازة كسحب و ثبات و كمالياتها معقولة جداً بالنسبة لسعرها تحس إنك راكب أسترا بس كوري :)
2) أعتقد مشاكل الفتيس كانت في الموديل الأقدم (ما قبل الFacelift) و مش موجودة في الموديل الجديد و أعتقد برضه تم حلها في الموديل القديم بتغيير الزيت كل 20000 كم
3) العربية مفيهاش مرايات ضم كهرباء بس الadjustment بتاع المرايات نفسه كهرباء
4) بمعني ايه الUSB بيشغل iphone ولا لا ؟! ... لو تقصد الcharger ف أكيد بيشتغل و لو قصد حضرتك غير كدة مش عارف و مش حابب أفتي :) !!!
5 ) ريموت يخرج منه المفتاح من الجنب و مش عارف الشنطة بتتفتح إزاي من جوة العربية
6) ماعنديش نصايح غير إنك تستني الشكل الجديد اللي نازل لأنه أحسن و لو مش أحسن بالنسبالك و حضرتك مقتنع بالشكل الحالي يبقي استني لأن أكيد مع نزول الشكل الجديد هيبقي في عروض كويسة علي الشكل الحالي و خصومات ممكن تصل ل 10000
أنا مش ملم بالعربية ككل و كتبت مشاركتي كتصبيرة بس لحد ما خبراء الكروز يدخلوا يردوا عليك :)

**dr.3omda** · 17-06-2015 01:09 PM

هو بالنسبة للشكل الجديد أنا عاجبني وشها لكن عاجبني الضهر بتاع الشكل الحالي اكتر. وكمان ماعيش عربية دلوقتي وحياتي شبه عطلانة فمحتاج اشتري في اقرب وقت ممكن.