رمضان كريم .. اخبار وضعك الديني ايه
ناس كتير بتقول انها مش حاسه برمضان السنادي
سالت نفسك ليه مش حاسس برمضان
بغض النظر عن الاوضاع الاقتصاديه والسياسيه
رمضان حاجه تانيه .. رمضان اوضاع دينيه
ايوه والله
وضعك الديني مع ربنا ايه
اخبار صلاتك ايه منتظمه ؟؟ طب منتظمه في جماعه ؟؟
طب صلاه الفجر ايه وضعها ؟؟
طب صله الرحم وضعها ايه ؟؟
ده تحرى الرزق الحلال اخباره ايه معاك
طلعت زكاتك واتصدقت ؟؟
اوعى تقول معاييش فلوس
والله الذى لا اله الا هو مفيش مره طلعت صدقه وقت ضيق الا عادت بفرج ووسع اكتر منها بمراحل
اخبار برك بامك وابوك ايه .. طب لو توفاهم الله سالت على خالتك وعمتك وخالك وعمك ؟؟ما انت لازم تصل الي كان ابوك وامك بيحبهم
اخبار مصحفك ايه ووضعه فين في الشقه في النيش ولا المكتبه ولا جنبك عالسرير ولا في شنطه ايدك
صديقي واخى في الله
والله انها ايام كريمه وشهر اختصه الله بجبال حسنات
اغتسل غسل من باب الفضل وصل ركعتين فضل وانتوى صيام الشهر الكريم مع دعاء خالص من القلب ربنا يتقبل
صل رحمك وافطر مع ابوك وامك او من تحب ان كان توفاهم الله واكثر من الدعاء لهم احياء او اموات
اكثر من الصدقات والدعاء والاستغفار وحافظ علي صلاه الجماعه وصلاه الفجر الذى اقسم الله به
ونصيحه خالصه اطفى ال تي في نهائي او علي الاقل احذر انه يجرك لتضييع الوقت مش هاقول يشيلك ذنوب
مصحفك بقي الصغير ما يفارقش شنطتك واجتهد تختم مره واتنين وانتوى ذلك عشان لو مقدرتش يتكتبلك الثواب
متتقلش في الفطار عشان تقدر علي الصلاه
صلاه التراويح مش لازم في المسجد عادى تصليها في بيتكم ولو قدرت خد اهل بيتك وراك
حاول ما تتعصبش وانت سايق وبنصحك وبنصح نفسي بتشغيل القرأن بصوت نفسك بتحبه طول مانت سايق
اكثر وقت بتقل فيه السكريات في الجسم وتعلى اللزوجه وتزيد العصبيه هي من العصر للمغرب حاول ما تتعاملش فيها مع ناس كتير او علي الاقل اجتنب المعاملات والقرارات في الوقت ده
حاول تتسحر متاخر قبل الفجر مباشره عشان تصلي في المسجد جماعه وحاول تظبط يومك من اول يوم
ولمدمنين الكافيين والنيكوتين خللي عود سواك معاك باذن الله يعوضك شويه
وبخصوص اول يوم رمضان حاول تفطر في مكان بتحبه او مع ناس بتحبهم
اهلك قرايبك اصحابك ولو ظروفك صعبه وهاتفطر في شغلك حاول تفطر مع حد بتحبه متفطرش لوحدك
وبخصوص ثواب افطار الصائم حاول تكون وجبه مشبعه تفطر بيها صايم والافضل لو محتاج طبعا وما اكثرهم
واياك تعترض طريق شخص مش عايز يفطر او تقطع طريق واقول بوزع تمر وعصير المسلم اخلاقه عنوانه
وانت نازل تصلي خد ازازتين ميه معاك لجار اليمين واليسار في الصف واسال الله ان يسقيك من الكوثر
اسال الله الكريم العظيم ان يتغمدنا بفضله ويعاملنا برحمته لا بعدله فهو ارحم الراحمين
وطبعا اي شخص يقدر ينقل النصيحه او يشيرها عسى الله ان ينفعنا بما علمنا
#رمضان_كريم