الموضوع: سؤال عن لادا زيرو من غير توبيخ

مين بيبيع لادا زيرو دلوقتي في مدينة نصر؟
الأمل ليه فرع في مدينة نصر بيبيعها؟
وأنا نفسي اشتريها لو طلع فيها القطط الفطسانه

أنا عيني دمعت من كتر الضحك و صدقني مش سخرية بس استغراب عن الحب العجيب للادا :)

السلام عليكم
أولا كل عام وانتم بخير
ثانيا العربية اللادا وخصوصا الموديلات صندوقية التصميم بتستهوى ناس كتير قوى هى أزواقهم كده
وأنا واحد منهم
عندى لادا 2017 وبالرغم انها تعبانى فى صيانتها شوية بس بحس وأنا راكب اللادا انى راكب عربية بجد
طبعا من حيث القوة والمتانة والثبات على الطريق وخصوصا فى السرعات العالية
لأنى والله ركبت موديلات حديثة كتيرة طبعا على سبيل الصدفة زى مثلا أخويا كان تعب شوية ووصلته مرة للمستشفى بعربيته وهى من الأنواع الحديثة وكنت مرة معزوم فى فرح وفى عربية محتاجين حد يسوقها
فى الزفة وخلافة فالمهم اللادا تكسب من حيث القوة المتانة والثبات على الطريق طبعا لو انت مهتم بيها
فالخلاصة أنا بحب اللادا جدا ومش عايز أركب عربية تانية غيرها

المشاركة الأصلية كتبت بواسطة j a g u a r

اللادا يا عزال اللادا :)

أهه من حب الناس فيها بيغنولها اللادا يا عزال اللادا
طب حد سمع قبل كده أغنية بتقول المرسيدس يا عزال المرسيدس ( طبعا ما سمعناش ) يبقى مين يكسب

هي العربية جميلة طبعا..
بغض النظر عن شكلها الصندوق شوية.
وبغض النظر عن صوتها العالي.
وأيضا بغض النظر عن أنها ثقيلة في النقل والدريكسيون والعافشة.
فهي قوية كصاج. وموتور. واقتصادية في البنزين وقطع الغيار.

اللادا يا عزال اللادا بحبك حب عباده
بيقولو ايه اسم الله عليه عسل ابيض وحلاوته زياده
اللادا يا عزال اللادا

فعلاً الفكر الروسى بوجه عام ليه ناس تقدره, و مش أى حد يفهمه.
الكلاشينكوف ak_47 مازال ليه شعبية كبيرة جداً فى أى نظام تسليح رغم إن فيه مليون سلاح متطور ظهر بعده !!!!
اللادا رغم كل عيوبها إلا إنك فى الآخر تلاقى واحد نايم قايم بيحب فيها.

واحد جارنا طول عمرة لاداوى بشكل بشع, كل ما ربنا يكرم بقرشين يغير لموديل أحدث فى اللادا
لحد ما طلع معاش و أخد مكافأة نهاية الخدمة, جاب لادا برضو !!!

و واحد زميلنا هنا جاب اللادا و بعدين باعها و ركب متسوبيشى لانسر و رجع باعها و حلف بعمر اللادا, و قعد يقول و لا دا و لا دا مفيش غير اللادا !!!

أنا شايفلها مميزات مش موجوده فى أى عربية تانية, مش عاوز أقولها علشان هلاقى هجوم شرس من أصحاب السيارات الأخرى.... بس هأقول برضوا :)

- إحنا هنا فى مصر و المدن الكبرى تحديداً مبقاش فى مجال للجرى و الشد و الكلام ده و بالتالى لو حتى هتجيب بوجاتى هتمشى على الثالث آخرك, و الغيار الرابع و الخامس يمكن مش هتيجى جنبه غير فى السفر أو للحظات على الطرق السريعة !!!
- الأغلب فى الطريق و أسلوب القيادة قاعدة مشهورة علمهالنا عفاريت الأسفلت:البوز بيز ... اللى بيدخل ببوزة الأول بيعدى الأول (أنا عارف إنها بلطجة) بس ده الواقع للأسف. و دى ميزة اللادا اللى مش موجوده غير فى سيارات السبعينات و أوائل الثمانينات و فى اللادا حتى اليوم .
- اللادا مش عاوز اللى يركبها يشتغل بيه, يعنى هتشيلك و مش هتخزلك فى أى موقف و هتوفرلك كتير فى أسعار قطع الغيار و المصنعيات مقارنة بالعربيات الأخرى, بس محتاجه منك "تتجوزها" يعنى تشوف طلباتها بشكل دورى , ميعجبهاش الطناش و تكبير الدماغ. (و أى عربية كده بس بنسب طبعاً)

============================
دى شوية مواقف حصلت لأصحابها قرأتها قبل كده على النت (مش من عندى و لا أعرفهم و الحجة عليهم):
- واحد أخد بلاعة مفتوحة و مشى, بعدها بشهر راح ينقل حاجات عالعربية, فلاقاها بتحك فى المطبات, وصل حمولته و راح للعفشجى...... الراجل شخـ....ط فيه و قاله المساعد مكسور و العربية ماشية على سوست الياى بس بقالها شهر و كمان بتحمل عليها !!!!

- واحد تانى راح العين السخنه و فرقع منه خرطوم الريداتير و العربية جابت جوان سلندر و هو لسه على أول طريق العودة (بيقول بعد مدفع الكارته) و مع ذلك فضل يزود مياه و يسايسها لحد موصلته البيت بسلامة الله و الـ 5 اللى كانوا معاه غير الشنط. , شوف أى عربية تانية كان نقلها بكام على ونش.

- ده غير الحوادث الخفيفة اللى بتحصل بين اللادا و أى عربية تانية جوة المدينه.... لا تعليق.
و للعلم علشان هيدخل واحد دلوقتى يقول مفيش أمان فى اللادا: هأرد أقولك :
شوف سعر العربية و هات حاجه بنفس سعرها و قولى الأمان بتاعها إيه (إلا إذا كانت صينى مش مشهور و إنت و نصيبك الوسائد الهوائية هتشتغل و لا لأ و الـabs هيمسك و لا هيعطل , صينى بقى و أنت و حظك) إنما أقرب حاجه ليها الماروتى و برضو أمانها صفر.

=========================
الكلام اللى فوق ده كله بنقوله للأجانب, إنما زملاء الكفاح اللى شايلين معايا قرفها عارفين إن الكلام ده كله أونطه بس علشان منحسش إن فى حد أحسن من حد.