قصة شرا سياره بيــجو 307 كســر زيــرو و أهمية الكشف في التوكيل
أنا بصراحه حبيت أحكيلكم عن تجربتي الشخصيه هنا في الجزء الخاص ببيجو أنا من شهر 4 و أنا داير الف على بيجو 307 2007 بحاله جيده و تكون في حدود من 100-105 بس تكون كامله و فل أوبشن و كده المهم سألت يمين و شمال و دورت كتير عليها المهم كلمت واحد و رحت شفت العربيه اتوهمت الصراحه سياره خرافيه ما شاء الله و من ساعتها و أنا هموت عليها الراجل كان طالب 105 و أنا كنت هنزل معاه شويه و احنا واقفين نزل ألف و قال 104 المهم العربيه كانت ملاكي الدقهليه و ده خلاني أسأل عن الرخصه المهم الراجل قاللي ان السياره خلصانه من مزاد و بتاع و لسه مخلصش ورقها وقال لوالدي ان ممكن يكتبها باسم والدي على طول المهم سألت واحد قاللي لأ مش مهم مالك أول أو مالك تاني المهم الرخصه و شهاده من المروور فقلنا للراجل خلص ورقها و خلاص و بعد كده الكلام ييجي
المهم قعد شهر في ورقها ده و بعد كده كلمنا قالنا انه خلص ورقها و رخصها بإسمه و قالنا تعالوا اكشفوا عليها والدي طبعا كان مآمن للراجل جداااا عشان الراجل صادق لأنه فعلا كلم والدي أول ما خلص الورق
والدي أصلا كان عايز ياخدها من غير كشف لكن أنا لحيت عليه جامد في الحوار ده المهم كلمت صحابي واحد منهم قاللي روح أحمد عماره اللي في صلاح سالم بجد ناااس محترمه جدااااااااااااااااااا و حظي حلو لأنني لما رحت هناك لقيت ماهر أحمد عماره كمان و كشف عليها بنفسه و هو اللي قاللي التقرير كله عنها
نسيت أقول لكم ان صاحب العربيه قاللي انه غير الفانوس الزينون بعادي عشان الزينون باظ و المشكله انني صدقته ساعتها
و كان التقرير بيقول ان العربيه بحاله ممتازه جدا و لكن الإكصدام و الرفرفين متغيرين و مرشوشين و كمان العتب مرشوش و الفوانيس اتكسره في الحادثه اللي عملت كل ده و اتركب مكانهم فانوسين بتوعها بس عاديين مش زينون و البربريز الأمامي مش أصلي و الفوانيس مش مربوطه كويس في بتاعه كده و مسامير ناقصه المهم العربيه شكلها بصراحه يقول ان فعلا العربيه فابريكه و أراهن أي حد لو اتكشف عليها في أي حته مش هيطلع فيها اي حاجه ده الناس كلها عماله تقول ما شاء الله على العربيه و جمالها و حالتها المهم بعد ما قرأ لينا التقرير المهندس ماهر أحمد عماره سألته أخدها ولا لأ قاللي السياره عملت حادثه بس اتصلحت حلو قوي و الحادثه مش مسمعه جوه خالص وال Ecu مش مسجل أي اعطال أبدا قلتله هو طالب 104 قاللي كتير جدا آخرها 95 المهم أنا دلوقتي بنزل فيها وواصل ل 98 بس مش عارف أجيبها ولا لأ يا ريت تشوروا عليه
و بجد أنا بتمنى أجيب بيجو عشان توكيلها محترم بمعنى الكلمه و بجد ناس محترمه جداااا
ياريت أي حد عايز يشتري كسر زيروو يرووح التوكيل يكشف هناك
