الموضوع: ليه المقاس 13 اختيارات الاطارات محدودة وغير جيدة

مواصفات الإطارات الـ13 غالبا بتكون ضعيفة لسبب بسيط...

إنك مش هتلاقي عربية مركبة جنط 13 وسرعتها تعدي 200 كيلومتر .. إلا في النادر.

ببساطة... العربيات اللي جنوطها صغيرة بتبقى عربيات اقتصادية... بمعنى إن تكاليف تشغيلها قليلة نسبيا.. وأغلب العربيات دي مخصصة للمدينة.. وبالتالي سرعتها المفروض ما تعديش الـ100 كم/س في أغلب الأحوال.

ما تنساش حاجة مهمة....

المواصفات العالية = سعر عالي


ولو عايز كاوتش بمواصفات عالية... لازم تجهز العربية كمان بمواصفات عالية.. أولها جنوط أكبر (15 بوصة على الأقل).. علشان تاخد كاوتش رياضي البروفايل الجانبي بتاعه أصغر والعرض الإجمالي بتاعه أعلى.



أنا لو مطرحك... هفكر كالتالي:

أجيب كاوتش عمره طويل ويديني أداء كويس على قد عربيتي.. لإن أقصى سرعة هتمشي بيها مش هتتجاوز الـ150 كم/س.


يقى أدور على أكواد تانية جنب كود السرعة... يعني كود الحرارة... كود الحمولة... كود التماسك


حاول تجيب فردة بالمواصفات دي على الأقل:

كود السرعة: s يعني 180 .. أو t يعني 190... أو h يعني 210 .. (أنا شايف t أكتر من كافي)

كود الحمولة: ما يقلش عن 82 = 475 كيلوجرام للفردة.... ويفضل لو لقيت كود 88 = 560 كيلوجرام

كود التآكل Treadwear: ما يقلش عن 240.. وكل ما كان أكتر يبقى أفضل.... (كان عندي فردة كومهو رقمها 560)... مع العلم بإن الكود ده نسبي ويختلف من شركة للتانية.

كود الحرارة Temperature:ما يقلش عن b أو a لو انت في وجه بحري... ولو انت في وجه قبلي يبقى a أو aa

كود التماسك Traction:ما يقلش عن b أو a .. ويفضل a.


ربنا يوفقك وتلاقي حد يخليك تشوف الأكواد دي قبل الشرا.


...