شاكك في العربيه اللي اشتريتها

**Polar Star** · 03-07-2015 01:58 AM

المشاركة الأصلية كتبت بواسطة abo_mazen

طيب أنا عندي فكره ..هي بصراحه فكره عمري ما أقترحتها على حد ..بس هقترحها عليك لإنها لسه جايه في بالي دلوقتي حالا ..إنت ممكن تفحص براني ...إزاي بقى ؟؟؟..ممكن تروح المرور وتلاغي اللي واقف في طابور الفحص وتقوله في عربيه معروضه عليا وبصراحه خايف منها لتكون مغيره نص ...وتقوله يلاغي المهندس بتاع الفحص وهو مروح وطالع من المرور يبصلك عليها بصه ..وهتديه اللي فيه النصيب ..يعني المهندس وهو طالع من المرور الساعه 2 الظهر مثلا ومروح بعد انتهاء يوم العمل تكون إنت واقفله عند المرور من بره ويبصلك بصه كده ..عشان العربيه دي لو شمال يبقى مش هتخلص فيها ..طبعا الكلام ده هيبقى للشماشرجي اللي واقف في طابور الفحص وهو الل هيعمل الدخله على المهندس بتاع الفحص ..لو لا قدر الله العربيه طلع ملعوب في أساسها البخت ..يبقى تطلع منها خرده ..وفداك وفدى ضفر من عيالك..ها ..إيه رأيك؟؟؟

الله يكرمك علي اهتمامك وردك الجميل
انا هحاول اعمل كدة فعلا وهحاول اشوف ملفها في المرور
بس مش فاهم اطلع منها خردة ازاي؟
يعني ابيعها خردة او لواحد تاجر عربيات حوادث مثلا؟
انا فكرت في الاحتمال ده بس مش عارف هو تاجر الحوادث ده نظامه ايه؟
معلش كمل جميلك معايا واشرحلي في رساله خاصه حتي
الف شكر ليك

**waleed alsudy** · 03-07-2015 07:44 AM

الفحص دا شئ اساسي وانك تروح لمرور الدراسه علشان يتاكد ان العرابيه سليمه ومش مغيره حاجه ولو لاقدر الله مغيره حاجه تبع المرور بيكون متسجل
انا كان معايا هوندا وعملت حادثه وغيرت نص وكان لازم اثبت النص دا واثبته ودقيت القايم كمان علشان في الفحص يحط الرقم دا في الملف يا اما لو جيت ارخص يدخلو العرابيه المقبره يعني تكهن عندهم ويعتبرو اني انا اللي مجمع العرابيه بس ان شاء الله خير

**Abo_Mazen** · 03-07-2015 12:53 PM

المشاركة الأصلية كتبت بواسطة polar star

الله يكرمك علي اهتمامك وردك الجميل
انا هحاول اعمل كدة فعلا وهحاول اشوف ملفها في المرور
بس مش فاهم اطلع منها خردة ازاي؟
يعني ابيعها خردة او لواحد تاجر عربيات حوادث مثلا؟
انا فكرت في الاحتمال ده بس مش عارف هو تاجر الحوادث ده نظامه ايه؟
معلش كمل جميلك معايا واشرحلي في رساله خاصه حتي
الف شكر ليك

تطلع منها خرده يعني تبيعها لتاجر قطع غيار تقطيع ..بس شوف بس الأول موضوع الفحص ده وربنا يسهل

**waleed alsudy** · 03-07-2015 03:47 PM

المشاركة الأصلية كتبت بواسطة polar star

الله يكرمك علي اهتمامك وردك الجميل
انا هحاول اعمل كدة فعلا وهحاول اشوف ملفها في المرور
بس مش فاهم اطلع منها خردة ازاي؟
يعني ابيعها خردة او لواحد تاجر عربيات حوادث مثلا؟
انا فكرت في الاحتمال ده بس مش عارف هو تاجر الحوادث ده نظامه ايه؟
معلش كمل جميلك معايا واشرحلي في رساله خاصه حتي
الف شكر ليك

شوف اريحك والله لو اديت اللي على السير او المهندس اللي بيفحص 100 جنيه هيمشيلك كل حاجه انا عملت كدا علشان مش يعدي العرابيه على السري مع ان ورقي كامل ومعايا اللي يثبت اني مغير النص شرعي ومن المرور بس علشان اريح نفسي ولا يقولي روح اكدلي ولا وجع دماغ

**Polar Star** · 10-07-2015 08:36 AM

اشكركم جميعا علي ردودكم...لغايه دلوقتي مفيش جديد نظرا لظروف الصيام والعيد قررت اتحرك في موضوع العربيه بعد العيد ان شاء الله ولو ان عندي دلوقتي فردتين كاوتش نايمين والبواب كل يوم يقوللي الحق عبيتك الكاوتش عالارض وحسبي الله ونعم الوكيل في اللي باعهالي حتي الكاوتش التيوبلس طلع زباله

**A.Saad** · 16-08-2015 02:45 PM

عملت ايه ؟؟؟؟

**miam0502788391** · 20-08-2015 12:09 AM

ياااااااااااااااااااااه
حضرتك اتعذبت كتير اوى بالعربية من ساعة ما اشتريتها
يعنى الواحد بشترى عربية علشان يريح نفسه من وجع الدماغ بتاع الموصلات يقوم يلاقى مشاكل فى حتة عربية تنكد عليه عيشته
ربنا يكون فى عونك

**Polar Star** · 20-08-2015 11:08 AM

المشاركة الأصلية كتبت بواسطة miam0502788391

ياااااااااااااااااااااه
حضرتك اتعذبت كتير اوى بالعربية من ساعة ما اشتريتها
يعنى الواحد بشترى عربية علشان يريح نفسه من وجع الدماغ بتاع الموصلات يقوم يلاقى مشاكل فى حتة عربية تنكد عليه عيشته
ربنا يكون فى عونك

بالضبط كدة هو ده اللي حصل
انا روحت دفعت 40 الف جنيه عشان اشتري بيهم لنفسي وجع الدماغ والنكد وحرق الدم وبرضه لسه بركب مواصلات !!
ولسه هدفع تاني فلوس عشان امشي العربيه دي واخلص ورقها ووالله ما هي مكمله معايا كدة كفايه اوي
الانسان المفروض بيشتري عربيه تريحه وتوفرله مش تتعبه وتكلفه مبالغ
انا تعلمت الدرس خلاص
بعد كدة مش هشتري مستعمل تاني ابدا مهما كانت الاغراءات
وحسبي الله ونعم الوكيل في اللي باعهالي واللي اشتراهالي
يكفي اني حللت سكر بسبب العربيه دي من كتر حرق الدم والمشاكل

**ahmedsrs** · 20-08-2015 03:48 PM

لا حول ولا قوة الا بالله انا قريت الموضوع من اوله الله يكون فى عونك انت وقعت مع تاجر بلطجى حاول تخلص من موضوع العربية ده باقل الخسائر ومتحرقش فى دمك عشان الصحة اغلى من الفلوس والعربيات