تجاربكم مع المطاعم في رمضان؟؟

**Anaslbda** · 27-06-2015 12:01 AM

حد بيفطر بره عنده تجارب كويسة حابب يتكلم عنها؟

بتكلم هنا طبعاً على القيمة مقابل السعر.
فطرت امبارح مع واحد صاحبي في مطعم الست حُسنية - متفرّع من شارع مصدق الدقي.
مطبخ مصري وشرقي
نظامهم منيو موحّد مقسّم لكذا بند, بند العصاير وبند السلطات وبند المقبلات وبند الطبق الرئيسي وبند الحلو.
في كل بند 3 اختيارات بتنقّي واحد بس.
الفرد ب 175 حنيه.
الأكل مع الأسف جودته أقل من العادي, حاجه تجاري كده وقلّب عيشك, الportions قليّلة, الطواجن كانت عيّنات بمعنى الكلمة. العصاير مش refill, الرز مش مستوي كويس الخ
قيمة مقابل السعر = صفر.
طبعاً الخدمة تحس انك الملك فاروق أصل انت هتكيّش قد كده في الآخر طبعاً

الحساب كان 375 + 40 جنيه خدمة

على الجانب الآخر في مطعم أنس الدمشقي - سانت فاطيما مصر الجديدة.
أسعار فوق الممتازة والمنيو مفتوح والأكل رهيب بجد. عُمري ما رحت هناك وخاب أملي أبداً
بتاكل ضعف كمية الأكل بجوده أحسن وبنص السعر بتاع المطاعم المفترض انها high end لكنها بتقرطس الزبون.
المشكلة انك تلاقي مكان هناك لإن الترابيزات محدودة.

**4fun14** · 27-06-2015 12:12 AM

انا جربت المنوفى فى التجمع الخامس..
الاكل ممتاز والخدمة ممتازة والحد الادنى للطلبات 160 جنيه
التجربة ايجابية جدا تقريبا جربنا المنيو كلها "كنا اكتر من 20 واحد" ومحدش اشتكى
بس انا مش مقتنع بالفطار فى المطاعم فى رمضان بصراحة

**Dr. Assem** · 27-06-2015 12:18 AM

امبارح فطرت في قرية هاني في الكافوري. ماكنتش حاجز و رحت عالفطار انا و اسرتين تانيين و اليوم كان خميس يعني ويك اند

من ساعة ما وصلنا بعربياتنا و لقينا زحمة الباركنج توقعنا ان احنا من حنلاقي مكان. المطعم زحمة جدا جدا

و رغم كده الناس اخدونا على كفوف الراحة و ظبطولنا قعدة عربي لان ده كان طلبنا. و جابولنا الاكل اللي احنا عايزينه. الاكل كله سخن و طعمه رائع و الخدمة ممتازة . و الولاد ليهم منطقة ملاعب جميلة.

فضلنا قاعدين لغاية الساعة 10 و نص. شاي بقى و كنافة و حاجات. حساب الفرد كان حوالي 150 جنيه و يمكن اقل.

يفضل الحجز المسبق بالتلبفون و تحديدالاوردر.

النهاردة بقى رحت فطار تبع الشغل في فندق المحروسة عالبحر . كنا واخدين المنطقة اللي حوالين حمام السباحة لحسابنا. الخدمة ممتازة و الكل احسن من المتوقع. و الجبة ميكس جريل 90 جنيه و في وجبة فراخ اقل شوية.

**Dr. Assem** · 02-07-2015 03:34 AM

النهاردة كنت عازم فريق العمل عندي علي الفطار في مطعم ابن البلد مصطفى كامل. بوفيه مفتوح الفرد 150 جنيه

المكان جميل و الاكل ممتاز و الخدمة رائعة. تشكيلة السلطات و المقبلات و اللحوم و الحلويات كافية و ترضي كل الازواق.

ملاحظتي ان المطعم ماكانش زحمة و ده غريب عليه في رمضان

**ahmedwagdy03** · 02-07-2015 12:02 PM

كذا تجربة فاشلة خلتنى أبطل أفطر فى رمضان برة البيت

1-تكا جريل : لازم تحجز قبلها بيوم و تدفع و الأصناف محددة فى 3 قوائم .تروح تلاقى الأكل بارد و مش بالمستوى المعتاد منهم و فاتورة عالية على الفاضى

2-بلبع الداون تاون أسماك (بطلت لحوم برة البيت) غالى نار زى ما يكونوا بيضربوا الفاتورة فى 2 و الجرسونات حرامية .آخر مرتين غالطونى فى الحساب مرة لبسنى كيلو بربون أونطة و تانى مرة غالطنى فى بورى مشوى مطلبطوش بس نفخته ساعتها و طلعت المرتين عليه و ناس كانت موجودة شاركت معايا .غير الزحمة و الأكل اللى بيتأخر و طلب الحاجة كذا مرة على ما تيجى و جودة مش قد كدة

بعد كدة بطلت آكل برة فى رمضان

**kazamodia** · 02-07-2015 12:20 PM

انا بصراحة مش مقتنع ابدا بالفطار بره البيت في رمضان

**unl0veable** · 15-07-2015 07:05 AM

المشاركة الأصلية كتبت بواسطة kazamodia

انا بصراحة مش مقتنع ابدا بالفطار بره البيت في رمضان

**M.Elwan** · 16-07-2015 01:02 AM

Casino ١ ش النيل
روحت الساعه ٦ وجابنا ترابيزه علي النيل من غير حجز رغم ان المكان زحمه
بوفيه مفتوح بس الموضوع سهل جدا وتنظيم البوفيه هايل والاكل مستواه جيد ومتنوع
وجربناه سحور كان رائع ونزلنا علي السحور حواوشي رغم انه مش وقته بس جامد جدا مينفعش يتفوت
اسعاره : فطار ١٤٠
سحور : ٦٥

وجربنا قويدر في الرحاب city square
وصلنا الساعه ٦ ونص بدون حجز وجابلنا ترابيززه في موقع كويس
طلبنا الاكل ٧ الا تلت ونزل الاكل قبل الفطار ب٥ دقايق ورغم انه اتعمل بسرعه غريبة بس كان فعلا اكل جيدا جيدا
بوفيه مفتوح للمقبلات والسلاطات والعصاير والحلو والشوربه فقط
الطبق الرئيسي يتم اختياره من المنيو بسعر اضافي
البوفيه المفتوح : ٥٠ جنيه
الطبق الرئيسي : حسب طلبك يتراوح من ٤٠-٦٠