مازدا 3 الجديدة عجباني بس قلقان جدا

**Mostafa Bedo** · 30-06-2015 08:24 AM

السلام عليكم.كنا معدين بالصدفة من قدام اباظة اوتو تريد اللي الداون تاون ودخلنا انا ووالدي واخويا الكبير واتفرجنا ع العربيات لاننا ناويين ان شاء الله نغير العربية بفئة اعلي فاثناء التجول ف المعرض شوفنا المازدا 3 ال 2015 طبعا شكل خارجي وداخلي خرافة وخامات مفيش بعدها وسعرها 210 الف اعلي فئة وفيها كماليات كتير وياباني بس الحلو ميكملش طبعا قبل اما نقدم علي اي خطوة دخلت ع المنتدي واكتشفت ان الموتور ضعيف وسحبها وحش بس هل يا تري هو ده هيأثر جامد علي قرار الشراء خصوصا ان والدي ولا انا بنحب الجري بس معلش استحملوني هل سحبها زي الدايو نوبيرا 2007 مثلا ولا ايه :) وانا عارف انها مفهاش esp طبعا والدي مستني ردي اللي هيكون ردكم مش عارف بقي طبعا هي حاجة والدايو حاجة بس انا خايف من نقطة السحب وناس بتقول الموتور بيجعر ومش حلو ومخنةق وللاسف والدي مش حابب الكورولا خاصة التابلوة بتاعها مش عارف ليه هي مسألة اذواق. وصحيح شفت البيجو 2008 موديل 2016 ب 195 الف وشفت فيها شاشة كبيرة من جوة وكدة بس دي 2015 كانت اعلي فئة ارخص من كدة.نرجع بقي لموضوهنا الاساسي ايه رأيكم ف المازدا ومش عاوز حد يرشح عربية تانية..
معلش طولت عليكم بس عربية بالسعر دة مينفعش يكون فيها عيوب جوهرية خصوصا ان الواحد مش ناوي يغير قبل 5 او 6 سنين

**Fawzy.Abdelnour** · 30-06-2015 09:56 AM

بص يا باشا.
انا ان شاء الله انا ناوي اجيبها.
الموتور مش وحش خالص, المشكله ان الفيتيس 4 سرعات.
انا لسه جايب سيات توليدو لمراتى, الفيتيس ال6 سرعات فارق جداً علي السرعه العاليه.
العربيه لسه فالتليين, بس بجيب بيها 110 كم/ساعه و بتكون على 2400 RPM, يعنى مرتاحه علي السرعات.
هو ده الفرق, مش الموتور, لأن باقى العربيات مش الفرق الشاسع يعنى فالموتور, مع العلم انى معرفش دي هتكون علي كام RPM علي نفس السرعه لأنى ماجربتهاش.
موضوع الESP مش فارق معايا قوي عشان دي عربيه جر امامى, و رأيي الشخصى انه بيفيد اكتر فالدفع الخلفى.
عفشتها Multi Link و دي بتدي ثبات حلو جداً.
ماكدبش عليك انا مافكرتش فموضوع الجري بيها لأنى مش هستخدمها فالسفر.
ملحوظه: ربنا يخليلك والدك, انا رأيي من رأيه, ركبت الكورولا الجديده حسيت ان ده تابلوه ميكروباص.
تحياتى

**swimmer25** · 30-06-2015 11:21 AM

لو مبتحبش الجري فعلا يبقى مش هتسمع صوت النعرة لأنها أكيد هتظهر على لفات موتور عالي
للأسف الياريس والكورلا أنعم منها...الياريس كمان أسرع منها ومواتيرهم هادية
عندك كمان السيفيك الهاي لاين وفيها vsa عربية مالهاش حل ومفهاش غلطة

**ENG.MaRk** · 30-06-2015 12:45 PM

مادام انت و السيد الوالد مش بتحبوا الجري يبقي هاتها طبعاً لأنها عربية محترمة و كمالياتها ممتازة و كقيمة مقابل سعر حلوة بس خلي بالك هتتضايق لما تلاقي نفسك مش عارف تشد مع لوجان أو بروتون Gen 2 و هم أرخص ب 80000 علي الأقل ... قلبها في دماغك كويس و ممكن تاخدلك بصة سريعة علي فوكاس أو أسترا لأن الفوكاس الجديدة بقت عربية تحفة شكلاً و مضموناً و أعلي فئة سيدان ب 206 يعني هتوفر كمان فلوس مقابل امكانيات أحسن و ربنا يوفقك لما فيه الخير إن شاء الله :)

**Mostafa Bedo** · 30-06-2015 06:29 PM

المشاركة الأصلية كتبت بواسطة نسر عربي

المازدا حتبقى خفيفة على السرعات العالية جدا و مفيهاش esp او asr والا 12 ايرباج و الا تقنية متقدمة عموما ، لو بتحب الجري و عايز تجرب سواقة الفيراري و عايز عربية محترمة جدا وفر فلوسك و هاتلك الفا روميو 156 موديل 2003 فما فوق مستعملة و حتدعيلي (من 85 ل 95 للحالات النضيفة). بدل ما تنفع الوكيل 30 او 40% من تمن السيارة على الاقل و قيمتها تقع اول ما تركبها.

احنا عاوزين نبعد عن المستعمل خالص

**Mostafa Bedo** · 30-06-2015 07:04 PM

يعني نصرف نظر عنها ونشوف حاجة تانية طيب لو حاجة تانية هتكون ايه احنا عاوزين جاجة شكلها حلو بعيدا ع الكرولا وال 2016 ف المازدا هتنزل بنفس المواصفات دي ولا فيه امل تتغير ؟؟

**mhkorayem** · 30-06-2015 07:26 PM

المشاركة الأصلية كتبت بواسطة mostafa bedo

يعني نصرف نظر عنها ونشوف حاجة تانية طيب لو حاجة تانية هتكون ايه احنا عاوزين جاجة شكلها حلو بعيدا ع الكرولا وال 2016 ف المازدا هتنزل بنفس المواصفات دي ولا فيه امل تتغير ؟؟

لو عجباكم المازدا 3 ومش هتبيعوها بعد فتره صغيره توكلوا على الله العربيه محترمه جداً وموضوع السحب ده مش هيفرق معاكم طالما استخدام عادي ومش غاويين شد وجري وكلام من ده
بس لو بتفكر في اقتراحات تانيه فأعتقد ان الهوندا السيفيك تستاهل تبصوا عليها بصه قبل الشراء

**Anaslbda** · 30-06-2015 07:29 PM

المشاركة الأصلية كتبت بواسطة نسر عربي

المازدا حتبقى خفيفة على السرعات العالية جدا و مفيهاش esp او asr والا 12 ايرباج و الا تقنية متقدمة عموما ، لو بتحب الجري و عايز تجرب سواقة الفيراري و عايز عربية محترمة جدا وفر فلوسك و هاتلك الفا روميو 156 موديل 2003 فما فوق مستعملة و حتدعيلي (من 85 ل 95 للحالات النضيفة). بدل ما تنفع الوكيل 30 او 40% من تمن السيارة على الاقل و قيمتها تقع اول ما تركبها.

ده عفواً هيدعي عليك مش ليك.
اجيب عربية اخبطها تاني يوم تبقى متصلّحه ولا اجيب عربية لما يحصلها حاجه افضل حاطط ايدي على خدي جنبها بالأسابيع ويمكن شهور.
السوق المصري ليه اعتبارات تانية, انا مش في اوروبا عشان اجيب الحاجات الانتيكة دي.