السلام عليكم
اشتريت سيفيا 2001 مانيوال 1500 سي سي استعمال خفيف، كشفت عليها في مركز صيانة قبل ما أشتريها قالولي تمام باستثناء علبة الشكمان الوسطانية ممكن تحتاج تغيير فيما بعد لو سحب العربية كتم معاك، تاني حاجة كفاءة الأسطوانة والدسك بتوعها تقريبا 70 % فقالولي امشي بيها سنة كدة وبعدين غيرهم، المهم أنا عملت الصيانة الشاملة للعربية (تغيير سيور وفلاتر وزيوت وبوجيهات) ولكن أنا لاحظت:
(1) العربية سحبها مش حلو وبتحتاج إني أقرص عليها في الغيارات عشان تديني التسارع المطلوب، ولما بمشي على الطرق السريعة بلاقي إنها ماشية على عزم عالي شوية للموتور، بمعنى إني عشان أمشي على سرعة 90 كم/ساعة بلاقي عداد لفات الموتور أكتر من 2.5 يعني مثلاُ 2700 لفة/دقيقة وعشان أمشي على سرعة 100 كم/ساعة عداد لفات الموتور بيقرب من 3000 لفة/دقيقة .. بيتهيألي كدة كتير؟ عايز أعرف من مالكي السيفيا الأرقام دي كام بالنسبالكم.
(2) ثبات العربية على السرعات العالية مش حلو لما بتكون في حتة مش مظبوطة في الطريق وبحس إن العربية بتعوم لما باكل مطب صغير على سرعة عالية، مع إن المفروض إن السيفيا عربية حجمها كبير وواطية على الأرض والمفروض ثباتها يكون أحسن من كدة .. تفتكروا ممكن ده يكون من إيه.
(3) معدل استهلاكها للبنزين جوة البلد 10 كم / لتر تقريباً وفي السفر من غيير تكييف 12.5 كم/لتر .. كدة كويس ولاايه؟
شكراً وفي انتظار ردودكم .