سلسلة فضايح و سلبيات توكيل بيجو مصر

**mahmed0100** · 01-07-2015 03:47 PM

مقدمه:

انا مالك عربيه بيجو 301 فئه هاى لاين من شهر يناير 2014 . اتعاملت مع توكيل بيجو كعميل و عندى مجموعه كبيره من المعلومات اللى لازم الناس تعرفها بخصوص تعامل شركه CDCM مع عملاءها من ملاك بيجو 301 علشان اللى بيفكر يشترى العربيه يكون عنده خلفيه عن التوكيل اللى حيتعامل معاه و يعرف ان وجود التوكيل زى عدمه و كل حاجه بالدليل سواء مواقف فرديه او مواقف جماعه من جروب نادى ملاك بيجو 301 على الفيس بوك

فضيحه رقم 1 :

من ضمن اولى التعاملات ليا مع توكيل بيجو غمره قبل صيانه ال 2500 .. سألت المهندس ليه شبكه الاكصدام الاماميه مش ثابته كويس و بتتحرك لجوه من ضغطه صابع خفيفه عليها .. كان الرد .. ده تصميم و مواصفات فرنسا علشان يناسب مصر لو خبطت العربيه او حد بيركن و خبط وش عربيتك فالشبكه تدخل للفراغ اللى وراها و تتفك من الكلبسات من غير تلفيات
بعد كده بدأت اجرى بالعربيه على سرعات 130 و 140 و الشبكه تتفك من ضغط الهوا فرجعت للتوكيل فى صيانه ال 10 الاف
و قام الفنى بتثبيت الشبكه الاماميه بعدد 2 ابزيم بتكلفه 1 جنيه و هنا كان اول اعتراف ان الشبكه فعلا فى البيجو 301 مش ثابته و تم تحميل تكلفه تثبيت الشبكه فى الاكصدام الامامى على العميل حتى لو جنيه :) باستخدام كوليه كما لو انها عربيه فيات موديل 1988

و حرفع لكم صوره الفاتوره طبعا لتاكيد كلامى .. بعد كده عرفنا انا و الملاك نوصل للسيرفس بوكس و استخدامه و دخلنا رقم الشاسيه بتاعنا و اكتشفنا ان فى قطع المفروض تركب ورا شبكه الاكصدام الامامى رقمهم فى صوره السيرفس بوكس 13 و 14 و لما سألنا التوكيل عنهم قال دى بتركب فى اوربا و مش من ضمن المواصفات المصريه
يعنى من ضمن المواصفات المصريه ان الشبكه تقع و تتفك بالشكل ده بمجرد الجرى بسرعه 130 مثلا !!
طبعا كان كلام فيه استهزاء بعقولنا كملاك بيجو 301
و عرفنا ان القطع 13 و 14 عباره عن فيبر مقوى بيركب ورا الشبكه و بيتثبت على الشاسيه علشان يقوى و يثبت شبكه الاكصدام الامامى

و من ضمن الفضايح ان التوكيل المحترم بيبيع القطعه 14 و يركبها فى فرع مرغم فى الاسكندريه و فى مراكز الخدمه باسعار من 600 الى 700 جنيه و فى فواتير بالكلام ده

بعتنا شكوى من 150 مالك لبيجو و كان فى اجتماعات و فاكسات و ايميلات و فى الاخر قالوا حنبعت لفرنسا يقولوا لينا حل فنى ننفذه علشان الشبكه تثبت بعد رفض طبعا حلول ورش تحت السلم من تثبيت الشبكه بكوليهات و المناظر اللي مينفعش تتعمل فى عربيه موديل السنه

و جدير بالذكر ان التوكيل بيراسل فرنسا من شهر مارس 2015 حتى الان و لم نستقبل اى رد منهم بحل للمشكله سوى بيع قطعه الفيبر 14 لتركيبها فى اكصدام من اراد ان يدفع تمنها لمنع سقوط الشبكه و لتدعيم و تثبيت الشبكه الاماميه للسياره بيجو 301

و الى اللقاء فى الفضيحه 2
تحياتى
Muhammed Ahmed

#مطلوب_تغيير_توكيل_بيجو_مصر
#peugeot_change_CDCM_Egypt

**unl0veable** · 01-07-2015 04:25 PM

الله معك وبالتوفيق ان شاء الله

**mahmed0100** · 01-07-2015 04:39 PM

صور اثبات و دليل

**عﻻء سالمان** · 01-07-2015 05:05 PM

من غير ادلة وﻻ اثباتات انا عارف بيجو بتعمل اية مش مصر بس ﻻء فى كل دول الشرق اﻻوسط حماية المستهلك فى فرنسا بنتحترم شكوى المواطنين الفرنسيين والغربيين عموما داخل فرنسا او خارجها الفرنسيين والغربيين عن تجربة ممكن يغيرولهم العربيات المعيوبة بعربيات جديدة لكن مع العرب ودن من طين وودن من عجين التوكيﻻت مبتستهبلش وتضيع سمعتها بمزاجها التقاعس واﻻمباﻻة جاى من المصنع الفرنسى الى دخل نفسة فى منافسات هو مش قدها.

**mahmed0100** · 01-07-2015 05:18 PM

صور اثبات و دليل

**khaled_yehya** · 02-07-2015 09:58 AM

متابع معاك

**mahmed0100** · 02-07-2015 12:53 PM

فضيحه رقم 2

بعد ما شوفنا فى الفضيحه رقم 1 اننا كملاك عرفنا سر وجود قطع ناقصه فى العربيه بيجو 301 من خلال السيرفس بوكس و كنا كعملاء عملنا شكوى جماعيه من 150 مالك بيجو 301 و بعتنا بياناتنا للتوكيل و قلنا ليهم عايزين حل للشبكه اللى بتقع
قام التوكيل المحترم جدا بالاتصال بالعملاء مش علشان يحل مشاكل.. لاء علشان يجمع الايميلات بحجه ان بيجو فرنسا عايزه تتواصل مباشره مع العملاء و تم تجميع الايميلات و الغاء اشتراكنا فى السيرفس بوكس و حاليا لا يوجد اوبشن تسجيل جديد على موقع السيرفس بوكس و فى صور للكلام ده علشان تكون دليل طبعا

و اعترف مدير محترم فى التوكيل المحترم بالي حصل و قال نصا ( انتم بتستخدموه غلط ) .. ده لاننا استخدمنا السيرفس بوكس للاستشهاد بان مكونات الاكصدام ناقصها قطعه 13 و 14 و اللى بالفعل لما دخلنا رقم الشاسيه بتاعنا علي السيرفس بوكس كانت القطعه موجوده فى العربيات بتاعتنا

و محدش يسالنى القطعه راحت فين لان كل ملاك بيجو 301 استلموا العربيه من غيرها و التوكيل بيبيعها فى مراكز الخدمه المعتمده و فى فرع مرغم زى ما شفنا من الفاتوره السابقه و اللى وصل تمن القطعه 14 حاليا اكتر من 600 جنيه

ملحوظه : السيرفس بوكس موقع خاص ببيجو تقدر منه تعرف كل حاجه عن عربيتك و تشوف اكسسوارات و مكونات عربيتك البيجو متاح للمتخصصين و كان متاح public قبل كده

و الى اللقاء فى الفضيحه 3
تحياتى
Muhammed Ahmed

#مطلوب_تغيير_توكيل_بيجو_مصر
#peugeot_change_CDCM_Egypt

صور اثبات و دليل

**mahmed0100** · 02-07-2015 07:10 PM

فضيحه رقم 3

ترررن ترررن .. yes ..
انا : الو مين !؟
رقم : مين ايه يا تييييت انت فين
انا :معلش مين معايا
رقم : انا فلان يا تييييت انت مسحت رقمى كمان
انا : حبيب قلبي هههه مقدرش امسح رقمك بس الموبايل فى الشنطه و انا سايق و العربيه بتظهر ارقام بس مش بتظهر الاسم

ده موقف عادى جدا بيحصل كتير و انا سايق البيجو 301 هاى لاين موديل 2014 و رابط الموبايل بالبلوتوث علشان لما تجيلي مكالمه مخدش مخالفه موبايل اثناء القياده .. موبايلي باللغه الانجليزيه و مسجل الاسماء عليه انجليزى و لغه العربيه انجليزي و مع ذلك بيظهر رقم تليفون المتصل فقط و مش بيظهر اسمه اللى متسجل على الموبايل

استخدمت فتره اى فون
soft ver. 7.1
كانت الاسامى بتظهر و ممكن لو س اتصل و بعده ص يظهر اسم س تانى بدل ص

حاليا مع اى فون Iphone 5S
Soft ver 8.3 and ver 8.4
البلوتوث كله مش بيربط لو دورت العربيه و الموبايل مش شغال عليه البلوتوث و تحتاج تبطل العربيه و تشغلها تانى و البلوتوث شغال على الموبايل علشان يعمل connection.

قبلها و مازال معايا 8.1 Nokia windows phone
عادى جدا اكون مسجل رقمك و رابط الموبايل بالعربيه و انت تتصل بيا و يظهر رقمك مش اسمك و علشان يظهر اسمك لازم تتصل 5 مرات مثلا ورا بعض

قبلهم HTC one X
Android jelly bean تقريبا
مفيش اصلا اسم بيطلع غير لو انا اتصلت بيه من العربيه مش من الموبايل كمان
و لو انت اتصلت بيا يظهر رقمك فقط

دى الموبايلات بتاعتى على مدى سنه فاتت
و نفس الشكوى من كل ملاك بيجو 301 هاى لاين من 2014 لحد وقت كتابه الرد ده فى يونيو 2015

مره الاسم يظهر و مره لاء حسب مزاج كاست العربيه

الملخص فى مشكله فى البلوتوث فى البيجو 301 و التوكيل مش عارف يحلها من سنتين. سنتين و التوكيل بيراسل فرنسا لحل مشكله قد تكون سوفت وير و قد تكون جزء البلوتوث فى العربيه مش متوافق مع اى حاجه .

سنتييييين ده لو بتراسلوا بيجو فرنسا بالحمام الزاجل كانوا بعتوا ليكم الحل لكن CDCM توكيل فاشل.

دى فضايح صغيره كده .. انتظروا الفضايح الكبيره Coming Soon

و الى اللقاء فى الفضيحه 4

تحياتى
Muhammed Ahmed

#مطلوب_تغيير_توكيل_بيجو_مصر
Peugeot_change_CDCM_Egypt#

**HAITHAM1985** · 02-07-2015 09:46 PM

حلو فيلم البحث عن فضييييييييحة ده ........... إحنا فى مصر غلطنا إن إحنا ركبنا عربياااااااات أساسا

**volociximab** · 02-07-2015 11:55 PM

المشاركة الأصلية كتبت بواسطة عﻻء سالمان

من غير ادلة وﻻ اثباتات انا عارف بيجو بتعمل اية مش مصر بس ﻻء فى كل دول الشرق اﻻوسط حماية المستهلك فى فرنسا بنتحترم شكوى المواطنين الفرنسيين والغربيين عموما داخل فرنسا او خارجها الفرنسيين والغربيين عن تجربة ممكن يغيرولهم العربيات المعيوبة بعربيات جديدة لكن مع العرب ودن من طين وودن من عجين التوكيﻻت مبتستهبلش وتضيع سمعتها بمزاجها التقاعس واﻻمباﻻة جاى من المصنع الفرنسى الى دخل نفسة فى منافسات هو مش قدها.

اصلا الفرنسي و الاوروبى مبيركبش العربيه دى من اساسه
بيبصنعوهالنا احنا بس و يرموهالنا
خبطت فى حيطة محدش يحاسبهم
ليك مشكله اخبط راسك فى الحيط
عيب صناعه مفيش رقابة ستؤذيهم
يعنى من الاخر لو عربية زى دى تستحق تمشى فى شوارع امريكا او اوروبا كانوا نزلوها
لكنهم خايفين لانه لو حصلت مشكله الاسد الفرنسي هيركب على حمار بالمقلوب و يزفوه فى الشارع مثل تويوتا فى امريكا

لا يزال الظن السيء بهذه السياره حتى يركبها الامريكى و الاوروبى مثل العربي و التركى