فرش السيارة التفصيل و الجاهز ( مميزات و عيوب كلا منهما)
تركيب فرش للسيارة تفصيل ام كسوة جاهزة ؟؟
الموضوع ده حبيت اتكلم فيه نظرا لقلة خبرة نسبة كبيرة من الناس بالموضوع ده طبعا اول حاجة الناس بيفكروا فيها انهم يركبوا فرش يروحوا لاي محل يشتروا الكسوة الجاهزة و يركبوا و اللي اسعارها بتتراوح من 250 - 650 ج
بس اللي محدش يعرفه ان الكسوة ديه بتعجبك شكلا لكن هتندم في المستقبل بعد كده لأنها بتؤدي ان الفرش الاصلي يبوظ و الكراسي تهبط لأنها غير محكمة ع عكس الفرش التفصيل و هو اللي بتختار الخامة و الالوان اللي انت عايزها و تداخلها و بتكون ع اد الكرسي بالظبط و محكمة و بناءا عليه بتحافظ ع الفرش و يعيش معاك سنين كأنه جديد بس يعيبه سعره العالي و ممكن نخلص الكلام في النقط الآتية :
1 - الفرش الجاهز :
مميزات : رخيص - سريع التركيب - اسهل في الاختيار من خلال التشكيلة قدامك
عيوب : خامته اغلبها تعبانة - مفيش فرصة قدامك تختار اللي انت عايزه و محدد بالالوان اللي قدامك - غير محكم بسبب اختلاف المقاس و ده بيؤدي ان الكراسي تهبط مع الوقت
2- الفرش التفصيل :
مميزات : بتختار الخامات و الالوان اللي انت عايزها جلد او قماش او الاتنين معا و نوعيته - بتختار التفصيل و النقشة و خياطة دبل و لا عادية - بيكون محكم و يحافظ ع الفرش الاصلي للعربية
عيوب : غالي شوية - بيحتاج وقت عشان يركب
تجربتي الشخصية اني من سنين بركب فرش تفصيل و اختار الخامات و فيه خامات جلد مبتتأثرش بالشمس بسهولة و كانت مريحة فعلا و كل عربية بعتها كان المشتري مبهور و فرحان و مش مصدق ان العربية ديه بقالها سنين و فرشها بالشكل ده و بعضهم كان بيفتكر ان ده الفرش الاصلي ليها و الفرش الاصلي تحتها زي مهو
من رأيي الشخصي يا تركب فرش تفصيل يا تخليك بالفرش الاصلي احسن بدل العك الجاهز حتي لو هيدوني فرش جاهز ببلاش هرميه و مش هركبه
و الاهم من ده لما تركب فرش زي ده تجيب عبوة منظف جلد او فرش دايما تكون معاك عشان لو فيه اي حاجة تلحقها و عبوة ملمع و مرطب للجلد عشان يفضل بلمعانه و ملمسه الجديد و العبوتين سعرهم رخيص و يعيشوا معاك انا معايا عبوتين لحد دلوقتي بقالهم يجي 5 سنين و خلاص هرميهم عشان الصلاحية
https://encrypted-tbn1.gstatic.com/i...tFvduhx941c7NI
