الموضوع: عربيه على ادي ب١٠٠٠٠ج، ليه الناس بتعتبرها نكته؟!

بعتذر طبعا على العنوان بس حقيقي الناس بقت غريبه، كل ما اقول لحد عاوز عربيه ضروري لشغلي وممعيش الا المبلغ ده يا يضحك، يا يقوللي يا عم هات لانسر !! يا يقول هاتلك ١٢٨ وشكرا على كده ..
كأن مفيش حد راكب عربيات الا الناس اللي معاها فلوس ، المهم، انا هنا بسأل ومعرفش اي شئ عن العربيات ولا حتى بعرف اسوق لسه ، ومشكلتي كالآتي :
انا عندي محل زي مكتبة وبيع اجهزة كمبيوتر وكده المهم بضاعتي مش تقيله ولا كتير فمحتاج عربيه هاتشباك لأن ليا ظروف هشرحها لو حد تكرم وقرا الموضوع وقرر يفيدني .
المبلغ : ١٠٠٠٠
الظروف :
- بيتي على الطريق وتحت مني محل والمدخل ضيق فمش عاوز عربيه تزنقني في ركنها " حجمها يكون مش كبير "
- قطع الغيار رخيصه لأن دخلي محدود ومرتبط بالتزامات كتير ومعنديش استعداد اروح اجيب فانوس مثلا الاقيه ب ٥٠٠ج
- انا من قريه جمب ميت غمر، واغلب مشاويري في ميت غمر ودي اسوأ مدينة على مستوى العالم من حيث الطرق المتكسره والزحمه، فمش عربيه تيجي حتتين لما تاخد مطب. وده سبب رفضي لل١٢٨ لأن بحس انها ضعيفه كده وهشه وبتتهز وهي ماشيه بالعرض !!
- انا مش هسافر بالعربيه لكن لا يمكن اشتري عربيه لو طقت ف دماغي اروح اسكندريه متودنيش.

- انا عندي موتوسيكل بجيب عليه بضاعتي، لكن طبعا بضيع وقت كتير في تربيط البضاعه عليه وفكها تاني كل ما اقف عند تاجر معين ، يعني على ما بشتري البضاعه واربطها كلها بكون اتهلكت، ده غير منظري كل ما اقف في حته بالتراب والعرق وشعري اللي واقف وبحس كده بشكلي مبهدل اوي وبحس باحراج (ده من اسبابي اني عاوز اشتري عربيه دلوقتي، لأني عارف اني كل ما اصبر المبلغ يزيد واجيب حاجه احسن، بس انا مش قادر على بهدلة الموتوسيكل)

-كمان فيه موقف حصللي مع شاب اي كلام كده من الناس اللي اهاليها بتعملها كل حاجه وفرحانه بشبابها، عرض يوصلني
بضاعه من القاهره، ولما استنيته حسب الميعاد وشافني ، جيت بركب لقيته بيعاملني وحش واتحجج انه مش مسافر (مع انه قاللي قبلها ان ده ميعاد شغله) وبعد ما ركبت الاجره لقيته معدي بسرعه !! قطعت علاقتي بيه طبعا ومن ساعتها وانا مخنوق جدا الحقيقه.
- اخر حاجه ودي مهمه جدا، الطريق فعلا بئا مليان بهايم بجد، تكاتك بيسوقوها عيال صغيره، وعربيات اجره بتطوح بالناس اللي فيها، ومره عيل كده فرفور خلاني كاشي بالموتوسيكل وكسر عليا كنت هموت وفضلت اشتم واسب لاني بجد عصبي ومش بطيق البني آدم لما بيبقى بارد .. الخلاصه ، انا هبيع الموتوسيكل وهسيب لنفسي فتره لحد اول الشتا الجاي، باعتبار ان مساوؤه اكتر في الشتا فمش هبيعه قبل شهر مارس الجاي.

- بصوا يا جماعه، انا كحد مبيفهمش في المجال ده هقولكم ايه اللي حسيت انه ينفعني ، وانتوا احكموا ودلوني، شوفت فيات ١٢٧ وخدت فكره عن يعني ايه العربيه على شاسيه او علب ففضلتها على ال ١٢٨ لكن فرق العزم مش عارف اهم واللا لأ باعتبار انها ٩٠٠cc وال١٢٨ ١٣٠٠cc .

-كمان عجبتني اللادا النيفا، عربيه قويه وجسمها يحميني من الصيع بتوع التكاتك ولو حد خبط فيا هو الخسران. ومش مهم تقل الدريكسيون يعني انا بعتبر حياتي اصلا عقاب الهي بكمالة العذاب.

-والبيجو 205 بس.تقريبا اغلى شويه وقطع غيار بردو غاليه.

فيه حاجات بكرهها زي ١٣١، ١٣٢ فيات معرفش ليه مش برتاح لهم.

- فيه عربيه بردوا اكتشفت ان سعرها اصلا رخيص فممكن اجيب موديل مش قديم اوي بالمبلغ ده وهي اللدا الاوكا، بس غلو قطع غيارها وصيانتها خوفني منها، كمان هي ٧٥٠cc وده اقل عزم شوفته لعربيه، اكيد وحش.

- شوفوا ، هو الواحد يعني لو جاب عربيه حالتها كويسه وحجمها صغير وركبلها انذار وسنتر لوك وزجاج كهربا وب١٠٠٠٠يبقى بيقول نكته؟!
)