السلام عليكم ورحمة الله وبركاته
انا باعتذر من البدايه عن طول الموضوع والتكلم بإسهاب
لكن للأسف انا مجبر
انا دلوقتى بعانى معاناه شديده فى وظيفتى الحاليه
الموضوع بمنتهى البساطه انى شايل شغل مهوووول بمعنى الكلمه و مرتبى صغير بالمقارنه بنتائج شغلى
الاول كنت فاكر نفسى مغرور وعايش فى الوهم - لكن بعد فتره اتأكد انى من اكتر الناس اللى شايله الشركه وبدون تقدير وزى زى غيرى - الكلام ده بشهادة موظفين كتير فى شركتى
ومع ذلك انا بحب شركتى جدا لكن من الواضح انى خلاص مش هاينفع انى اكمل خصوصا بعد ما اتكلمت مع مديرى عن زيادة محترمه وساعتها اخد الموضوع بتهريج وقال لى فيما معناه انه مش فاضيلى
عارف ان الموضوع ممكن يبان دردشه بس انا فعلا فاض بيه تماما
طيب ايه المطلوب
انا وصف وظيفتى معقد جدااااااااااا لدرجة انهم عندى فى الشركه مش عارفين انا المفروض اكون أيه - بصراحه انا كمان مش عارف انا وظيفتى ايه
عايز حد خبير يفيدنى اعمل ايه ويساعدنى انى اكتب ال CV بتاعتى
بالمناسبه انا بكتب لكل اصحابى الCVs بتاعتهم لكن مش عارف اكتب ال CV بتاعتى - نبدأ بسم الله الرحمن الرحيم ويا ريت حد يساعدنى
انا مواليد 1978 - خريج سنة 2000 من كلية تجاره وديه خبراتى
كل الوظايف اللى اشتغلتها ملهاش اى علاقة بالوسايط او المحسوبيه
من سنة 1996 ولغاية سنة 1999 كنت شغال فى مجال المقاولات كمحاسب صغير وملاحظ عمال و بخلص اوراق وما شابه - من الاخر كنت بجيب مصاريفى ايام الدراسه
من سنة 1999 - الى 2000 اشتغلت مراجع حسابات فى مكتب محاسب قانونى وساعتها اكتشفت انى عمرى ما هاكون محاسب مع العلم انى كنت محاسب نابغه بشهادة المراجعيين اللى كنت شغال معاهم
نبدأ نركز من أول دلوقتى لأن من أول شهر 8 سنة 2000 بدأ العك
من سنة 2000 وحتى سنة 2003 اشتغلت فى شركة برمجيات Software house
الشركه ديه كانت بتبنى سوفت وير مالى وكانوا محتاجين software tester يكون شاطر فى الحسابات وفى نفس الوقت يكون شاطر فى الكمبيوتر والحمد لله ربنا كرمنى واتقبلت فى الشغلانه ديه - ساعتها حصلت ظروف فى الشركه وبدل ما اشتغل مجرب برامج اشتغلت technical support representative او مسئول دعم فنى ووظفتى ساعتها كانت خليط ما بين الدعم الفنى والتدريب وتشغيل الانظمه عند العملاء implementation
بعد شويه لاقيت نفسى بروح للعملاء واعرف ايه مشاكلهم واعمل تحليل على مشاكل العملاء ومتطلبتهم وبقيت ساعتها software analyst
يعنى انا بقيت software tester ,software technical support, system implementer & software analyst
مستنى اول واحد يقول لى انى عايش فى دور السوبر مان - صدقنى ده حصل لكن بشكل مزيف - يعنى ايه
انا اعرف حاجه عن كل حاجه - لكن مش محترف فى مكان واحد وعارف عنه كل حاجه
بمعنى انا اشتغلت على Oracle, SQL, Access databases واعرف اتعامل معاهم لكن انا مش محترف ولا حاجه فيهم
اشتغلت على برامج حسابية . حضور وانصراف . مرتبات . برامج سنترالات. برامج بتتحكم فى موانئ . برامج نقاط بيع ومع ذلك مش محترف فى اى حاجه من اللى فات
خلصت المرحله الاولى من العك وبدأت المرحله الاكثر تعقيدا اللى انا عايش فيها من سنة 2003 وحتى الان
شركتى الحاليه كانوا شاريين برنامج نقاط بيع مبنى على قاعدة بيانات اوركل Point of sale system - Oracle database ودفعوا فيه دم قلبهم واكتشفوا فجأه انهم مش عارفيين يشغلوه وساعتها انا كنت الساحر بالنسبه لهم
طبعا البرنامج اشتغل والدنيا بقت ممتازه وبصراحه انا استغليت كل اللى عندى وطورت لهم الدنيا بشكل كل الشركه بتحلف بيه لغاية وقتنا هذا
اكمل كلامى بأنى أول لما اشتغلت فى شركتى بقيت Database Administrator - ساعتها لاقوا انى شاطر شويه فى الشبكات وبدأت انى اظبط الشبكات الخاصه بالاداره الرئيسيه اللى انا شغال فيها بالاضافه الى 8 فروع
بعد كده راحوا مزودين عليه شغل خاص ببرامج بتنزل عند العملاء بتوعى - البرامج ديه بتيجى من اليابان واروبا - وانا كنت شاطر جدا فى تدريب العملاء على البرامج ديه لدرجة انى لاقيت ثغرات ومشاكل فى برامج جايه لنا من السويد وانا اللى عدلت عليهم back doors & bugs
شويه بدأت تظهر مشاكل محاسبيه كتيييييييييييييييره جدا فى الفروع وبدون ذكر اسم شركتى احنا عاملين زى راديو شاك وموبيل شوب كده
ساعتها اشتغلت لمدة 3 شهور من غير ما اعرف اى حد من ادارة الحسابات وعملت تحليل كامل لكل نقاط الضعف والمميزات والعيوب الموجوده فى ادارة الحسابات وازاى نظبط الدنيا وطبعا اتقابل اللى انا عملته ده بهجوم شديد جدا من ادارة الحسابات لكن فى النهايه - هما شغالين دلوقتى باللى انا قلته
تطور الموضوع انهم بدأو يجيبوا لى حاجات هما ميعرفوش عنها اى حاجه وانا مطالب انى اذاكرها وابدأ افهم الناس ايه المميزات والعيوب وايه النقط اللى مندوبين المبيعات يركزوا عليها مع العملاء
اكتشفوا انى شاطر شويه فى انى اعمل اتفاقات للمشتريات بتاعتنا خصوصا بعد تجارب عديده نتج عنها توفير للشركه ارقام خرافيه مقابل مجهود انا بعمله وبشغل الناس اللى معايه فيه - اخرها مشروع كان هايتكلف فى حدود 450.000 جنيه - انا عملته بما يوازى 95.000
الشركه بدأت انشطه جديده ومنتجات جديده مبنيه على ال أندرويد وطبعا انا كان ليه نصيب الاسد فى العكه ديه
وكل اللى فات يتطلب من انى اذاكر وافكر وابدع واشتغل بأيدى وأشغل ناس تحتى واراجع على شغل الكل واى حاجه اتزنق لازم اتعلمها
نسيت اقول انى presenter وبعمل تقريبا كل ال presentations اللى بتتعمل فى الشركه سواء انا اللى بعملها او اى حد غيرى
فيه كلمه دايما بتتقال - اى حاجه محدش عارف عنها حاجه - ادوها لمحمد صبحى
اى حاجه جديده - احدفوها لمحمد صبحى لغاية لما نفهم الدنيا فيها ايه - اوقات بقول انى Super user وهيه ديه وظيفتى اذا كان فيه وظيفه بالمسمى ده اصلا
اللغات اللى معايا انجليزى بس
we can say very good reading, speaking & writing
ط
طبعا انا تقريبا مش من حقى انى اخد اجازات - اخر مره اخدت اجازه سنويه كانت ايام ثورة يناير
والله انا حاسس ان مفيش حد هايقرأ الرغى ده كله
ما علينا
عايز حد يقول لىانا اكتب CV ازاى
ايه هيه الاماكن اللى ممكن أقدم فيها
انا شايف اللى ممكن اروح لهم توشيبا العربى - سامسونج - رايه - اى حاجه شبه الشركات ديه
السؤال فى رأيكم خصوصا لو معانا HR شاطر وحد شغال فى مجال ال IT فى رأيكم انا المفروض يبقى مرتبى كااااااااااااااام
احد الاسباب الرئيسيه اللى مشجعانى جدا انى اسيب الشركه انى اكتشفت ان ناس بتشتغل 30% من شغلى ومرتبتهم زى مرتبى بالظبط
وطبعا احد احلامى انى اسيب مصر نهائيا وبرضو مش عارف اروح فين ولا اعمل ايه
يا رب حد يرد
المفضلات