السلام عليكم
أنا مدخل أولادي مدرسة النزهة للغات على طريق مصر الإسماعيلية من 3 سنين وكان وقتها المصروفات شاملة الباص 8000 جنيه تقريبا للطفل الواحد وفوجئنا إنهم كل سنة بيزودوا المصروفات بشكل بشع لحد ما وصلت السنة دي ل15 ألف جنيه !!!!!
طبعا الموضوع مرهق جدا عليا خاصة إن عندي طفلين والتالت هيدخل كمان سنتين إن شاء الله وبالوضع ده هلاقي نفسي مطالب بدفع 60 ألف جنيه للـ 3 سنويا يعني 5000 جنيه شهريا بند مدارس فقط (ده غير الدروس والإيجار والفواتير والأكل والشرب والعلاج والملابس ومصاريف العربية ... إلخ) وده معناه إني لازم أشتغل حرامي أو نصاب علشان أقدر أوفر المبلغ ده في ظل تدهور الأوضاع المادية مع الجميع
دلوقتي بفكر جديا إني أحولهم مدرسة تانية أرخص بس في عدة عوائق وهما عارفين إن أي حد هيفكر تفكيري ده هتقابله العوائق دي فبيزودوا وهما مطمئنين وعارفين إن الناس هترضى بالأمر الواقع أو حتى اللي هيجازف هيلاقوا بدل منه 10 وهما قالوها صراحة قبل كده
من ضمن العوائق إن المدرسة ميزتها إنها بتهتم بالتربية والأخلاق مع إنها مش أزهرية أو إسلامية صراحة لكن في فصل بين البنين والبنات ومفيش مدرسة أو مشرفة سايبة شعرها أو لابسة لبس مش محترم وبيهتموا بالقرآن والأخلاق والآداب العامة ودي الميزة الوحيدة تقريبا اللي كانت مخليانا متمسكين بالمدرسة على الرغم من إن مستواها التعليمي مش اللي هو
لكن مع الأسعار دي كده بقى أمامي اختيارات كتير لمدارس تانية بعد أن فقدت المدرسة أكبر ميزة لها وهي المصروفات المعقولة لكن كده بدأت تدخل في شرائح أعلى والمنافسين اللي في نفس الشريحة بقوا أكتر
عارف إن كل المدارس بتزود لكن مفيش مدرسة حسب علمي زودت بالمنظر ده دول تقريبا ضاعفوا المصروفات خلال 3 سنين بس !
طبعا محدش يقولي قدم شكوى وارفع قضية وروح للوزير والكلام ده لأن كل ده اتعمل السنة اللي فاتت ويبدو من خلال إصرار المدرسة على الزيادة بقلب جامد إنهم مظبطين أمورهم كويس جدا حتى بيقولوا إنهم رفعوا قضية على الوزارة لما طلعت قرار تحديد المصروفات العام الماضي وكسبوها !! ودلوقتي من كام يوم كان في اجتماع بين أصحاب المدارس الخاصة وبين الوزير وطلعوا من الاجتماع إن الوزير أوصاهم بالتبرع للمدارس الحكومية ! يعني بدل ما الحكومة هي اللي تصرف على المدارس الحكومية لأ دي بتحمل أصحاب المدارس الخاصة المسئولية دي واللي بالتالي اللي هيتحملها فعليا أولياء الأمور يعني من الآخر احنا اللي هنصرف على الحكومة وعلى مدارسها !!
الخلاصة إني دلوقتي عايز بديل للمدرسة دي يكون سعره معقول وفي تربية وأخلاق ومستوى تعليمي كويس ويكون قريب من العبور أو الشروق أو طريق مصر الإسماعيلية الصحراوي أو حتى التجمع الخامس
حد عنده خلفية عن حاجة زي كده ؟
المفضلات