تصحيحا لخزعبلات سوق السيارات المصري

مافيش حاجه اسمها العربية ال 99 احسن من ال 2015 ...
مافيش حاجه اسمها ال e36 احسن من ال e46 ..
مافيش حاجه اسمها المرسيدس القديم انضف من الجديد ...
مافيش حاجه اسمها " اصله القديم مكانشي فيه حساسات كتير " ...
و المفروض مافيش حاجه اسمها اشتري عربية ب 100.000 جنيه من 5 سنين و ابعها ب 120.000 ...
اه فيه تضخم و كل حاجه بس فيه حاجه اسمها نسبه و تناسب ...
و مافيش حاجه اسمها البومه انضف من الشارك ...
ماهو يا جدعان المهندسين اللي قاعدين في مراكز التصميمات طلعان عنيهم بيعدلوا من موديل لموديل وواخدين 900 دكتوراه ممكن يتجلطوا مننا لو سمعو الكلمتين دول ...
اي حد ممكن يجيب اي كراش تيست من علي اليوتيوب .. يكتب بس new vs old crash tests ... هتلاقوا الفولفو ال1985 اللي مسمينها دبابه بتتبهدل من اصغر عربية رينو ماتورها 1000 سي سي ...

اه بس فيه حاجه اسمها الكريستاله صيانتها اسهل من القرش في المدن الصغيرة اللي مافيهاش ميكانيكيه متخصصين .. و قطع غيارها ارخص ... و ال بي ام الثيرتي فانوس الاشاره فيها ب 100 جنيه و الاف ثيرتي فانوس الاشاره بتمن عربية فيرنا ...و دا طبيعي .. بس مستحيل تبقي ال اي ثيرتي انضف يعني
و لا الكريستاله انضف من القرش

و مافيش حاجه اسمها العربية راشه نضافه ...

و مفيش حاجه اسمها كسر زيرو عامله 90.000 كيلو ... كسر الزيرو يعني مغيرتشي زيت

و مافيش حاجه اسمها عربية نادرة ... النادرة دي يعني زي الماكلارين اف وان اتعمل منها 40 عربية ... مش بي ام 2002 اتنتج منها 500.000 عربية

و مافيش حاجه اسمها استعمال طبيب و سيده و تبقي زي اوبشن كدا ... عايز عربية نضيفه اشتري استعمال ميكانيكي

و مافيش عربية خلقها ربنا بيعدي عليها 30 سنه بحاله الزيرو الا في جراش فان ديزل

و دا رأي شخصي و اي تشابه بينه و بين الواقع من قبيل الصدفه البحته

تعديل : و مافيش ماركه اسمها اعظم ماركه في العالم و انضف عربيات .. و لا بي ام و لا الهوندا و لا الجولف و لا اللانوس و لا المرسيدس .. فيه حاجه اسمها لو اعتنيت ب 128 هتسترك .. و لو بهدلت بي ام فئه سابعه هتبيعك اللي وراك و اللي قدامك تصليحات و هتكسفك

تعديل تاني : يكفيكو شر الحوادث .. و يكفيكو شر فتحه الاير باج .. و يكفيكو شر شعب بيروح لكهربائي بيفصله الاير باج عشان لو خد خبطه من قدام ما يلبسشي تمن تابلوه جديد .. و يكفيكو شر اللي بيروح لسروجي يشد فرش السقف و يحط حديده يشد عليها القايم فوق ايرباج القايم عشان شكلها يبقي احلي فترشق الحديده دي في صدره لو اتفتحت ... و يكفيكو شر اللي بيفصل ABSعشان بيحس ان العربيه بتتكسر لما بيدوس فرامج جامد فيلاقيها بتدقدق في الارض .

منقول من الفيس بوك مع تعديل بعض الالفاظ :E_braces[1]:

متفق مع الكلام بس فعلا بحس ان العربيات القديمه صاجها انشف من الجديد

كلامي بشكل عام

كلام سليم
لكن هاترجع للمبتداء
هو ان المصريين من الشعوب التعبانه او المنعدمه ماديا
هايلخص لك كل الملاحظات السابقه الذكر
بالتالي يفضل القديم ويرفعه للسماء .
مش حبا وعشقا في القديم
لكن علشان ظروفه التعبانه

ده كلام واقعى وانا متفق معاه ميه فى الميه بدليل ان لو عربيتى اتخربشت او اتجرحت ما عنديش مانع انى ارش الجزء او ارشها كلها

مش صح يبقى يكون صاج العربية تقيل زى الفولفو و لاقدر تعمل حدثة وتروح فيها لكن الصاج الخفيف من عوامل الامان لكن شعبنا كدة

هي طبيعة البلد دي كده عارف لو اتفتح الاستيراد للمستعمل واتلغت الجمارك عليه حتلاقي الناس بتستورد مثلا جولف ٤

اقتباس:

---

المشاركة الأصلية كتبت بواسطة باسم يوسف

متفق مع الكلام بس فعلا بحس ان العربيات القديمه صاجها انشف من الجديد

كلامي بشكل عام

---

هو فعلا انشف واتقل, لكن ده مش معناه انه أأمن
الاتجاه العام دلوقتي للتخفيف واستخدام تصاميم تنقذ حياة الركاب في حالة الحوادث لا قدر الله

اقتباس:

---

المشاركة الأصلية كتبت بواسطة فتح الباب

ده كلام واقعى وانا متفق معاه ميه فى الميه بدليل ان لو عربيتى اتخربشت او اتجرحت ما عنديش مانع انى ارش الجزء او ارشها كلها

---

عربيه متخربشه تم تصليحها بنضافه
افضل مليون مره من عربيه بكل خرابيشها وخبطاتها لمجرد يتقال انها فابريكه

اقتباس:

---

المشاركة الأصلية كتبت بواسطة abdulkhaleq

هو فعلا انشف واتقل, لكن ده مش معناه انه أأمن
الاتجاه العام دلوقتي للتخفيف واستخدام تصاميم تنقذ حياة الركاب في حالة الحوادث لا قدر الله

---

باشا ,الناس في مصر مبتعرفش تسوق , مبتعرفش .فنازلين خبط وتخييش في بعض وقواعد المرور عندهم البوز ومقضيينها سمكره ودهان ولحام في الشاسيهات .فكل تفكيرهم في الصاج .وغلطة شنيعه تشتري عربيه مستعمله.وكييفة تعديل في العربية بجهل .واحد يركب متور 1800 cc مكان متور 1400 .يقلب عربيه من منيوال لاتوماتيك.واحد معدل الانوار بلمض 120 وات عشان يعمي الناس. تيجي تشتري واحده من دول متلاقيش قطع غيار ال VIN مطابقه لاي شئ والعربيه بتتحول لمسخ مكانها تتكبس وتتعدم.

أتفق معاك فى كل جملة
فعلاً تحس ان قواعد السوق عندنا غير أى بلد تانى وكلة بالفهلوة

كله بسبب الفقر
الفقر هو السبب
السبب هو الفقر
بس خلاص

متفق معاك في معظم كلامك .. بس فكرة ان الجديد افضل بالتأكيد من القديم ( بتكلم عن التصميم مش الحالة ) مش صحيح دايما .. و لسه العالم بيفتكر و يمجد موديلات و طرازات لن تنسى في تاريخ السيارات .

اقتباس:

---

المشاركة الأصلية كتبت بواسطة forever.leo

متفق معاك في معظم كلامك .. بس فكرة ان الجديد افضل بالتأكيد من القديم ( بتكلم عن التصميم مش الحالة ) مش صحيح دايما .. و لسه العالم بيفتكر و يمجد موديلات و طرازات لن تنسى في تاريخ السيارات .

---

بص هي كلمة عامه شويه فعلا في طرازات معينه كانت علامه في وقتها (اعتقد ان معظمها مش عندنا هنا)
بس اللي بيحصل اننا بنقول ان القديمه دي لازالت احسن من الجديد
فالكلمه تبقى عالمشاع كده
وطبعا, يبقالها سعر حتى لو بقت علبة صفيح

اصل كل ده حاجتين اول حاجة التجااااااااااااااار . هما اللي ناشرين الافكار دي عسان سوق المستعمل يمشي علي مزاجهم التجااار هما السبب في كل ده . تاني حاجة العربيات الجديدة مليانة مشاكل وعيوب وبلاوي و وزي الزفت . علي سبيل المثال الاوبل استرا و انسيجنا والبلاوي اللي فيهم و زيهم كتيييييير . كل العربية اللي راكبلها dsg و dct و mmt مليانين مشاكل . و عدم قدرة التوكيلات علي صيانة العربيات و محدش بيقهم حاجة فيهم والميكانيكية مش بيطورا نفسهم . بسبب كل ده اصبح العربية القديمة زي الكريستالة والعيون افضل نسبيا لانها عربيات بسيطة مش هتظر فيها مشكله فتيس تكلف 30 الف جنيه و اي ميكانيكي شاطر شوية هيصلحها بقطع غيار سعرها بسيط وخلصت

اقتباس:

---

المشاركة الأصلية كتبت بواسطة ahmed emad has

اصل كل ده حاجتين اول حاجة التجااااااااااااااار . هما اللي ناشرين الافكار دي عسان سوق المستعمل يمشي علي مزاجهم التجااار هما السبب في كل ده . تاني حاجة العربيات الجديدة مليانة مشاكل وعيوب وبلاوي و وزي الزفت . علي سبيل المثال الاوبل استرا و انسيجنا والبلاوي اللي فيهم و زيهم كتيييييير . كل العربية اللي راكبلها dsg و dct و mmt مليانين مشاكل . و عدم قدرة التوكيلات علي صيانة العربيات و محدش بيقهم حاجة فيهم والميكانيكية مش بيطورا نفسهم . بسبب كل ده اصبح العربية القديمة زي الكريستالة والعيون افضل نسبيا لانها عربيات بسيطة مش هتظر فيها مشكله فتيس تكلف 30 الف جنيه و اي ميكانيكي شاطر شوية هيصلحها بقطع غيار سعرها بسيط وخلصت

---

التجار والميكانيكيه فعلا بيطلعوا الكلام ده حقيقي
بالنسبه للجديد
فهو فعلا فيه تكنولوجيا جديده + أمان اكتر + رفاهيه اكتر
وبالتالي سعره عالي

دلوقتي سعر العربيات اللي مافيهاش كل ده بيوصل لاسعار قريبه للي فيه
والسبب انها مافيهاش تكنولوجيا !
انا مش ضد حد عايز يريح دماغه
بس مش لدرجة ان ال 2 يبقوا بنفس السعر

اقتباس:

---

المشاركة الأصلية كتبت بواسطة miam0502788391

كله بسبب الفقر
الفقر هو السبب
السبب هو الفقر
بس خلاص

---

لا الفقر مش السبب ولكن القوانين الغير العادله للدوله هي اللي بتظلم الفقير
يعني لو مثلا الاستيراد مفتوح للمستعمل ومفيش جمارك او رسوم علي السيارات حتلاقي فئة كبيره من الشعب حتبدء تركب عربيات محترمه من فئات اعلي ميقدروش يركبوها في الظروف الراهنه في ظل وجود القوانين اللي بتظلمهم دي