طبعا في شوارع مصر الجميلة النضيفة بعد لما خدت لي كم مطب علي نقرة حلوة خاصة اخر نقرة اللي موجودة بعد كوبري الجيش في الكيلو ٤.٥ في طريقي للتجمع بعدها لقيت في صوت حكة في المروحة الامامية عالي بعد ما رجعت من مشواري .. بصيت من خلال الشبكة الامامية للعربية ٣٠٠٨ موديل ٢٠١٥ لقيت زي فبرة داخلية مفكوكة ساندة علي المروحة وبتحك فيها لما المروحة بتشتغل خاصة مع تدوير التكييف

استغربت.. هو دا طبيعي رحت وانا ايدي علي قلبي من مصر الجديدة لمركز غمرة قولت ان شاد الله سهلة تتركب الفبرة واخلص بعد ما وصلت له بعد طلوع العين
وكانت ... الصدمة ما صدقتش ان دا التوكيل الرئيسي اللي هيعملي صيانة لعربيتي البيجو اللي معتقده انه براند عريق ومحترم في مصر انا لا اقلل من شأن شئ بس دا بالنسبة لي
"ورشة"
دا انا كنت بتريق علي توكيل ستروين " عز العرب " وكنت بقول علي السبع انه مجرد مركز خدمة علي اده لا لا لا دوول بالنسبة له ٥ نجوم هههههه
بعد لما اتلطعت شوية في الشمس في الشارع لغاية ما المهندس استلم مني العربية وشاف المشكلة وهي بسيطة مش حاجة بس ماينفعش امشي بيها كدة قالو لي استنا لما نجيب الصنيعي يشوف لها حل .. اتفجات الصنايعي هو اللي جاي يحل لي المشكلة .. طبعا ما عنديش مشكلة اني اكلمه دا بالنسبة لي اكيد يفهم اكتر من مهندس الاستقبال بس ،،مش صح ...طب ما روح للسمكري بتاعي عدم احترافية مطلقا .. وخاصة لما عرفت ان في تكلفة ٤٠٠ جنيه عشان مجرد يركب الفبرة مكانها .. عارف ان الاكصدام الامامي لازم يتفك عشان تتركب
بس هو ذنبي ...هو طبيعي ان العربية كل ما هاخد بيها نقرة ولا مطب هيحصل كدة اومال كروس اوفر ايه وعالية ايه .. طب هي في الضمان طبيعي التوكيل ياخد مني فلوس عشان يركب فبرة مفكوكة .. ما علينا خدتها ولغيت امر الشغل لاني كان لازم اسيبها واخدها باليل .. قولت اعملها جنبي في اي مركز معتمد والسلام وزي ما تكلف
صراحة اتصدمت من منظر دا توكيل ومعاملة .. معلش لو طولت عليكم بس عايز رأيكم وشكرا