الموضوع: علاج سوء الظن بالله

طيب خلينى اتكلم بطريقه مختلفه علشان ابقى اكتر تفاعليه ومنطقيه حديك مثال مبسط للموضوع وانت احكم على الوضع بنفسك
وعلشان القياس يكون دقيق حنجنب شويه متغيرات وحنفترض شويه حاجات علشان الحكم يبقى ابسط فحنفترض ان "الرزق" بيتمثل فى 4 متغيرات بس وهى "فرضا" الفلوس والصحه والاولاد والراحه النفسيه وحنفترض ان كل متغير منهم بيمثل 100 وحده ماديه تمام وان العينه المتمثله فى البشريه هم 80 فرد بس وطبعا ال80 دول بشر بكل ما فى السلوك البشري من سلبيات وايجابيات تمام دى الافتراضات والمتغيرات
الوضع كالتالى مطلوب من حضرتك توزع بعداله تامه ال 400 وحده بتوع الرزق على ال 80 فرد بعداله تامه يعنى ببساطه ادى كل شخص 5 وحدات بس من ال400 مش اكتر ولا اقل
اظن الموضوع بسيط خاصه انك مش حتحرم حد من حاجه كل واحد حياخد من الاربع متغيرات على الاقل وحده واحده وبالعكس ده انت حتدى كل واحد من احد المتغيرات دى وحدتين مش واحده بس تمام اظن ده قمه العدل البشري تفتكر الكل راضي ومبسوط قطعا لأ لان اللى اخد وحدتين من المال ووحده من الباقى بيبص للى واخد وحدتين من الصحه وبيقول ايه لازمه الفلوس انا عايز وحدتين الصحه واللى معاه وحدتين من الذريه يقولك اعمل ايه بالذريه من غير فلوس وهكذا فى ال80 فرد للعينه كلها محدش حتلاقيه مقتنع انك وزعت بعداله تامه
طيب افرض بقى ان ال80 فرد دول حنخليهم كل واحد يختار ال5 وحدات اللى يناسبوه من ال400 وحده في دلع اكتر من كده حتلاقى الكل محتار محدش راضي يختار لان كل واحد عايز ياخد على الاقل من كل متغير فى الرزق 5 وحدات وده مش عدل فالكل برضه مش حيختار ولو اختار مش حيرضي باختياره
ليه لان الطبيعه البشريه دايما تشتهى اللى مش موجود عندها وده سبب تدنى السلوكيات البشريه ووجود افات السرقه والقتل والاغتصاب وغيره كل الحاجات دى موجوده بسبب اشتهاء اللى مع الغير وعدم الاقتناع بعداله التوزيع العام


سيبك بقى من الافتراض وطبق ده على الواقع حتلاقى البشر مش راضيين وحاسين بالظلم دايما واغلب اللى بيتكلم عن الرضا بيتكلم عليه دون ايمان واقتناع شخصي بيه لان تفكيره ان ربنا عامل كده وخلاص ومعنديش غير انى ارضي بده وشخصيا مش شايف ان ده الرضا اللى ربنا عايزنا نؤمن بيه الرضا اللى انا مقتنع بيه انك تكون مقتنع تماما ان انت معاك ال 5 وحدات بتوع الرزق بتاعك ومنهم تقدر تغير حياتك بيهم يعنى انت لو معاك وحدتين من الاولاد ووحده من الباقى وعايز تزود معاك من الفلوس اعرف انك اكيد حتاخد من حاجه تانيه وكله بايدك ادعى ربنا واشتغل علشان تكون معاك فلوس ربنا عادل وفى نفس الوقت كريم ومجيب حيديك المال ولكن العداله العامه تقتضى ان يتاخد منك من الباقى سواء الصحه او الاولاد او سعادتك
وهكذا اى حاجه تعوزها ادعى واسعى ربنا حيدهالك بس لازم تعرف ان اللى حتاخده حينتقص من حاجه موجوده معاك وده قمه العدل ومفيهوش نقطه ظلم واحده مهما كانت ظروفك
كمان حاجه ربنا علشان رحيم بعد كل ده فى متغير واحد مش مرتبط بالعدل ولا بتوزيع الارزاق واللى هو السعاده كل واحد فى الكون سعادته فى ايده مش فى ايد حد تانى بدليل ان فى كل البلدان وكل الطبقات الاجتماعيه وكل العصور وكل الاجناس مهما كانت الظروف من غنى وفقر او صحه وتعب او وجود اولاد او حرمان منهم حتلاقى فئه سعيده ودايما مبسوطه ومحل حسد من الجميع وده لان ربنا خلى السعاده حاجه مرتبطه بالتفكير الانسانى وفهمه لما يحدث فى الكون وعلشان كده كل الاديان بتدعوا للتفكر والتأمل علشان التأمل هو طريق للسعاده والهدوء النفسي

تحياتى.