الموضوع: انتاج اول سياره مصريه

انت فاكرها سايبه ده غبور واشباهه من حيتان التوكيلات ممكن يدفعو رشاوى مليار جنيه عشان يدمرو المشروع ده

ربنا يسامحك يا أستاذ باسم
انت لو صنعت السيارة هتكسب كام؟ 1000 دولار في السيارة مثلا؟
يعني نتعب ونفكر ونصنع ونكسب 1000 دولار فقط
خلي الخواجة يتعب ويفكر ويصمم ويصنع ويسوق ،
واحنا نشتريها منه جاهزة ونكسب فيها 10 أضعاف مكسبه
في شكل جمارك وضريبة مبيعات واشتغالات
شفت ازاي احنا أشطر من الخواجة

ا/باسم اولا بالطبع كلنا نتمنى نشوف انتاج سياره مصريه خالصه ولكن هناك بعض الامور اللى لازم ناخدها فى اعتبارنا علشان نعرف الموضوع متوقف ليه :
*مبدأيا لازم نتكلم على الموضوع من وجهه نظر انه يكون مشروع استثمارى ومن وجهه نظر انه يكون مشروع قومى ونشوف كل حاجه ايه عقباتها

-الاول نتكلم فى الموضوع من وجهه نظر كونه مشروع استثمارى ووجهه النظر دى معناها ان الموضوع ربح وخساره فتخيل مستثمر حيعمل مصنع من البدايه تماما او ياخد شركه النصر من الحكومه ويعيد هيكلتها بالاضافه انه يشترى تصميم عربيه ويصنعها من البدايه للنهايه وبالطبع حيستورد قطع جاهزه من بره علشان حتكون ارخص من هنا السؤال تكلفه العربيه دى حتكون منافسه بعد وضع هامش ربح لا يقل عن 50 % من تكلفتها "على الاقل علشان يغطى مصروفاته ويكسب منها ممكن تقول ايوه وانا حصدقك بس تقدر تقوللى ان العربيه دى "حتى لو معموله بكفاءه عاليه جدا" الناس حتثق فيها وتشتريها بدلا من العربيات المستورده او المتجمعه وخللى بالك من ملحوظه ان سعرها بالتكلفه مع هامش الربح العادل حيخليها فى فئه سعريه مش بعيده من عربيات صينى وكورى فى السوق ماشيه من سنين والناس عرفت عيوبها ومميزاتها
احب اقولك ان احنا كشعب طبع اغلبنا اننا بنتحمس لاى منتج مصنوع فى مصر ولكن عند الشراء لنا سلوك عجيب جدا ومنقتنعش بالمنتج المصري الا لو التاجر ضحك علينا واكدلنا انه مستورد او ظبطنا بوجود كلمه مضروبه على المنتج مكتوب عليها"made in اى حاجه غير egypt" وده عيب ممكن نتكلم في اسبابه فى موضوع تانى
وعليه فان المستثمر لما يعمل دراسه للسوق حيكتشف انه مش حيقدر يكسب من الموضوع ده قبل على الاقل 5 سنين خسائر علشان يبدأ المجتمع يثق فى العربيه وتبدأ تحقق انتشار وبالتالى اى مستثمر بيخاف على فلوسه حيقولك انا اعمل خط تجميع فى مصر او اشغل فلوسي فى استيراد عربيات جاهزه وحيحقق "فى الحالتين"صافى ربح مش اقل من 60-70% من راس ماله لو حضرتك مكانه حتختار ايه ؟؟؟؟


-ثانيا نتكلم على الموضوع من وجهه نظر قوميه "وده غالبا اللى ممكن يخللى الموضوع يتحقق ولكن الفكره فين الفكره ان بنفس التكاليف اللى قولناها فوق حتدفعها الدوله "وده صعب حاليا" وكمان حتى لو الدوله حطت هامش ربح اقل من المستثمر فطبيعى حتلاقى التكاليف المتغيره من اجور وغيره اكبر من اللى حيصرفها المستثمر وبالتالى برضه عند التنافس فى السوق حتحتاج الدوله مش اقل من 5 سنين خسائر عقبال مالعربيه تثبت نفسها
حتسئلنى ليه اقول لحضرتك الدوله متقدرش تدفع تكاليف اعاده هيكله المصنع دلوقتى لان تقدر تقول من وجهه نظر الحكومه "وقد تكون على حق" ان بنود الموازنه محققه عجز بدون استثمارات جديده "والاستثمارات دى كمان مش حتحقق ربح فورى دى على الاقل حتحقق خساير 5 سنين قادمه " يعنى تكلفه وخسائر حتتحمل على موازنه محققه عجز تفتكر لو اى حد مكان الحكومه الحاليه "حتى لو اختيار الاستثمار ده حيحقق نفع بعد مده" حياخد قرار انه يفاقم العجز فى مشروع اول لما يخسر حيتقال عليها حكومه سفيهه وبتضيع الفلوس "اظن لأ"
والحاجه التانيه هى تضخم تكاليف الانتاج بسبب الفساد فى القطاع العام الموجود حاليا وبالتالى اظن ان حتى لو المشروع مطروح داخل الحكومه ومع وجود المصنع فى حيازه الانتاج الحربي اظن ان تشغيله حتى لو بيتم الدراسه ليه حيتأجل لحين وضوح اثر القياده الحاليه الاقتصادى على البلد "حتى مع المؤشرات الايجابيه فى المجال الاقتصادى ورفع التصنيفات مؤخرا بس ارض الواقع محتاجه تأثير اكبر" لو ده حصل وده اللى كلنا بنتمناه اظن المصنع حيشتغل وحنلاقى اكتر من دراسه جاهزه للمشروع سواء بمشاركه بخبرات او بالاستعانه بخبرات مصريه

يبقى من الاخر الموضوع استثماريا عن طريق مستثمر مش حيحصل مش علشان بيتحارب بس لعدم الجدوى الاقتصاديه لسلوك مجتمعى غير واثق فى منتج بلده"بالرغم اننا بنصدر حاجات كتير عمرنا منتخيلها "
واستثماريا كمشروع قومى بتميل حكومى مش مستحيل ولكنه غير جائز حاليا لعدم وجود تميل ليه من ايرادات الدوله ولكن فى وقت ما "طال او قصر" حيتم عمل المشروع مش علشان الموضوع مربح ولكن لان الحلم ده موجود من زمان وفكره عدم خصخصه المصنع القائم وبيعه بيؤكد ان الموضوع حد فكر فيه بشكل ما ولقاه جائز التحقيق ولكن القرار الحاسم بالتشغيل غائب اما خوفا او لوجود اولويه الله اعلم

فى النهايه التحليل اللى فات ده رأيي الشخصى وممكن يكون غلط ولكن دى رؤيتى للموضوع بشكل عام
تحياتى.