تقرير كامل عن تست درايف شانجان cs35

**Karim_Monir** · 02-09-2015 03:44 PM

بدات تتوافر وتنتشر فعلا ليا 3 زميالي جابوها وانطباعهم كويس جدا عنها

**Colin Chapman** · 25-10-2015 12:03 PM

المشاركة الأصلية كتبت بواسطة ayman66

وهو فى حد بيشرح فى مجتمع محب للسيارات من مختلف الثقافات بشكل اكاديمى ياراجل ,عموماً مجهود رائع وابقى تابع حضرتك حسن كتبى على اليوتيوب وأكيد انت عارفه الراجل ثقافة عالية وطبعاً مجنون سيارات وقادر بشرح بشكل اكاديمى لكنه بيقدم السهل الممتنع يعنى بعلم من غير مايقول انا بعلم ,,عموماً الف شكر يافندم على التقديم الرائع

**hoshos14** · 11-01-2016 10:09 PM

https://www.facebook.com/groups/731227327008504/

ده جروب لملاك شنجان للي حابب يعرف معلومات من مستخدميها

**khaledhadi** · 15-04-2016 05:10 AM

Best-selling China-made SUVs in 2015 | ChinaAutoWeb

مبيعاتها عاليه

**islamtmam** · 24-05-2016 06:10 AM

السلام عليكم ورحمة الله
انا منت في الرياض طريق خريص اليوم 42/5/2016 عجبتني شانجان cs35شكلها عجبني ركبتها لقيتها تحفة فكرت اشتريها لقيت سعر الاستاندر 43000 والفل 46000 بصراحة احترت جدا لاني كنت شبه مقرر اني عاشتري كياسبورتاج 1600ccالاستاندر 67000ريال المهم اعدت البحث عل النت لقيت التقرير الجميل ده بتاع أ/كريم فقررت اخد منه مقتطفات وقبل ما انقل المقتطفات حابب اقول لكم انها عند واحد جاري ومجنون بيها وربنا يهدينا للاصلح (طبعا انا حذفت السعر القديم 130000ج)لان السعر حاليا 5/2016 وصل حوالي 170000ج فالى التقرير بتصرف :
قررت اكتب التقرير بطريقه مبسطه لان ناس كتير جدا سالتني عن العربية
وادائها
شكل السيارة مزيج بين ال SUV والسيدان
لاني محستهاش سيارة متعددة الاستخدمات خالصة ولا سيارة مدينة خالصة وهاقول السبب لاحقا
ارتفاع العربية عن الارض ممتاز و وضعية القيادة اكثر من رائعة شايف الطريق قدامي كويس مع تصميم جيد للزجاج الامامي وزاوية رؤية مناسبة جدا تكشف الطريق بالكامل امام السائق
وبحكم ارتفع كرسي القيادة نسبيا وتصميم التابلوه البسيط والعصري في نفس الوقت بيسهل للسائق الوصول لكافة المعلومات اثناء القيادة بشكل سلس وسريع
مع بداية الانطلاق بالسيارة اول ملحوظة ليا ان فتيس السياره نقلاته ناعمة وده مش متعود عليه صراحة في السيارات الصينية
لكن طبعا افتكرت ان الفتيس من ايسين ياباني بالكامل وده مدي نعومة فعلا للنقلات
زودت التسارع شوية وتعمدت اطفي التكييف عشان احس بصوت الموتور والنقلات مع ارتفاع بسيط في صوت الموتور وشويه والسحب ورجع بقي طبيعي تاني
لكن هارجع واقول ده شئ عادي ومتوقع وحولت الفتيس لنظام القيادة الاستيب ترونيك للمزيد من التحكم وقرصت فعلا علي السيارة اكتر والاستجابة حلوة وسريعة
شغلت التكييف عشان ازود الحمل علي السيارة فعلا التسارع حلو ولكن لغاية 140 فقط ومن 140 ل 160 استغرقت وقت شوية وبعد ال 160 التسارع فعلا ضعيف
نفس الملحوظة كانت علي سيارة مشهورة من نفس الفئة عملتلها تست درايف قريب والتسارع مشابه بعد 160 كم

نرجع لل CS35 علي السرعات بدات اخد غرز بين السيارات واشوف مدي قابلية السيارة للمناورة
وهنا نرجع للنقطه اللي سيبتها فوق ان العربية بين السيارت السيدان ومتعددة الاغراض لان السيارة كانت فعلا اثبت من سيارات زيها في نفس الفئة
والانطباع العام بعدم وجود كتلة السيارة بالاعلي او بطريقة عامية متحسش في الملفات ان العربية بتميل وكانها هاتتقلب علي جنبها وهنا ظهرت الخبرة الايطالية في تصميم جسم السيارة بالكامل
فيها ثبات في المناورة رغم انها غير مخصصة لذلك وده اللي اتعمدت اني اتاكد منه لما رجعنا ابو رواش ودخلت بيها في منطقة غير ممهدة مع ملفات ودورانات سريعة للعربية والعربية مكلبشة في الارض فعلا وباين ده من الصور ان مفيش عجلات مالت او ارتفعت عن الارض
الباور الكهربا مخلي سواقة العربية خفيفة وممتاز ومتحسش بمجهود
العربيه محل الاختبار كانت واقفه في الشمس لفترة محترمة ولما خرجنا للاختبار الساعه 2 ظهرا تقريبا وشغلنا التكييف بدء الاحساس بالتبريد بعد دقيقة تقريبا وده نفس الوقت اللي ببستغرقه تكييف عربيتي ال BMW 2007 تقريبا والاتنين كانو في نفس المكان ونفس الوقت لكن بعد دقايق بدء التبريد يزيد ومحستش بحمل علي السيارة
العجلات ال 17 بوصة مع عرض مداس 215 مم وفرت للعربية اتزان كويس جدا علي الطريق مع انظمة تعليق ماكفرسون
ارتفاع السيارة من الارض لباطن السيارة (الخلوص) 18 سم وده ممتاز لشوارعنا اللي مليانة مطبات
العربية فيها ABS +EBD من شركة بوش
الموتور بتاعها من شانجان نفسها وهي من اكبر شركات تصنيع المواتير في الصين بيخرج 125 حصان علي عدد لفات موتور 6000/د وبيطلع عزم 160 نيوتن على من 4 الى 5 الاف لفة
الموتور ايضا 1.6 ليتر DVVT بتقنية البلو كور ومزود ب 2 كامه علي 16 صباب
شاشة البيانات 3.5 بوصه في التابلوه فيها كل اللي انت محتاج تعرفه عن العربية ده غير شاشة المالتي ميديا 5.5 اللي فيها كل اللي انت عايزه غير مفتاح بريموت عند بعد و حمايه من السرقه بال Immobilizer
من راديو ومشغل ام بي ثري و جي بي اس ونظام صوتي Hi Fi ب 6 سماعات
فرش العربية الجلد بالخياطة الحمراء بيحققلها اعلى قدر من العملية والشياكة في نفس الوقت
والشنطة الخلفية بمساحة 348 لتر لكن لو قفلت المقاعد الخلفية توصل ل 1058 لتر
طول العربية 4160 والعرض 1810 والارتفاع 1670 مع قاعدة عجلات 2560 وسعة خزان الوقود 52 لتر مع معدل استهلاك وقود 7.2 لتر لكل 100 كم مع وزن السياره فارغ 1270 كجم
قاعدة عجلات بالحجم ده قدرت توفر مساحة محترمة للمقاعد والارجل داخل العربية بحيث ان الركاب في المقاعد الخلفية ميكونش عليهم اي احساس بالضيق
العربيه فيها كمية كماليات كتير غير فتحة السقف اللي مش متوفرة في سيارات كتير في نفس الفئة
شايف العربية صفقة ممتازة جاية مع سعر ممتاز غير مبالغ فيه بالنسبة لكمية التجهيزات بتاعتها وضمان محترم جدا من وكيل ليه اسمه وسمعته في السوق المصري من سنين طويلة
اخيرا التوكيل منزل مجموعة من التجهيزات المختلفة للعربية عملية جدا وبسعر منافس وبتخلي شكل العربية اجمل كتير هاتلاقوا صورها في اخر التقرير
العربية سعرها 170 الف جنيه مع ضمان خمس سنوات او 100 الف كم وتوفر كبير لمعظم قطع الغيار
العيوب اللي شايفها من وجهه نظري
*صوت الموتور عالي شويه بس ممكن يكون بسبب ان سير التقسيمة علي جنزير معدني وليس سير مطاطي واعتقد ده مناسب اكتر للدول الحارة زي مصر
*الشنطة مش كبيرة بالنسبة لاسرة كبيرة لكن الوكيل وفر روف راك بسعر ممتاز
*البروفايل ال 50 بالنسبه لمقاس العجلات قليل شوية هو مزود الثبات في العربية لكن هايكون علي حساب الراحة في المطبات لكن زود العربية بطابع رياضي وشكل اجمل
*شاشة البيانات في تابلوه السيارة بلون ازرق ومع ضوء الشمس مبتكونش واضحه كويس

كده وصلنا لنهاية التقرير وفي انتظار ايميل من مدير التوكيل باسعار قطع الغيار الدورية واسعار الصيانات الدورية ليتم ارفاقه بالتقرير ليكون شامل
واسيبكم مع شويه صور للسيارة قبل الاختبار واثنائه