الموضوع: فتيس الكروز ٢٠١٥ !!!!

معش انت غلطان فى اختيارك
اولا الفارق بين الاكسنت اللى معاك وبين الكروز مش الفرق الواو يعنى زي ما حضرتك بتقول يعنى اللهم ثبات اعلى وشوية وسع فى الصالون
انما مع اول دوسة بنزين وانت سايق هاتتصدم من تقل العربية وبطئ السحب ودا عيب عادى فى الكروز انما وبما انك كنت راكب طيارة بمعنى الكلمة فانت صدمتك هاتكون اكبر بكتير
استهلاك البنزين هتلاقيه اعلى
وفروق الاوبشن حتى لو كان معاك اكسنت اول فئة فيكونو متساويين (عدا عناصر الامان )
رأيي مش دا التغيير ومش هاتحس انك حطيت فلوسك فى المكان المناسب

انا شايف تحفز في الرد من بعض الناس

يا جماعة المنتدى ده من أفضل المنتديات في نقل الخبرات ومش مطلوب الاستهزاء من بعض

ببساطة صاحب الموضوع بيسأل عن فتيس 2015 ومش عارف ليه في واحد مصمم يتكلم عن الموديلات القديمة وبيقارن بعربية تانية

وارد جدا يكون الموديل القديم فيه مشكلة وتم تلافيها، يبقى مش حنفضل نبص لورا وياما ماركات عالمية طورت التكنولوجيا وتفوقت على عربيات تانية كتير كانت يبقاها

وفي الآخر كل واحد بيختار العربية اللي تناسبه من حيث المساحة أو الثبات أو السرعة، .... إلخ
ممكن واحد يكون بيفكر في عربية تجري وتشد وواحد تاني كل اللي يهمه إن العربية تكون عائلية وواسعة وشنطتها كبيرة وموضوع الكماليات كمان بيفرق من شخص للآخر

المهم ميبقاش العربية فيها عيب خطير وملوش حل

المشاركة الأصلية كتبت بواسطة karimelnagar

انا حجزت امبارح كروز ٢٠١٥والمفروض اني اروح بكره الصبح اخلص الورق .. عشان كده عايز مساعدتكم بخصوص فتيس الكروز ..
اولا انا معايا حاليا اكسنت ار بي .. ومع الفارق طبعا بينها وبين الكروز الا ان انها بقالها معايا ٣ سنين مغيرتش فيهم الا الزيت والفلتر بسسسسسس
زمان كنت بسمع كلمة اعتماديه ومكنتش بديها اهتمام لكن بعد ماقريت كذا موضوع هنا عن فتيس الكروز عرفت يعني ايه اعتماديه
من شويه دخلت علي كذا موضوع بيتكلموا عن تغيير زيت الفتيس للكروز واتصدمت بصراحه

ايه كميه العربيات اللي جابت فتيس دي ؟ فين الاعتماديه بتاعة العربيه ياجماعه؟
وليه كل التعب ده عشان اغير زيت لعربيتي؟
هو الواحد فاضي ولا فيه دماغ عشان اقعد ادور علي زيت معين ومواصفات معينه واخده اروح بيه للتوكيل؟
امال دور الاستاذ توكيل ايه لامؤاخذه؟ هو للدرجادي منصور ده سيء؟
وبعدين مش فاهم ازاي عربيه محترمه عشان اغيرلها زيت اشتري ضعف الكمية واغيره علي مرتين؟ ايه الفلوس اللي بتترمي عالارض دي؟

هو عشان اركب كروز اتعب التعب ده كله؟
محتاج نصيحه صادقه .. اجيب الكروز ولا هتتعبني؟ وياريت الساده الملاك يقولولي عربياتهم اكبر رقم الكروز عملته من غير ماتغير فتيس او موتور او كمبيوتر..

السلام عليكم ورحمه الله وبركاته
انا هتكلم عن نفسي بما اني حاجز كروز و هستلم يوم الأحد القادم انشاءالله عز وجل و هحاول انقل معلوماتي بمنتهي الامانه لسببين
الأول أن صديقي و حبيبي و جاري لسه شاري شارك 2015 زيرو .و كان أمامي وقت للمقارنة .
الثاني أن انا مش بحاول أصدق نفسي كتير و بقول ان المجرب احسن من الطبيب
طيب نبتدي المشوار كان معايا شويه فلوس و قلت اغير عربيه أفيو 2007 . قلت باسات قالوا بتجيب فتيس قلت طب والناس اللي ركباها ده مش خايفه ليه و الكلام ده مش هطول كانت أمامي فرصه تجاريه مينفعش اسيبها و في نفس الوقت بعت عربيتي و عايز اركب قولت استحمل شويه و اشوف الدنيا في نفس الوقت صاحبي كان عايز يشتري عربيه زيرو . قلتله شوف و قولي . قالي اكسنت آر بي قولتله لا بلاش فكر في الكروز أو الشارك . طب الخلاصه ليه صاحبي اشتري شارك و ليه انا هشتري كروز .
صاحبي قالي 3 حاجات خلوه يشتري الشارك 1 ياباني 2 منتشره ( قطع غيار اسهل) 3 بياعه و ده سبب مش بيعجبي في المصريين عايزين يبيعوا العربيه قبل ما يشتروها.
انا هشتري كروز علشان 1 برستيج 2 خامات داخليه أفضل من الشارك 3 عزل أفضل بكتير من الشارك ( ده مش مقارنه انا بقول ليه اخترت ده و سبت ده ) 4 جروب مميز و خدوم علي الواتس اب ذو خبره من 2010 الي الان و صاحبي قالي ان الشارك عامل جروب بس علي الفيسبوك. 5 و النقطة ده مهمه قوي موتور ألماني فتيس ألماني . ايوه ألماني بلدتكنولوجيا السيارات و ده من 2014 حتي الآن . و حاجات تانيه كتير . كفايه انك مش هتلاقي عربيتك مركونه في كل شارع و في كل حاره و ده تميز مع العلم بوسع الانتشار في 2014 و 2015 .
أخيرا احب اشكر دكتور شهدي و استاذ حسام علواني علي المجهود اللي هما عاملينه و هم من اهم أسبابي لاقتناء المميزه كروز . و شكرا

و بعدين ايه يعني اعمل صيانه كل 10000 كيلومتر . ده مؤشر اهتمام مش مؤشر سئ للعربيه . وايه يعني اغير الزيت بأسلوب معين و عمرهاماكانت فلوس بتترمي علي الارض . العبره بالاستخدام . و بعدين حافظ عليها تحافظ عليك .