إيران والاتفاق النووى بين انتصار الدبلوماسيه وغموض الرؤيه المنطقيه
بدايه الموضوع الهدف منه ان يكون مناقشه موضوعيه للاتفاق وتوابعه واسبابه من وجهات النظر المختلفه
الخبر الرئيسي بالامس هو التوقيع على الاتفاق النووى بشأن إيران والغريب فى الموضوع مش بس ان الاتفاق تم بعد كم الاخبار فى الشهور السابقه عن فشل المفاوضات وان كل المؤشرات كانت بتدل على ان الاتفاق مش حيتم وخاصه فى التوقيت ده انما كمان بنود الاتفاق
البنود كلها من وجهه نظرى تعتبر فى صالح ايران شكلا وموضوعا "ان كان ما افهمه صحيحا" فالاتفاق قد نص على ان تتوقف ايران عن الابحاث النوويه "العسكريه" لمده 8 سنوات وعدم تخصيب كميات اضافيه لمده 15 سنه وتمكين لجان التفتيش من المتابعه فى مقابل رفع العقوبات وفك الحظر على الاموال
الموضوع لو مكانش محدد بمدد معينه كان شكله بقى منطقى انما تحديد مدد للاتفاق بيخلينى اقول انه فى صالح ايران لانها فى خلال ال 15 سنه دول حتكون من الاقتصادات المحترمه جدا وفك حظر اموالها حيخللى البلد تتحول 180درجه اقتصاديا وعسكريا "لرفع حظر شراء الاسلحه وكمان توافر الموارد الماديه للشراء" لا وكمان الفلوس دى حتخللى ايران فى ال 15 سنه دول تعمل تحالفات كبيره جدا واستثمارات خارجيه كتير جدا
كل اللى فات ده غير انه فى مصلحه مباشره لايران الا انها كمان مش حتتحرم من الحلم النووي لانها بعد 15 سنه الاتفاق حيكون لاغى ومن حقها الاستمرار فى مشروعها حتى عندها مع مع فرض عقوبات جديده إيران مش حتحس بتأثير العقوبات غير بعد مده ممكن تصل ل 10 سنوات كمان
وكل تعليقات الدول الغربيه تحسها متخوفه وغير راضيه بالنتائج السؤال هنا طيب ايه اجبرهم على التوقيع خاصه ان "من وجهه نظرى "ان الاتفاق انتصار كبير للدبلوماسيه الايرانيه فى التفاوض وطبعا مش بس الدول الغربيه المتخوفه كمان دول الخليج تعليقاتها متشككه فى نوايا ايران
السؤال اللى بيطرح نفسه اكيد فى صفقه مخفيه فى الاتفاق ده ممكن حد يتوقع ايه الصفقه دى وكمان ايه تأثير الاتفاق ده فى اولا تدخلات ايران فى الخليج وخاصه دول "العراق ،لبنان،سوريا،اليمن" وثانيا فى علاقات ايران بدول متحالفه معاها زى"باكستان ،الهند، روسيا" وثالثا تأثيره فى سوق النفط
والسؤال الاخير اللى محيرنى انا شخصيا ازاى الدول الغربيه تاخد قرار زى ده بالرغم من رفض اسرائيل ليه الا لو الموضوع فيه حاجه انا مش قادر استوعبها تخللى الاتفاق يصب فى صالح اليهود بشكل ما ؟؟؟؟؟؟؟
اخيرا الموضوع مفتوح للمناقشه واى تحليل او طرح يوضح الصوره او على الاقل يساعد فى وضوحها
تحياتى .