دايو لانوس وان بتبطل معايا فى الحر

**tootee faied** · 17-07-2015 12:33 PM

الدايو لانوس وان بصراحة مش عارفة الاقى ليها حل من كتر مشاكلها او ممكن انا مش عارفة اهتم بيها وبكره دايما اشتغالات الصنايعية اول ما يشوفونى بنت داخلة عليهم بس الحدم لله ببقى فاهمه من التجربة معظم الحاجات وبتابع دايما الاسعار هنا او كلام الناس

العربية الصبح وبالليل بتبقى كويسة جداا بس ساعه الحر ع 2 او 3 كده فى الزحمة بتسخن جامد وتبطل من غير ما مؤشر العربية يعلى عن النص ولو بطلتها 5 او 10 دقايق بعد ما افتح الكبوت بتهدى وتمشى والسحب بيبقى تقيل
طبعا جريت ع الميكانيكى قولتله اللى حصل وكمان فيه ناتشة وهيه واقفة كأن عندها زغطة قولتله ده ليه مع مشكلة السخونة قالى محتاجة تغيرى البوجيهات عشان ماتفصلش وتزودى ميه خضرا وممكن من الركنة اغسلى دورة الميه وعملت كده
رحت للأستاذ الميكانيكى تانى مرة قالى الشكمان العلبة اللى ورا مخرومة ولازم تغيريها والعلبة اللى فى النص برضه المهم غيرت الاخيرة وفى النص اتلحمت وقولنا خلاص تانى يوم حصل نفس المشكلة
تالت مرة رحتله قالى موبينة محتاجة تتغير قلتله وبعدين بدأ يكلم ع جوان السلندر وانا طبعا بقول فى بالى انا قبل الهبل ده مفروش اشوف الردياتير و دورة الميه والتبريد قبل العك بتاع الميكانيكى ولا فيه حل تانى ؟

**mohamedadelemam** · 17-07-2015 12:52 PM

السلام عليكم ورحمة الله .. عيد سعيد على حضرتك ان شاء الله .. الشكمان يا فندم لو مخروم مفيش منه مشكله هو بس صوته بيبان اكتر انما ليس له علاقه بالمشكله .. هى يا فندم غالبا التبطيل دا على حسب ما فهمت حضرتك من انها بتسخن اوى ودا قبل وش سلندر والفتحه دى حضرتك نضفى الريداتير كويس واتأكدى بعدم وجود تسريب فى اى توصيلات وبما انها كانت مركونه وجب تنضيف بوابة الهوا وبوجيهات على فلاتر وان شاء الله بسيطه يا فندم واى استفسار تحت امر حضرتك

**حسام الدسوقي** · 18-07-2015 03:45 AM

عيب موبينة لما تسخن تنتش وبعدين تطفي كانت عندي واشتريت واحدة صيني ب 200 جنيه واتظبطت بعدها

**troyomar** · 18-07-2015 03:46 AM

عن تجربه شخصيه وكنت غيرت لاسف شكمان ورادياتير وبوجيهات كذا مره نفس المشكله بالظبط وفي الاخر كانت الموبينه

**مداح القمر** · 18-07-2015 12:03 PM

اللي في عربيتك دي موبينة مفيش غيرها .... معلش هاتي الاصلي احسن بس حتلاقيها غالية شوية ب 500 جنيه او اشترى موبينة استيراد بحوالي 250 جنيه

**مداح القمر** · 18-07-2015 12:05 PM

حاجة تانية ... خشي على قسم الدايو و اعرضي المشكلة احسن من القسم العام وحتستفادي كمان بمعلومات هايلة من قسم الدايو

**Fadi Ezzat** · 18-07-2015 03:37 PM

دى اكيد موبينة مية فى المية
طالما الحرارة مظبوطة والمية مبتنقصش

**tootee faied** · 20-07-2015 08:26 PM

المشاركة الأصلية كتبت بواسطة حسام الدسوقي

عيب موبينة لما تسخن تنتش وبعدين تطفي كانت عندي واشتريت واحدة صيني ب 200 جنيه واتظبطت بعدها

الباشا الميكانيكى لما قولتله قالى ده انا خبطت عليها و بتشتغل قولتله ايه الهبل اللى بتقوله ده
و هاغير الاول طقم سرفيس و انضف الردياتير ودورة المايه و اشوف الموبينه بس اجيب منين اصلى و سعر كويس ؟

**tootee faied** · 20-07-2015 08:28 PM

المشاركة الأصلية كتبت بواسطة مداح القمر

اللي في عربيتك دي موبينة مفيش غيرها .... معلش هاتي الاصلي احسن بس حتلاقيها غالية شوية ب 500 جنيه او اشترى موبينة استيراد بحوالي 250 جنيه

هاغيرها اكيد ان شاء الله بس محتاجة اعرف مين بيبعها و بأقل سعر وانا من امبابة ورجلى دايما فى التوفيقية
وكمان ادخل قسم الدايو ازاى انا مش عارفة هو فين عشان المنتدى كبير وفعلا محتاجة اشوفه عشان انواع الزيت الكويس للموتور و انواع السبراى بتعاعت غسيل الموتور