الموضوع: مشاركتكم بتجربتي القادمة في إنقاص 10 كيلو من وزني 87 كيلو

يعني حتى السعودي والاماراتي ممكن يكون فيه جيلاتين خنزير

هل نبعت لدار الافتاء نشوف حلال ولا لأ؟

بصراحه معنديش اي بديل نضيف غيره وكل المصري مقرف

متابع معاكم

أنا طولي 181 ووزني 86 !
أنا مشكلة وزني كلها ف منطقة الخصر والأرداف !
محتاج أنزلهم


بس المشكلة ان أنا عايش لوحدي ومفيش بقى أكل هيتعمل الا حاجات سريعة مكرونات وكدة وانا عايز ابعد عنها
فعايز حد يدلني على حاجات اشتريها ف الغدا مثلا تبقى مفيدة وف نفس الوقت تشبع وطعمها حلو
ف الفطار هقضيها شوفان وبليلة وجبنة
بس المشكلة ف وجبة الغدا !

حقول لحضرتك على مجموعة من الخطوات اللي بتدي نتايج ملحوظة :
- ابعد عن السكر أو أي منتج فيه سكر ودي حاجة مهمة جدا لان السكر ده كارثة بكل المقاييس .. البديل انك تحلي مشروباتك ببدائل السكر - بدون اسبرتام -
- قلل من الملح في كل اكلك حفاظا على صحتك وضغط الدم ومايتبع ذلك من التقليل من المشهيات المليانة ملح زي المخلل ..
- كل لوز مش متحمص ولا متملح لانه بيقلل الوزن .
- افطر كويس واواتغدى كمية اقل وماتتعشاش لو تقدر او قلل العشاء جدا وخليه مثلا خيار وزبادي منزوع الدسم ..
- اشرب ميه كويس بمعدل كوباية كبيرة كل ساعة تقريبا .
- لازم لازم تبذل مجهود رياضي لمدة نصف ساعة على الاقل لان الاكل بدون رياضة ضحك على الدقون وحاول تحرق حوالي 200 كالوري يوميا في جيم او بالمشي او جيب جهاز رياضي في البيت .
- قوم من على الاكل قبل ماتشبع ودي حاجة مهمة ولازم تعود نفسك عليها .. والرسول عليه الصلاة والسلام قال : " نحن قوم لاناكل حتى نجوع واذا اكلنا لانشبع "
- ابعد عن العيش الابيض لانه كارثة غذائية واستبدله لو ضروري بالعيش الاسمر او السن .
- قلل من المسبك والمحمر مش بس للتخسيس ولكن لانه سبب لكتير من المشاكل الصحية اللي بتبتدي تظهر في اواخر التلاتينات .
- ماتاكلش الاكل الزبالة بتاع المطاعم لانه ببساطة معمول بأزبل المكونات ومنعدم النظافة ..
- كل فاكهة وخضار كتير خصوصا اي حاجة قليلة السعرات وفيها الياف .
لو نفسك وزتك على حاجة بتتخن ماتكترش عن قطعة واحدة ... وبس
- جيب لبس قديم ليك ايام ماكنت خاسس وجسمك افضل وحط هدف انك تلبسه تاني ..
- كون متاكد انك ممكن تعمل اي حاجة وتحقق اي هدف واللي بيخس وبيمارس رياضة لايفرق عنك غير انه عنده عزيمة والتزام .. بالتوفيق
- ابعد تماما عن المشروبات الغازية لان فيها كمية سكر لاتتخيلها ..

المشاركة الأصلية كتبت بواسطة dede_dodo88

loool
لأ مش القصد خالص صدقني, بس هو الموضوع في الأخر نسبي برضه..
يعني أكيد أنت برضه مش هتبقى مبسوط لو خلاص خسيت و وزنك على الميزان وصل للرقم اللي أنت عايزه لكن في شوية دهون و ترهلات في منطقة البطن مبوظالك أحساس الslim fit اللي بتدور عليه..

على فكرة أنا وزني كان وصل 85 كجم لقبل أكتوبر اللي فات و نزلت لحد 67~68 كجم, فأكيد مش هكون مبسوط لو زدت جرام واحد دهون بعد اللي وصلتله..

طيب قولنا عملت اية علشان تخس من 85 الى 67 وهندعيلك

المشاركة الأصلية كتبت بواسطة eng_amg

نفس العمر..
عموما المرحلة دي من العمر معدل حرق الدهون بيكون اقل من عمر العشرينيات وكل ما يزيد العمر الحرق بيقل.
حقولك رأيي من واقع تجربتي في اتباع نظام غذائي واتباع تمرينات رياضية
معنى كدا انك علشان تاكل براحتك منغير نظام غذائي واكلات ممنوعة لازم تتبع التالي:
- محتاج تبذل مجهود شبه يومي لا يقل عن ساعتين - يعني اربع مرات اسبوعيا علي الاقل
- لازم تنام بدري - الساعة 12 متعديش عليك. وتصحى بدري ايضا. لان السهر يقلل الحرق جدااا
- ابتعد عن بناء العضلات في فترة الحرق لان العضلات حتجبرك تاكل كتيير ووزنها اكثر من وزن الدهون 1.5 الي 2 ضعف. وركز في تمارين اللياقة كالمشي السريع والجري.
- شرب الماء بكثرة لا يقل عن 3 ليتر ماء يوميا.
- يفضل طبعا تركز علي الخضروات والفواكه اكثر من غيرهم.
- حاول تاكل " فسدق " اسبوعيا علي الاقل لان به فيتامينات كثير جدا ويعطي احساس بالشبع ويقلل الكريسترول والدهون به غير مشبعة.

هحاول ابتدى اول اسبوعين ساعه مشى يوميا ثم ازود لغاية ما اوصل ل ساعتين يوميا

المشاركة الأصلية كتبت بواسطة elrasy

طيب قولنا عملت اية علشان تخس من 85 الى 67 وهندعيلك

أول طلعة هي بتبقى أصعب فترة لأنك لازم تكون فيها حازم مع نفسك في تطبيق الجدول اللي هتحطه لنفسك,, الموضوع بيكون فيه شوية أحباط لأنك بتاخد شوية وقت على ما تشوف نتيجة و في أوقات الميزان هيديك نتيجة في عكس الأتجاه..
أنا في الأول قررت أوقف تماماً شوية حاجات لحد أما أوصل لوزن معين بعد كده ممكن أفكها شوية, فوقفت أي أكل من بره, وقفت المشروبات الغازية, وقفت الحلويات, وقفت المقليات, وقفت المعجنات زي الكرواسون و ما شابه..
أكلي متكون من وجبتين رئيسيتين, الفطار بيكون الساعة 11 كل يوم عبارة عن ساندويتشين براون توست في الأغلب بيكونوا تونة أو بيض أو فول + تفحاية خضرا, و دي بتقفل معدتي لكام ساعة قدام..
الغداء بيكون في حدود 6 أو 7 لما برجع من الشغل, و بيكون خضار سوتيه معاه حتة لحمة أو صدر فرخة أو سمك فيليه و بيكونوا مشويين..
ممكن بنوع بقى في مكونات السوتيه و بستخدم صوصات سواء معاه أو مع السلطة أو اللحوم عشان تغير الطعم و مزهقش, و بالأخص باربيكيو-خل بلسميك-sweet chili sauce-صلصة فرنسية,,,
مفيش وجبة عشاء بالنسبالي و مش باكل أي حاجة بعد 9 بليل..
لعب رياضة بشكل منتظم, جري حوالي مرتين في الأسبوع, من نص ساعة لساعة في المرة..
تمارين متنوعة في البيت بشكل شبه يومي لـ15 دقيقة على الأقل, تمارين ضغط بطن و تمارين بالدامبلز, لأن لعب العضلات بيسرع في حرق الدهون..
لازم نوم لعدد ساعات متواصلة بشكل كافي, لأن هي دي الفترة اللي بيتم فيها الحرق و بناء العضلات..
بشرب شاي أخضر كوباية أو أتنين في اليوم, و بشرب ماء كتير أوي, كتير بجد lol

بعد ما وزني نزل شويتين و دخلت في الـ70's أبتديت أزود حاجات من اللي كنت مانعها, أرز أو مكرونة بحد أقصى مرتين في الأسبوع, مقليات مرة واحدة, أكل من بره مرة واحدة,, و هكذا,,

وزني فضل ينزل non-stop بالشكل ده لحد ما كنت قربت على 65 كجم في فترة حوالي 5 شهور, الشهرين اللي فاتوا زدت تاني شوية, كيلو في التاني, لحد ما أستقريت دلوقتي على 69~70 كجم

بس عموماً الميزان مهواش وسيلة القياس المناسبة للراجل بسبب وزن العظام و العضلات, فيفضل تقيس دايماً الـprogress اللي بتحققه عن طريق المراية, في الشكل العام و في الملابس..