اقتراحاتكم لشهر العسل؟

**Mohab.Nabil** · 19-07-2015 04:32 PM

المشاركة الأصلية كتبت بواسطة punisher

بصراحه انتخه وبحر ومش طالب اكتر من كده

بس خطيبتي طالبه معاها صحرا وسفاري وتخييم .... عكسي تماما

بس ف الغالب كده ان شاء الله سهل حشيش لاني مش بحب الاماكن المزدحمه وكمان من كلامك شكل مستواها راقي جدا

لو على الانتخة و البحر يبقى تمام بس خلى بالك ان البحر هناك طبيعته مختلفة شوية يعنى لازم بتمشى على كوبرى عشان تدخل جوة البحر و تقدر تعوم و العمق بيبقى جامد لأن فى العمق القليل فيه شعب مرجانية و صخور متخليش حد يقدر يعوم فيها .. بس طبعا فيه حمامات سباحة برضه ممازة ..

بالنسبة للسفارى اظن انك ينفع تعمله لأن كده كده بتيجى عربية اللى بينظموا السفارى و تاخدك لمنطقة السفارى و ترجعك الفندق ( مش متأكد متوفرة فى سهل حشيش ولا لا بصرااحة )

هى فعلا مستواها راقى جدا و هادية جدا و مريحة للاعصاب

**Mohab.Nabil** · 19-07-2015 04:34 PM

المشاركة الأصلية كتبت بواسطة punisher

من ضمن الاماكن اللي اقترحتها عليا

طابا
نويبع
جنوب سينا
دهب
مرسي علم

ايه الفرق بينهم وبين سهل حشبش

انا مرحتش الا دهب بس من زمان اوى من حوالى 7 سنين او اكتر

دهب جوها كان هادىء و حلو برضه و البحر كان رائع الجمال فيها بصراحة احسن من سهل حشيش كبحر

بس معرفش الدنيا حصل فيها ايه فى الفترة الطويلة ديه

الاماكن التانية للاسف مرحتهاش فمش هقدر افيدك

**bekatcho** · 19-07-2015 05:38 PM

لو عايز برة مصر تعالى جورجيا بال15000 الف تقضى اسبوع او 10 ايام جمال فى باتومي المدينة الساحلية وتبليسى العاصمة

تذاكر الطيران رايح جي بالفيزا بحوالى 8000 ليكم انتو الاتنين والباقى اقدر اجبلك بية شقة وتتفسح وتبقى طلعت برة البلد

**grumby78** · 20-07-2015 05:13 AM

خارج مصر الرقم ده يوديك :
دبي تذكرة طيران ليكم الاتنين مش حتعدي 5000 والفيزا للفرد حوالي 1000 يعني 7000 تقريبا والاوتيل اختار حاجة معقولة جنب المترو عشان تتحرك بأقل التكاليف .. بس دبي مكان للصرف ودايما حتحط ايدك في جيبك ..
ممكن اليونان برضو تختار حاجة من جزرها ولتكن مايكوناس لاني اسمع انها جنة ..
ماليزيا او تايلاند برضو اختيار واغلى مافيهم الطيران .. ماليزيا بدون فيزا ودي ميزة وتايلاند بلد جميل وممكن تعيش فيها سكن واكل باقل التكاليف ..
لبنان برضو في الميزانية هيا وتركيا ,, لبنان تقريبا الفرد ب 4000 طيران واقامة ومش محتاج فيزا لوكان معاك وقت الدخول 2000 دولار كاش .. تركيا في نفس السعر للفرد وخيار جيد ..
اوروبا حتقرفك في الفيزا وغالية فيما عدا اليونان واسبانيا ..
داخل مصر الرقم ده واقل يوديك :
اوبروي سهل حشيش وده رقم واحد في الغردقة ولكن يعيبه انه فندق b&b يعني فطار بس وسعره كاسر ال 1200 في العادي في اليلية للغرفة المزدوجة وحتقضيها غذاء وعشاء في المطاعم وحتدفع كتير .. ميزته انه اجنحة كله وفيها خصوصية جدا
في كمان كمبينسكي سوما باي وهو تقريبا نفس المستوى ..
مرسى علم وطابا فيه فنادق ممتازة برضو .. دور في booking , tripadvisor والدنيا حتتظبط معاك .. مبروك مقدما

**M.Elwan** · 20-07-2015 06:04 AM

بيروت اختيار مناسب وخصوصا لو رحت جونيا
وفى اختيار ارخص وافضل هو المغرب التاشيرة بتاعتها ب200 جنيه واهم ميزة هى العملة هناك رائعه لان الدرهم ب90 قرش تقريبا يعنى بتعيش هناك مستريح وبتعرف تخرج وتصرف براحتك احسن طبعا من اوروبا وارخص من بيروت برده
البلد منظمة جدا ونضيفه جدا
طبعا لازم حتروح كازابلانكا عشان البحر وممكن وانتا هناك تركب القطر تروح بيه مراكش ب 90 درهم لو عاوز تعمل شوبنج كمان
وممكن تاجر عربيه هناك لوجان او i10 تقضى بيها اجازتك بس خلي بالك لو ركنت مخالف او نسيت الحزام مبيهزروش فى الموضوع ده هناك

**punisher** · 20-07-2015 03:46 PM

جورجيا ... اول مره اسمع بيها خالص بس مش ميال ليها اوى

دبى ... اخويا بيشتغل هناك واقترح عليا اروح ويظبطلى كل حاجه .. بس هيكون هناك هوا ومراته وعياله ... ف حسيت مش هيكون فيه خصوصيه

أوروبا مستبعده بردوا

تركيا روحتها مره .. بس مشكلتهم ف اللغه ... مفيش انجليزى غير قليل اللى يفهمك

ممكن لبنان

وممكن معلومات اكتر عن oberoi سهل حشيش ... يعني هل الغرف كلها على البحر ولا لازم اطلب انها تكون على البحر .. وتقريبا كده اسعار المطاعم ايه