الموضوع: الناس مالها كده مغيش اي زوق وﻻ جدعنه

معلش ياباشا محدش يخرج فى العيد ويقول الشباب خلصت اكل ومش عايزه تقوم

فــ العيد متخرجش من البيت خالص .

فـ الأيام العادية متخرجش بردو .

دور علي شغل يكون من البيت . freelancer مثلا .

يفضل تعليم ولادك يكون online self study . المدارس مش هتزودهم غير إحتكاك بفئات ضاله .

تجنب مصر والمصريين لحد ماتسافر .. وفــ الغربه تجنبهم بردو .

يا أخي كأنك بتتكلم عني بالضبط

كنت في كارفور سيتي سنتر عندنا في إسكندرية تاني يوم العيد

وبرضه كنت عاوز أتغدى

رحت على منطقة المطاعم ...شوف نفس اللي حصل معاك بالضبط وهتعرف ليه دلوقتي ..

المهم ..شفت كل واحد من الأولاد عايز ياكل إيه والمدام برضه وعملت الأوردر

جينا بقى لأقذر لحظه ..إنك تتعامل مع الناس وتشوف مكان فاضي

مش عايز أقولك بقى ..ناس حاجزه كراسي عشان تقعد عليها الشنط بتاعتها

ناس لغاية ما قامت وسابت المكان وإنت متعرفش أصلا مين اللي كان حاجز الكرسي الفاضي اللي كان في القعده ..يعني لما رحت أستأذن في الكرسي قالولي محجوز ..ولغاية ما قاموا اللي محجوز ليه الكرسي ده مجاش

ناس سايبين طفله عندها تلات سنين هي وأخوها اللي ميفرقش عنها كتير في السن وكل واحد واخد فيهم كرسي لوحده وهما أصلا مش موجودين ..اللي هما الأب والأم ..يعني ممكن أي حد يسحب عيل من الإتنين ولا حد هيحس بيهم

مكانش في حل قدامي غير إني أشوف أي حد بيقفل وخلاص ناوي يقوم وأول ما قام حتى ما أستأذنتش منه ..قمت ساحب الكرسي من تحت منه ...أنا متهيألي لو فكر يرجع يقعد تاني في نفس اللحظه كان هيقع لإنه ما أخدش باله إني سحبت الكرسي منه لإني كنت واقف في ضهره ..وطبعا المدام فضلت مستنيه لغاية ما لاقت واحده سوريه كانت مخلصة أكلها وأول ما قامت أخدت منها كرسي ..وكان في كرسي واحد ساحبه وماشي بيه وحطه قدام ترابيزه وسابه ..تقريبا راح يجيب كرسي تاني قمت أنا واخده ...

آه ..ده غير الناس اللي خلصت طفح طبعا وقاعدين مفكرين نفسهم قاعدين في كافيه ..قاعدين بقى ضحك وهزار وشغل كله قلة ذوق وهبل ..

المكان ده مخصص للأكل بس ..ومعمول مخصوص لمرتادي المطاعم دي ..يعني حضرتك بتقعد على الكراسي دي فري ...ما بتدفعش مقابل خدمه..وده مقابل إنك تخلص أكلك وتقوم تسيب غيرك يقعد ..هما بقى سايقينها ..يخلصوا أكل ..ويقضوها قعاد ولعب في الموبايل والتاب ..وأهي قعدة ببلاش كده

نفس اللي بيحصل معايا بالضبط لما أبقى في باركنج ..ومش لاقي مكان أركن فيه ..وألاقي واحد ركب عربيته هو ومراته وعياله والمفروض إنه هيطلع بالعربية ...أبص ألاقيه بعد ما ركب العربية قاعد مكانه ما بيعملش حاجه ..وقاعد يرغي مع المدام ..أفضل أنا واقف بتاع عشر دقايق وهو عمال بيرغي..ولا دور عربيته ولا طلع من مكانه ..أو تلاقيه قعد يلعب في الموبايل ..الله ..طيب ما دام ركبت عربيتك إطلع بقى وسيب المكان لغيرك ..لأ ..ده تلاقيه طالع يكمل الخروجه بتاعته في العربية ..

فعلا ..حاجه تغيظ