شراء شقة في الزقازيق

**dongol123** · 20-07-2015 03:55 PM

السلام عليكم و رحمة الله

الموضوع باختصار ان زوجتي من الزقازيق و احنا عندنا شقة في القاهرة و عايشين بره مصر و كل ما انزل زيارة لاهل زوجتي بصراحة مش ببقي مرتاح في القعده في بيت غريب لذلك نوينا نشتري شقة لا كبيرة و لاصغيرة يعني حاجة في حدود 120 متر

ظروف وجودي خارج مصر مخلياني مش عارف ايه هي المناطق الكويسة و الاسعار بقت كام فانا نويت انزل اجازة في منتصف الشهر اللي جاي علشان ادور علي حاجة معقولة

انا عارف ان في ناس كتير في المنتدي من الزقازيق و يا ريت يدلوني علي المناطق الراقية ورنج الاسعار و كمان لو فيه سمسار كويس يا ريت يدلوني عليه

**M!SHO** · 20-07-2015 04:44 PM

دور في الزهور بس اعمل حسابك المتر من اول ٤٥٠٠ وانت طالع

ممكن تشوف الغشام شارع جديده بس مش راقي اوي

ابعد عن القوميه خالص خصوصاً لو مش شوارع رئيسيه ، ممكن الڤلل بس الاسعار فيها معديه

محتاج تحدد الميزانيه الاول ، اعمل حسابك ان الشقق في الاقاليم اغلى من القاهره

**Ahmed_Morsy** · 20-07-2015 05:14 PM

انا زيك تقريبا لسة نازلين مصر وبالتحديد الزقازيق والی حد كبير عندی خلفية عن المناطق والاسعار بعد لف وتدوير لشراء شقة للسكن
حضرتك حدد الفلوس الاول وان شاء الله افيدك

**dongol123** · 20-07-2015 07:11 PM

المشاركة الأصلية كتبت بواسطة m!sho

دور في الزهور بس اعمل حسابك المتر من اول ٤٥٠٠ وانت طالع

ممكن تشوف الغشام شارع جديده بس مش راقي اوي

ابعد عن القوميه خالص خصوصاً لو مش شوارع رئيسيه ، ممكن الڤلل بس الاسعار فيها معديه

محتاج تحدد الميزانيه الاول ، اعمل حسابك ان الشقق في الاقاليم اغلى من القاهره

شكرا لردك... انا ميزانيتي لغاية ٥٠٠ الف

معلش القومية لا ليه.... انا اسمع انها من المناطق الكويسة في الزقازيق

**dongol123** · 20-07-2015 07:12 PM

المشاركة الأصلية كتبت بواسطة ahmed_morsy

انا زيك تقريبا لسة نازلين مصر وبالتحديد الزقازيق والی حد كبير عندی خلفية عن المناطق والاسعار بعد لف وتدوير لشراء شقة للسكن
حضرتك حدد الفلوس الاول وان شاء الله افيدك

ميزانيتي هية ٥٠٠ الف وعايز شقه ما تكونش في منطقه عشواءية

**volociximab** · 20-07-2015 08:17 PM

الزهور و عند موقف المنصورة
و كده كده انت جنب القومية
فيه شقق رخيصة عند المصرية بلازا ماعرفش ليه
انا شخصيا مبحبش القومية باتخنق منها
مشكلة الزقازيق اسعار غالية جدا و شقق غير مرخصة و مبنية بعد الثورة بالمخالفة و علنى
يعنى كلمت شركة قالولى البرج لغاية الدور الرابع مرخص و بعدين لغاية الدور 11 غير مرخص
ماعرفش بقى مبنى حلو و لا ورق
و اعرف واحد شارى فى الزهور شقة ب700 الف و غير مرخصة
لو ميزانيتك اعلى ممكن اقولك شوف ابراج المحلج
لو عايز ارقام سماسرة ممكن ابعتلك على الخاص انا لفيت عليهم واحد واحد عشان شقة اتزوج فيها و فى الاخر سكنت خارج الزقازيق

**volociximab** · 20-07-2015 08:20 PM

طبعا ابعد عن شارع فاروق
ابعد عن البرج الابيض فى شارع فاروق لانه فيه تقريبا مشكلة على الارض
ممكن تلاقى قبل التجنيد و عند الزراعة بس تعتبر منطقة امتداد شارع فاروق و مش مستوى قوى
لو مسكنتش فى منطقة نظيفة فى الزقازيق متسكنش احسن

**assaf** · 20-07-2015 10:54 PM

شوف عند منطقه الغشام المنطقه قريبه جدا من القوميه و بالسعر دا ممكن تلاقي هناك

**nilmaster** · 21-07-2015 12:22 AM

زى ما الاخوة قالوا ممكن تجيب بالميزانية دى شقه فى منطقة الغشام الزقازيق بقت زحمة جدا جدا واسعار الشقق مرتفعه جدا واغلى من القاهرة.

**Ahmed_Morsy** · 21-07-2015 01:21 AM

بص حضرتك سيبك من القومية لانها زحمة جدا ومقرفة تقريبا كل الناس بتخرج فيها وخصوصا المناسبات ويوم الخميس وطبعا معاكسات ولبس وقلة ادب
عندك الغشام فيها شوارع 8 وفيها شوارع 10 ميزتها انها لازقة فی القومية اللی فيها المصالح ومحلات اللبس والمطاعم الخ ومعظم اللی ساكنين فئة راقية اطباء ومهندسين واساتذة جامعة ولكن لسه جديدة ومش زحمة وليها 3 مداخل وبالميزانية ده ممكن تجيبلك شقة علی الرئيسی بس فی حدود 110 متر
عندك الزهور او المعلمين وده حتة راقية جدا وقصاد الجامعة وشوارع واسعة وهادية خالص
وعلی فكرة كنت شوفت شقق عند الزراعة 120 متر تنفيذ شركة مش مالك وحتة راقية والسكان ناس محترمة وبعيدة تماما عن الزحمة وجمبك بالظبط هايبر ماركت ومسجد محترم بس للاسف كنا دفعنا مقدم شقة تانية وكانت320 الف ولكن لقطة الحقيقة