محتاج الكل يدخل ضرورى بخصوص العلاج بالقران
ازيكم ....
انا معلش مواضيعى بتاعت مشاكل معدتى المزمنة كتيرة هنا فى المنتدى يمكن تكونو زهقتكم بسببها بس اهو الواحد بياخد برايكم
الموضوع ان انا معدتى متبهدللللللللللللللللله بقالى 3 سنين نزلت بوست على الفيس بوك على جروب كبير انا مشترك فية والناس الى فية محترمة قلت يمكن حد يفدنى
دا نص البوست
انا مش عارف ابتدى منين بجد انا شب 28 سنة متجوز ولسه مخلف بنت بقلها اسبوعين ومش قادر افرح بيها من تعبي وبقيت انسان مدمر نفسيااااااا وجسمانيا وصحيا
طول عمرى وانا ضعيف اصلا وزنى 55
عمرى متعبت تعب جامد ولا كان بيجيلى مغص ولا ترجيع ولا الكلام دا خالص
لحد الشهر الكئيب شهر 2 سنة 2013
كلت اكلة من الشارع مكرونه بالكبده روحت نمت
قومت تانى يوم ترجيع و مغص لمدة اربع ايام وتركيب محاليل والذى منة لحد مفوقت قولت خلاص بقيت كويس
بعيد عنكم لحد النهردة كل يوم الصبح الم ووجع رهيب فى المعدة مع لاما ترجيع لاما احساس بالترجيع ويستمر لحد العصر وبعدها افوق
تخيلو بقالى تلات سنين كل يوم عدد الساعات الى بقدر اكل فيها واتنفس ميكملوش 10 ساعات
لو كلت اي اكله تقيله شويه تاني يوم اتبهدل ترجيع ومغص واحيانا مكنش واكل اصلا واتعب بردو الصبح
روحت لاكتر من 15 دكتور اخرهم اكبر دكتور جهاز هضمى فى مصر علشان تكشف عندة لازم حجز قبلها بشهر اسمة محمد عبد الوهاب فى المنصورة
ادانى علاج ريحنى اسبوع بالكتير
ورجعت تااااااانى روحت لدكتور مشهور اوي عندي في القاهره اسمه نبيل القاضي قلي شويه التهابات خفيفه مع حاله نفسيه سيئه. واداني العلاج وهوب شهر وتعبت تاني
اشاعات وعملت مناظير وعملت وعملت كل التحاليل الموجودة للجسم والكبد واى نيلة
مفيش اى امل
انتحر ولا اعمل اية محدش يقولى روح لدكتور تانى انا روحت ل 15 دكتور كل واحد براى غير التانى
الى يقولى جرثومة معدة ويديني كورس ليها والى يقلى مفيش حاجة اسمها جرثومة المعدة دنتا عندك تيفود
والى يقلى ارتجاع فى المري ومعدتك حساسه اوي والتهاب فى المعدة كل واحد براى شكل
خلاص مبقاش عندى حاجة تانى اقولها
اسف على الاطالة بس محتاج افضفض من التعب والياس الي وصلتله يمكن حد يكون مر بنفس التجربه وربنا كرمه يقلي عمل ايه
اخيرا. بالله عليك متاكل من الشارع تاني اديني حاله مدمره قدامك اهو
البوست دا جالى علية 300 تعليق واكتر من 30 واحد دخلو يكلمونى خاص يقولولى ازاى خفو
من ضمن الناس دى كذا حد يقسم بالله انة نفس حالتى بالظبط ومخفش غير عن طريق شيخ
فوجئت بتصال واحد منهم صباحا قعد يوصفلى الى كان عندة والتعب مماثل تماما وبردة بقالة تلات سنين زى تعبان احد الاشخاص نصحة بشيخ اسمة محمد فى الاسماعلية رحلة وقال بجملت المشاوير لقا طبور وبتاع وعربيات كتير لناس داخلة
قلة اقعد على ضهرك وحد صبعة على رجلية وقرا قران قام صاحبنا حس بمسمار بيدخل مكان صباع الشيخ قلة قوم انتا شارب عمل تقريبا او حاجة زى كدا مش متذكر
الشيخ ادالة حجات يحطها على الاكل . بيقسملى بالله ان من سعتها مرتاح بقالة 7 شهور
والراجل دا من الشرقية عارض عليا لو عوزنى اقبلة او يخدنى يودينى حتى بدون اى مقابل وبيقول انا عايز اعمل خير لله فيك لان عارف العذاب الى انتا فية
فانتو اية رايكم اروح ولا اعمل اية وهل فعلا فية علاج كدا