-
وللأسف مافيش توكيل نيسان في شرم الشبخ ومضطر أتعامل مع من أحسبه في ظني أشطر ميكانيكي
-
-
شوف يا أستاذ محمد
اللي حضرتك بتقوله ده أنا عانيت منه مرتين وكنت مستغرب جدا إن العربية بتسخن في الطريق السريع أكتر من البطيء على عكس الطبيعي
المرة الأولى كانت عربية تويوتا كرولا وروحت لبتاع الريدياتير خليته فكه وسلكه وفعلا كان معظم المواسير مملحة ومسدودة وبعد التسليك العربية بقت تمام التمام ومسخنتش خالص والمشكلة اتحلت والحمد لله
السنة اللي فاتت اشتريت عربية بيجو 307 مستعملة ولاحظت نفس المشكلة وانا مسافر ومكنش عندي حل وقتها إلا ان السرعة متعديش ال100 لغاية مارجع واعمل موضوع الردياتير ده
وبالفعل عملت صيانة للردياتير ودورة غسيل وغيرت المياه الخضرا وكل حاجة ولكن فضلت المشكلة
رحت لواحد تاني بتاع ريدياتيرات وخليته فك الريدياتير تاني وسلكه قدامي وقالي انه مش مسدود وبرضو فضلت المشكلة
فضلت الف من كهربائي لميكانيكي لمركز خدمة متخصص وفي الآخر واحد عرف يشخص العيب بإنه جوان وش سلندر
اشتريت الجوان ورحت اغيره لاقيت إن وش السلندر نفسه فيه تأكل وصدى فغيرت الوش بواحد تاني استيراد والحمد لله تم حل المشكلة
وبما إن حضرتك جربت موضوع الردياتير ومنفعش فأعتقد إن إحتمال الجوان وارد جدا
وإن شاء الله تنتهي من المشكلة دي لأني عارف مدى الخنقة منها وخاصة إن الحرارة العالية ممكن تسبب مشاكل تانية كتير
-
عاوز أقولك ثرموستات كوع ..بس مش هعرف ..لإن ثرموستات الكوع تسخن معاك على السرعة البطيئة مش العاليه
حضرتك لما بتفك الريداتير وتغسله ..بتسيخه ولا بتغسله كده وهو مقفول ؟؟؟
-
يا فندم بنسبة 90% ان شاء الله ده ثرموستات دورة المياه غالباً كده محتاج تغيير نفس المشكلة حدثت معي ورحت توكيل السبع ربنا ينتقم منهم عملولي حوار وعايزة تغيير رادياتير وبيقولي ممكن جوان وش السلندر قلتله غيرلي الثرموستات وملكش دعوة بالباقي والعربية تمام وزي الفل الحمد لله كان بيقولي الرادياتير بايظ بالذمة في رادياتير في الدنيا لو بايظ امشي بيه أكتر من 20 ألف .. من الاخر توكيل السبع نصابين ...
-
ممكن تستحملني شوية.......
خلي الميكانيكي يلغي ثرموستات الكوعة ..واطلع جرب .
.لو المشكلة اتحلت يبقى منها...لو متحلتش شوف ميه الريداتير بتنقص او لا ..لو بتنقص يبقى جوان وش السلندر ...ومعلش جرب تكشف على علبة البيئة بالمرة
بنسبة 99% جوان وش السلندر لانك بتقول ان الميه سخنت لدرجة انها اتبخرت تماما..معنى كده ان الجوان باظ ومبقاش حابك دورة الميه وبيسرب الميه لغرف الاحتراق وطبعا مع السرعة العالية الموتوتور بيسخن اكثر ف الميه تتبخر بسرعة ..لكن سواء انت ع السلانسية او العربية على البطئ الميه هتتبخر ....\
جرب تملى الريداتير وروح مشوار على سرعة منخفضة وبعدين شوف الميه لمى العربية تبرد..هتلاقيها نقصت....
-
كان فى زميل هنا كان عنده نفس المشكله وعمل كل حاجه واخيرا كان عيب طرمبه المياة
طرمبه الميه صدت والريش تاكلت فكفائتها قلت
فبالتالى على السرعات العاليه, المحرك بيسخن اكتر ومش لاقى تبريد كويس فبيسخن
دائما ابتدى بالسهل وخلى جوان وش السليندر اخر حاجه
الجوان ليه اعراض زى فقاقيع فالميه - دخان - استهلاك بنزين عالى
يارب اكون فدت حضرتك
-
-
شوف يا باشا
انا كان لى صديق معاه عربية فيرنا ، كان فيها المشكلة دى
وكانت من السخونية بتسبب فى احمرار فرن الشكمان
حاول يحلها بكذا طريقة ، الراديتير ، مياه التبريد ، نزل فحم علبة البيئة ، تغيير الشكمان بالكامل ، الثرموستات ، مراوح التبريد ، .... وغيرها
بس لما داخ راح لواحد تقريباً فى دمياط ، او اسكندرية حاجة كده يعنى
وكان دوره انه يقوله بس على العيب فين ، ويوديه لواحد كويس يعمله
العيب كان فى الكهرباء ، السلك الارضى ، مع السرعة العالية بيسخن العربية
وكان دور الكهربائى ، مراجعة جميع اسلاك الكهرباء والاسلاك الارضى ويتأكد من توصيلها بشكل جيد والاسلاك اللى فيها مشكله يغيرها
واتحلت المشكلة عنده ، والحمد لله
حاول تتأكد من توصيل الاسلاك الارضى كويس فى العربية
-
Content Relevant URLs by
vBSEO 3.6.0 PL2