الزملاء الاعزاء حاصلت معايا مشكله في العربيه وكنت محتاج مشاركتكم ورايكم فيها :

عربيتي نيسان صني سوير صالون موديل ٢٠١٢ الشكل القديم عامله ١٩٠٠٠ كيلو.
توجهت للسبع قبل رمضان باسبوع لعمل صيانه ٢٠،٠٠٠ وتم عمل الصيانه واستلمت السياره بدون مشاكل اللهم ان نشوفيه في العفشه علي عكس قبل الصيانه وفسرت الموضوع بسبب تدوير العجل وتفاوت الضغط وممكن يكونوا ظبطوا هوا وهي اساسا كان يها نيتروجين فقلت دا السبب ومشيت بيها طول رمضان كدا بدون اي مشاكل تذكر الا نشوفيه العفشه زي ما ذكرت.
قبل العيد باسبوع (يوم الجمعه تحديدا) توجهت لبنزينه وطنيه اللي قبل سيتي ستارز وفضيت العجل من الهوا ومليت نيتروجين وظبطت الضغط العربيه بقيت انعم في المطبات بشكل واضح.. لكن حسيت ولاول مره منذ امتلاكي العربيه بان العربيه خفيفه جدا جدا واحساس بعدم الثبات وشكيت بان الضغط يكون عالي ومحتاج اعاده تظبيط.
يوم السبت رحت بالعربيه الشغل وانا نزل من اخر نزله في كوبري اكتوبر (نزله ميدان الدقي) العربيه انحرفت مني جامد واتنقلت من حاره للحاره التانيه ولولا ستر ربنا ان مكانش حد نازل جنبي كانت حصلت مشكله وطبعا مخدتش في بالي وفسرت الموضوع ان في زيت او جاز مدلوقين في الطريق وهو اللي سبب كده .
طول الاسبوع اللي قبل العيد نفس الاحساس بخفه العربيه وعدم الثبات واحساس الفرامل مختلف .. رحت مكان تاني وقيست ضغط العجل لقيته مظبوط قولت اسافر بيها كده وان شاء الله مفيش مشاكل.
سفرت بيها اسكندريه في العيد طبعا احساس مرعب من عدم الثبات طول الطريق خصوصا عند زياده السرعه واي عربيه صغيره تعدي من جنبي بحس بخلحله الهوا كان اتوبيس كبير معدي من جنبي والاحساس ده كل اللي في العربيه معايا حاسيين بيه وطبعا نفس الاحساس وانا راجع لدرجه اني لو سبت الدركسيون العربيه بتحرف مني جامد في الطريق .
كلمت احد الاصدقاء من اهل الخبره فالي ممكن يكون تيارات الهوا تكون شديده وهي اللي تعمل كده .
وانا راجع عديت علي بريدجستون فرع صلاح سالم قولت اراجع الزاويا والترصيص وضغط العجل الفني طلب مني اطلعها علي الرافعه وقالي بتحس بايه حكيتله الموضوع نزل بص عالعجل وقالي العجل ده صلاحيته منتهيه ؟؟؟
طلبت منه توضيح اكتر قالي العجل انتاج ٢٠١١ ومر عليه اكتر من ٤ سنين وهو ده سبب كل المشاكل وانه مبينصحش بعمل اي شيء من زوايا وترصيص الا بعد تغيير العجل وبصراحه هو محسسنيش اني مجبر اغير عنده او انه بيعمل شغل عليا وفهمني ان ده من بروتكول الشغل عندهم طالما العجل منتهي صلاحيته مش بيشتغل فيه ونصحني بتغييره في اقرب وقت وعدم السفر عليه وقالي انه ممكن يظبط زوايا ويرصص وياخد فلوس بس كل ده هيبقي في الفاضي عشان مشكله انتهاء صلاحيه العجل مع ان العجل جديد وبنقشته بدون تاكل او تششققات ولا خوابير وعمره ما اتفك ولا ريح من ساعه شراء العربيه.
هل الكلام ده منطقي وده سبب المشاكل اللي انا حاسس بيها وهل لو غيرت العجل دلوقتي المشكله هتتحل ولا في حد ليه راي تاني .. وهل لو انا رحت لاي ورشه عاديه كان قالي الكلام ده ولا كان دور عالعيب فعلا وعمله.
اسف لو طولت عليكوا بس كان لازم اشرح الموضوع بالتفصيل عشان يبقي كل شيء واضح.