هل انتا ماشى بعربيتك مخربشة ومخبطة ولا مفهياش اى شئ

**فادى** · 19-11-2008 10:39 AM

انا ماشى بالعربية حاليا و فيها الأتى :
الرفرف اليمين مدعوك نتيجة لاصطدامى بميكروباص من 3 شهور.
الرفرف الشمال داخل لجوه نتيجة لحادثة بسيطة مع ميكروباص اخر من حوالى 5 شهور.
الشبكة متدمرة و الفوانيس اللى قدام الأمامية و الجانبية لم تعد موجودة بفضل اصطدامى بتاكسى.
الباب الشمال واخد خبطة بطوله معرفش منين بقالو بتاع سنة.
الرفرف الورانى واخد خبطتين واحدة من الجنب و واحدة فى العضم من حوالى سنة, اللى فى الجنب كانت بحسب شهادة الشهود خبطة انتقامية من ست قرشانة كانت بتعاقبنى عشان راكن و سادد حتة صغيرة من الجراج, و من ساعتها و انا بركن ادام الجراج بتاعها كل يوم كنوع من الغلاسة!
و لسه مكسل اعملها, بس غالبا هعملها قبل العيد عشان اعرف اسافر.

**sherif_habeb** · 19-11-2008 10:51 AM

كل العربيات مطخبطه من بره حتى لو زيرو!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!!!!!!
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!

**أحمد سالم** · 19-11-2008 11:02 AM

والله انا كنت راشش عربيتى وصارف عيها حوالى 1500 جنيه
ولمعتها وخليتها عروسه ركنتها عند البيت يوم وتانى يوم الصبح نزلت السعة 8 صباحا لقيت واحد ابن حلال من اولاد المدارس اكيد و عاملى تذكار على العربيه
بمسمار وجاب جنب العربيه من الاول للاخر
بعدها بكام يوم واحد صاحبى خد العربيه وراح بيها البساتين لمدة ساعة ورجع
لقيت ابن حلال تانى عاملى تذكار برده بس المره دى تذكار فن تجريدى
عامل على كل رفرف من العربيه من وره صليب بالمسمار
بعدها بشويه كنت ماشى فى المعادى واخد الشمال وماشى فجئة طلعلى مينى باص بتاع الهيئه باين كان بيركب حد ولع فجئة من اليمين لاقصى اليسار بدون مايبص فى المرايه طبعا زنقنى فى الرصيف وظبطلى الجنب والله مالحقت اتهنى بالفلوس اللى دفعتها فى العربيه
بالاضافة طبعا ان دلوتى ارقى شوار مصر بقى فيها حفر ومطبات غير ادميه
يعنى الاول الواحد كان بيقول مصر الجديده ومدينة نصر شوارعها نظيفه من الحفر الومطبات كانت هناك شبه مطابقة للمواصفات
اما دلوقتى مافيش خيار وفقوس
وكلها شوارع زى الزفت بتخلى الواحد مش مستمتع حتى بالسواقه
لهذا السبب انا مش بجدد العربيه وخليها زى ماهى علشان حتى الجماعه اللى حطولى عليها العلامات التذكاريه دى مايزعلوش

**msms90421** · 14-02-2009 07:05 AM

الجنب اليمين من الصدام الامامي عندي مكسور والفانوس الصغير مكسور
والباب الامامي الشمال في خدش جامد داخل لجوة من توكتوك
في جدش بطول السيارة واحد بموتوسيكل كان لسه بيتعلم جابها من اولها لاخرها
واخيرا خبط في عربية نقل جابتلي الربع اللي ورا شمال بعد الباب الخلفي اتطبق
و الصدام الخلفي عندي متشعلق في الهوا مكسور بسببها برضو
و الفانوس الورا شمال الاشارة بتاعته مكسورة بس لسه بتنور والحمد لله
الحمد لله بتمشي

**karimone** · 14-02-2009 11:12 AM

كام خربوش يمين علي كام خربوش شمال و اهي ماشيه...

**sNIPER_007** · 23-02-2009 01:06 AM

خط مسماري بطول العربيه من الجانب الشمال
حكات وتجاريح ف الاكسدصام الامامي
الفانوس اللي ورا مكسور وحاطط عليه ورقه حمرا كده ممشيه الامور لحد ما يتغير بقه في الخطه الخمسيه

**pro_samir** · 23-02-2009 01:44 AM

اية المشكلة يعنى لما تبقى راكن العربية وناس بتطلع عفش بحبل من البلكونة والعفش يقع على العربية يدمرلك الرفرف

ولا اية المشكلة لما تبقى راكن اقصى اليمين ومشغل انتظاروالطريق كلة فاضلى اصلا و بعدين تسمع بييييييييب و موتسيكل يلبس فيك يكسرلك الفانوس الخلفى

ومش فاهم برضو اية المشكلة لما تبقى ماشى فى وسط الشارع ومرة واحدة توك توك يقطع عليك الطريق بدون اى مقدمات وتلبس فية تشوطة

وفيها اية يعنى لما تبقى راكن العربية قدام بيتك و تنزل تلاقى الكبوت مطبق والفانوس مكسور وبعدين تعرف من جارك ان واحد ابن حلال بعربية كارو دخل فيها وهوا معدى

طبعا من نعم ربنا ان الواحد بينسى