ما هي اسباب زيادة استهلاك البنزين؟

عندي العربيه تيريوس 2000 استهلاك البنزين زاد اوي الاسبوع الاخير ده
ابص على ايه او ايه الاسباب ايللي تخلي استهلاك البنزين يزيد؟

البوجيهات
فلتر الهوا
طرمبة البنزين

استهلاك البنزين يعتبر أكبر مؤشر على صحة العربية.. لإن أي مشكلة في أي حاجة ليها علاقة بحركة العربية بتأثر بشكل مباشر أو غير مباشر في استهلاك البنزين...

وفعليا.. ممكن يكون سبب زيادة استهلاك البنزين مش سبب واحد... وتقدر تقول كمان إنه مالوش مكان محدد في العربية... إنما ممكن يكون جاي من أي شيء في العربية.


وباختصار... العملية كلها هي عبارة عن العلاقة بين الطاقة الخارجة من الموتور واستهلاكها من العربية في المقابل.. واستهلاك البنزين عموما بيزيد لما بنلاقي استجابة العربية مش زي ما إحنا عايزين أو متعودين.. وبالتالي بنضطر ندوس بنزين أكتر علشان ناخد اللي احنا عايزينه.


من وجهة النظر دي .. لازم نقسم الأسباب لجزئين أساسيين..

أولا: أسباب متعلقة بإنتاج الطاقة

ودي هي الأسباب اللي بتخلي الموتور ما يطلعش الطاقة اللي المفروض يطلعها وبتخليه أضعف.. باختصار دي الأسباب المتعلقة بدورة الوقود والإشعال وكفاءة الاحتراق في الموتور.

1- دورة الوقود:

يعني لازم نتأكد إن البنزين بيوصل بكفاءة إلى الموتور ومفيش حاجة معطلاه.. عشان كده لازم نتأكد من:

* البنزين المستخدم الأوكتان بتاعه مناسب للموتور.
* فلتر البنزين نظيف ومش مسدود.
* طلمبة البنزين شغالة كويس.
* خطوط وخراطيم البنزين سليمة ومفيهاش تشقق أو بتسرب.
* دورة الوقود نظيفة ومفيهاش ترسبات تعوق تدفق البنزين بسلاسة.
* الرشاشات (في الإنجكشن) حالتها كويسة ومش بتسيل أو بتضخ بنزين زيادة عن الحاجة.

2- دائرة الإشعال

هنا لازم نتأكد إن الشرارة اللي خارجة من البوجيهات قوية بما يكفي لبدء الإشعال وكمان في التوقيت المناسب.. وبالتالي لازم نتأكد من:

* الموبينة سليمة وبتطلع كهربا بكمية كافية.
* توقيت توزيع الشرارة سليم ومتناسب مع سرعة الموتور.
* أسلاك البوجيهات سليمة ومبتسربش كهربا
* البوجيهات بتوصل كهربا بكفاءة عالية ومش مرطبة.

3- كفاءة الحريق

لازم نتأكد إن احتراق البنزين بيتم بشكل كامل علشان يدينا أكبر كمية ممكنة من الطاقة عن طريق ضبط خليط الحريق.. فلازم نتأكد من:

* نظافة فلتر الهوا.
* نظافة مجاري الهوا.
* برودة الهوا بالشكل الكافي. (السواقة في الجو الحار تزيد الاستهلاك)
* سلامة حساسات الأيدل والعادم وأي حساسات تانية ليها علاقة بخليط الوقود والعادم.

4- حالة الموتور الميكانيكية

يعني بعد التأكد من سلامة كل اللي فات.. نشوف بقى حالة الموتور الميكانيكية وإن ما بيحصلش حاجة تعطل أو تضيع الطاقة الناتجة... عشان كده لازم نتأكد من إن:

* التاكيهات مظبوطة.
* العادم بيخرج بسهولة والشكمان مش مكتوم.
* الشنابر سليمة وحاكمة كويس ومفيش تسريب للضغط.
* الصمامات حاكمة القفل تمام ومفيش تسريب للضفط.
* ثرموستات الكوعة شغال وسليم ودرجة حرارة الموتور دايما في المدى المضبوط (مؤشر الحرارة قبل علامة المنتصف مباشرة).

طيب .. كل اللي فات ده كنا بنتكلم على الموتور علشان نضمن إنه بيطلع الطاقة اللي احنا عايزينها..

إنما فيه أسباب تانية كتير بتستهلك الطاقة دي وتخلي استهلاك البنزين يزيد بدون داعي.

ثانيا: أسباب متعلقة باستهلاك الطاقة

الأسباب دي متعددة وكتير فعلا.. إنما مبدأها واحد.. هو المقاومة اللي بتواجهها طاقة الموتور علشان تحرك العربية..

وكل ما كانت المقاومة أقل.. كل ما استهلاك البنزين هو كمان بقى أقل..


1- مقاومة داخل الموتور

وأبرز سبب هنا هو استخدام زيت بلزوجة أعلى من المسموح أو الموصى بيه في الكتالوج.. ويفضل تستخدم أقل لزوجة ممكنة في الكتالوج حسب المناسب للجو اللي العربية هتمشي فيه.


2- المقاومة بسبب الأحمال على الموتور

وده المقصود بيه أي حمل مباشر على الموتور .. زي:

* أي وزن زيادة على العربية.. فكل ما كانت العربية أخف كل ما كان استهلاك البنزين أقل.
* أي أجزاء بتشتغل عن طريق طاقة الموتور بتعمل حمل زايد على الموتور... زي كمبريسور المكيف والدينامو وطلمبة الباور.

3- المقاومة بسبب الأجزاء الميكانيكية

أي تآكل أو خلل في الأجزاء الميكانيكية في العفشة والفتيس بتشكل إعاقة لحركة العربية وتزود استهلاك البنزين.. علشان كده لازم تتأكد من إن:

* الكاوتش مضبوط على الضغط الصحيح (على البارد) حسب المكتوب على قايم العربية.
* زوايا العجل مظبوطة.
* اسطوانة الدبرياج (في الفتيس المانيوال) سليمة ومش بتفوّت.
* زيت الفتيس الأوتوماتك مضبوط ومش ناقص أو عايز يتغير.

4- إعاقة للحركة على الطريق

وهنا المقصود أي شيء خارج العربية وممكن يكون له علاقة بأسلوب السواقة.. علشان كده لازم ناخد بالنا من التالي:

* الطرق غير الممهدة بتعمل إعاقة لحركة العربية.
* فتح الشبابيك أثناء السفر بيزود مقاومة الهوا ويعوق حركة العربية.
* وضع أجزاء بارزة على جسم السيارة بيزود مقاومة الهوا (شبكة فوق السقف - مصدات نيكل على الاكصدام.. إلخ)
* كل الطرق المتجهة لأعلى بتعمل حمل زيادة على الموتور.
* تعشيق النسب المنخفضة في الفتيس بيستهلك بنزين كتير بدون حركة سريعة.. يعني المشي الكتير على الأول والتاني... وده يشمل:

- المشي في الزحمة.
- الشد والحرق على الموتور.

الأسباب دول اللي فاكرهم دلوقتي..

معلش أنا طولت عليك.. بس علشان تسهل على نفسك.. أنصحك تراجع الأسباب بتاعت المقاومة الأول وبعدين تشوف الأسباب بتاعة طاقة الموتور.


...

الف الف شكر ليكو ربنا يبارك ليكوا كلكم على المعلومات القيمه دي

Fff

ده بحث شامل لزيادة استهلاك البنزين
راااائع

مجهود رائع

مشكوووووور والله يعطيك الف عافيه