اية رايكم في الخطوبة دي .. اكمل ولا افشكل ؟
عايز اعرف رايكم في موضوع مهم .. اختي مخطوبة بقالها سنة و طول فترة الخطوبة .. أهل العريس بيعملوااا موقف غريبة جدا بتحصل و بعد كدة أحنا بنعرف هما كدابين فيها ... يعني مثلا ... العريس اشتري شقة و قال ان الشقة بأسمة و ربنا كشف الموضوع دة و الشقة طلعت بأسم أمة .. و باباة مرضاش يكتبها بأسمة أصلا .. و العريس ملهوش شخصية خالص و اهلة متحكمين في الجوزة دي خالص .. يعني مثلا .. عايزين يجيبووو العفش علي زوقهم هما .. مش علي زوق اختي و العريس .. و دة دي ابسط حاجة .. و الاب متحكم بطريقة غريبة جدا .. و العريس مش بيعرف يتناقش مع ابوة بشكل نهائي .. و في حاجة تانية كمان .. يعني مثلا احنا من أول الجوزة دي .. مطلبناش دهب بسعر معين ... ولا غرفة نوم ولا عفش بسعر معين ؟ و قولنا اللي في مقدرة العريس يشترية يعني علي حسب فلوسة يشتري بية ... و من يومين كدة كان في مكالمة من أم العريس الي ام العروسة .. بتقولها .. انتووو هتجيبووو التالجة و البوتجاز نوعهم اية ؟ و بتسأل علي النجف و السجاجيد ؟ و مش عجبها غرفة الاطفال اللي العروسة هتشتريها ؟ و عايزة العفش يجي في يوم معين !!!!!! .. طيب احنا سبناهم علي مزجهم .. يشتررووو اي حاجة علي حسب مقدرتهم و مافيش تشرط خالص ... بيعملووو كدة لية ؟
وجهات نظر تفرح بس فى نقطة
اقتباس:
المشاركة الأصلية كتبت بواسطة mody1982
شوف يا باشا
موضوع ان الشقه بأسم امه او ابوه انا مش شايف فيه حاجه الا لو حضرتك عندك نيه انه لا قدر الله لو حصل انفصال في المستقبل تخدوها منه علشان تخلوه يتحسر و ميعرفش يتجوز تاني ( سامحني علي كلامي بس ده بيبقي الغرض في الاصل ان الناس تخاف تطلق زوجاتها خوفا علي الشقه انها تروح ليها بالقانون و ا لست بتاخدها عند علشان تحرمه من ا نه يتجوز تاني و يعيش حياه طبيعيه لان الراجل المنفصل سهل يتجوز تاني لكن الست المنفصله بيبقي صعب جدا تلاقي حد يرضي بيها فبتحب تخلي جوزها السابق حاله واقف زيه زيها)
ثانيا قد يكون مش اهتمامه باهله دليل علي بر الوالدين و ده معناه حلو لأن الراجل لازم نشوف بيعامل اهله ازي فلو بيتقي ربنا فيهم فأكيد هيتقي ربنا في اختك
ثالثا الحاجات التانيه ممكن تتحل في قاعده صغيره يتم فيها الاتفاق علي باقي التفاصيل
لا تتسرع بانك تنهي الخطوبه الا لو الشخص مش عاجبكم او راضيين بيه علشان هو عريس لقطه
لكن لو اخلاقيا و دينيا عاجبكم حاول تقرب وجهات التظر وربنا يتمم بخير
ربنا يتمم بخير..اوﻻ:انتو سألتوا على اهل العريس كويس؟ لو عاوز تعرف حد اسأل عنة فى شغلة او اسأل عنة جيرانة.. السؤال دة ممكن يدى فكرة نطبق مبدأ حسن النوايا وﻻ مبدأ الحذر..فيما يلى..
ثانيا اخوات العريس ظروفهم اية.. بمعنى ان الشقة لو تمليك على الوضع دة هتدخل فى ميراث بين العريس و اخواتة بعد عمر طويل لحماة العروسة.. ودة موقف حساس.. ثالثا العريس نفسة لو جرالة حاجة ﻻ قدر الله اهلة ممكن يستولوا على الشقة بطرف صباعهم حتى لو مرات اخوهم عندها عيال.. الحاجة للمادة بتغير النفوس وهيقولوا دة حقنا فى ورث امنا.. وممكن يبيعوا للغير و تكون اختك مقيمة وعفشها جوة الشقة..
بص يا اخى ..المسألة حساسة وخوفك على اختك له تقديرة واعتبارة بس انصحك تبعد بنفسك عن التدخل بشكل مباشر عشان متعملش عدوات فى المستقبل تقيدك فى زيارة بيت اختك ..او تسمح لأهلها يجيبوا سيرتك بما ﻻ تحب.. اخلع نفسك من أﻻحتكاك المباشر وهدى بال الست الوالدة وبﻻش المناقشات دى امام العروسة.. وذكرها ان العريس لو طار ممكن يقف حال البنت سنين الله أعلم بعددها..ومن وجهة نظرى التى قد تخطىء وتصيب الموضوع دة لية طريقة من اتنين..يا اما الوالد او ولى امر العروسة يجلس مع العريس بهدوء على انفراد ويطرح المخاوف وانة زى ما وثق فية يسلمة حتة منة فمن حقة أيضايطمن على بنتة .. ويحاول يوصل لحل وسط زى مثﻻ ان اﻷم الفاضلة تعمل توكيل بالشقة ﻹبنها - يسمحلة بنقل الملكية كمان كام سنة..أو تكتب لإبنها عقد ايجار على النظام القديم نسختين تحتفظوا بنسخة منة.. يا إما لو حد كبير من عيلتكم ..عم العروسة مثﻻ يكون عاقل و قلبة على مصلحتكم و معندوش نفسنة .. يقابل اهل العريس ويتفاهم بأدب واحترام ويعرض المخاوف والحلول على النقاط الى تقدم ذكرها.. وربنا يتمم بخير.