العربيات المظلومة قد تكون الافضل !!

السلام عليكم
كلنا بنحتار حيرة السنين لما بنيجي تشتري عربية ونتوه وسط الانواع والتقارير والمميزات والعيوب وبنحاول نسأل علشان نوصل لافضل اختيار


لكن في الاخر بنضطر نجيب الي " عايزه السوق "

من اهم الحجات الي بندور عليها في العربيات
-اعادة سعر البيع يكون مناسب
-قطع الغيار تكون متوفرة برة التوكيل علشان الاستغلال

ولذلك بنلبس في الاخر في عربيات حقيرة بسعر عالي

وممكن تستغرب لو عرفت ان في عربيات متقاربة سعريا لكن فرق التكنولوجيا والصناعة والتقفيل كبيييير ومع ذلك بنجيب المعفنة علشان منتشرة بين المصريين وليها قطع غيار !!
على رأس العربيات المظلومة في مصر مثلا
مازدا
ستروين
وغيرهم حبة انواع برة ليهم وزنهم لكن في مصر مظلومين .

مؤيد وبشدة

المشكلة عندنا فى حاجات كتيرة

توفر قطع الغيار و سعره وكفاءته
التوكيل و مدى دعمه لما بعد البيع
الصنايعية و مدى فهمهم للعربية اللى مش منتشرة

السوق و الصنايعية فارضين واقع من الصعب انك تتجاهله .. انتشار نوع او موديل اكيد ميزة كبيرة جدا في الصيانة و البيع .. و العربية النادرة عذاب حتى لو كانت احدث و اقوى .

معاك حق طبعا
بس كل واحد عايز يركب عربيه مش عايزها تقرفه لما يحتاج يجبلها قطع غيار وتتركب لحد لما يلاقى اللى يجبهاله ده اذا اصلا لقى اللى يركبله الحاجه دى او حتى يفهم فى عربيته
انت لو حسبت كده كام ماركه عربيه مشهوره فى مصر بس يتعدوا ع الصوابع
وكمان الحكايه دى تبان اكتر فى المستعمل

كلام مظبوط جدا.... بس يا ترى العيب فينا و لا فى التوكيلات اللى ما بتعرفشى تسوق العربيات الجيده عالميا؟؟

يعني انا من فتره شوفت Seat Leon 2014 ... حاجه بسم الله ما شاء الله ... تصميم ايه و خامات نضيفه ايه ... حاجه فخمه ... هي طبعا مش رخيصه بس مش منتشره مع ان في عربيات كوري (مش هقول اسباني) و منتشره جدا

الاوروبي عموما مظلوم في مصر :(((

فعلا سيطرة التوكيل وتجار قطع الغيار ومهارة الصنايعية فوق دة كمان الانتشار مقومات لاختيار السيارات في اي مكان في العالم مش بس مصر وبالتاكيد عربيات كتير وماركات معروفة بعينها افضل بمراحل مما متواجد بالسوق بس الفيصل هتصينها ازاي وتجيب قطع غيارها منين ودة في حد ذاتة تحدي ووقت ومجهود الغالبية في غنا كبير عنه
وعن نفسي لا انصح حد باللجوء للنوادر الا لو عنده تمسك وثيق جدا بما هو مقدم علية
شائت ظروفي اني اتعامل مع سيارة فوكسهول فيفا موديل 71 في بداية معرفتي بالسيارات خاصة الوالد والت الي بعد جهد جهيد وصراع وحسرة لقدوم العديد من تجار الروبابكيا لشراء السيارة المتوقفة ب 200 جم وبالتالي قلت انا اولي وياريتني ما قلتها لاني دخت علي قطع غيار وحولت جميع مسامير العربية وصواميلها من النظام الرويال بالبوصة واجزائها للنظام المتري لتعذر ايجاد مسامير بديلة لها فما ادراك بالباقي ....وبعد فترة مش هينة قلت اهرب للفيات لما كان في عزة ايام الريجاتا والريتو والتمبرا وقطع الغيار مرمية في كل حتة والتعديل ببلاش واشتريت ريجاتا وبعدها جبت اكبر المجموعة فيات كروما واستمروا معايا اكتر من 15 سنة في شوارع المحروسة بلا كلل اوملل حتي اضحت قطع غيارهم والحصول عليها من ثامن عجائب الدنيا علي ارض مصر فبعت الاثنين ولجأت مؤخرا للنيسان والهونداي والامجراند ولاني عاشق للتعب والقرف اشتريت كروما تاني وحاليا في مراحل تجديدها بالكامل علشان حاسس انها افضل من اللي باركبة بمراحل علي الرغم من عمرها الطويل بس تحس انك راكب عربية لها خواص السيارات من حيث الاتساع والمرونة وقوة المحرك وصوته وتناسف صندوق التروس دون اللجوء لعدد كبير من النقلات في رايي بدون داعي والعزل ورد فعل العفشة المعروف في مطبات المحروسة مش توديك في داهية زي الالنترا ولا فيها حب للمغامرة وتحس بركوبك تكتك كما الصني بتبرطع وثابتة بس اي حادث ...راحت فلوسك وفلوس الجيران يا صابر
وعلي ذلك بادوخ علي قطع الغيار وبيضيع وقتي في البحث علي صفحات الفيس والمنتديات وتجار قطع الغيار ومواقع الاي باي وامزون لتوفير قطع الغيار والقيام بنفسي باعمال الصيانة يمكن الله اراد ان يجنبني التعامل مع الفنيين رافة بي لعدم رفع ضغطي او لمنعي من الاصابة بشلل رباعي او نصفي واراد ان استزيد خبرة في كل ما يتعلق بالسيارات حتي جمعت عندي ما يفتح مركز صيانة من معدات وعدد علي مدي الفترة السابقة وبقيت باتعامل مع جميع السيارات بسهولة تامة والفضل لدراستي في ميكانيكا السيارات كمان غير اني مباعملش في مجالها خالص حاليا ......مش عارف باقول الكلام دة لية يمكن فضفضة بس حبيت انصح اي حد مقبل علي شراء النوادر ان يكون عندة رصيد كبير من الصبر والثبات والا ياخدها من قاصرها ويرضي بالموجود بديلا
وتحياتي الحارة للجميع

السوق مبيفرضش ، ثقافتنا الي بتفرض

اقتباس:

---

المشاركة الأصلية كتبت بواسطة kimotop

السوق مبيفرضش ، ثقافتنا الي بتفرض

---

ياريت توضح اكتر ازي ثقافتنا بتفرض لاني عايز افهم

ثقافتنا الي بترفض تجربة الجديد ، والاهم من كدا السمع والتصديق مثلا سمعة العربيات الهاتشباك في مصر بتخلي الناس تخاف تشتريها برغم انها لا فرق بينها وبين السيدان الا في الشكل
كمان سمعة العربيات وحدث ولا حرج