انطباعى عن الفتيس الاوتوماتيك
السلام عليكم ورحمة والله وبركاتة:
كنت حابب انى اشارك مع حضراتكم انطباعى عن الفتيس الاوتوماتيك بعد تجربة شهر ونصف بسيارة النترا md
لأكون صريح معكم فأنا من زمان وانا بهوى حاجة اسمها فتيس عادى . حيث اننى اجد متعة فى قيادتها من حيث الاحساس بالسيارة ومتعة القيادة.
تحس كدة انك بتكلم العربية وبتكلمك . مش عارف اوصف ازاى هذا الاحساس.
المهم طبعا سمعت عن مميزات الاوتوماتيك التى لاتحصى وخصوصا فى زحام القاهرة وابتديت فعلا افكر فى حكاية الاوتوماتيك خصوصا ان مشاكلة بقت مش زى زمان.
وكان هذا انطباعى عنه بدون اى تحيز:
1- لايوجد اى احساس بالقيادة (تحس كدة كانك قاعد مع شخص بتحاول تكلمة وكل ماتقولة يعمل حاجة ، يعمل هو اللى فى دماغة)
2- صعوبة قيادة السيارة فى الاماكن المزدحمة ( ايوة اللى سمعتوا صح بالرغم من انى حلاقى كتير حيعترض) يا جماعة انا كان عندى مشوار واخدت كوبرى اكتوبر وطبعا انتم عارفين ان العربية بتبقى على الاول والثانى بس ، زمان ايام المانيول الواحد كانت رجلة الشمال بتتعب من كتر دوس الدبرياج ، ولكن يا جماعه اللى اكتشفتة ان الاوتوماتيك بتريح فية رجلك الشمال لدرجة انها بتنمل من كتر عدم الاستخدام ، وبتطحن رجلك اليمين فى الفرامل لما العربية تضطر انك توقفها كل شوية وتفضل دايس على الفرامل بتاع 30 ثانية لغاية ما الطريق يمشى وهكذا لغاية نهاية الكوبرى، ناس حتقولى طيب ماتجيب على n ، ماشى انا بعمل كدة بس فى الاشارات فقط اللى بتقعد اكتر من 30 ثانية وذلك للمحافظة على الفتيس عشان زمايل كتير قالوا كتر النقلات فى الاوتوماتيك بيأثر على المدى الطويل ، فعلا انا خلصت كوبرى اكتوبر ورجلى اليمين بعانى منها. والمشكلة اللى انا اكتشفتها ان دوسة الفرامل فى الاوتوماتيك اتقل كتير من دوسة الدبرياج فى المانيوال ، بابقى دايس فرامل ولازم اكون دايس جامد عشان لو خفيت رجلى حلبس فى اللى قدامى.
3- استهلاك الفرامل نظرا لاستخدامها عن نظيرتها المانيوال لدرجة انى بحس بعد لما اخلص مشوار ان الفرامل بقت جمرة من النار.
4- استهلاك الكبالن على المدى الطويل نظرا لعدم تمكن سائقى الاوتوماتيك من تموير السيارة فى الحواديات (قصدى لف الدركسيون على الاخر) حيث اننى فى المانيوال كنت لما اجى اكسر الدركسيون على الاخر بدوس بنزين ادى دافعة للعربية وبعدين امور الفتيس وذلك لعدم التحميل على الكوبلن
5- عدم وجود اى عزم للماتور مثل المانيوال ( انا قصدى السحبة اللى الواحد بيحس بيها لما ينقل من سرعة لسرعة عند التسارع)
بصراحة كدة وعلى المستوى الشخصى انا بفضل المانيوال الف مرة عن الاوتوماتيك (كفاية انى بحس فى اخر المشوار ان العربية مرتاحة)
الاوتوماتيك بحس انى لما اخلص مشوارى ان العربية بتنهج
وشكرا للمتابعة