السلام عليكم ورحمة الله وبركاته
انا حابب انقل تجربتى لحضرتك
انا وواحد صاحبى اشترينا عربيتين من خلال كونتاكت كارز
وطبعا فى الاول كنت عامل زى حضرتك مش عارف ازاى حشوف 50 عربية فيرنا من المعروض على الموقع
اولا كنت بهتم بالعربية اللى منشور صورتها اكتر من الاعلانات اللى من غير صورة لانها بتديك فرصة انك تشوف العربية وتحكم عليها (مبدئيا) اذا كانت متهانة ولا لأ
وكمان كنت لما بتكلم فى التليفون كنت بسأل على كام حاجة زى :
بسأل العربية بأسم حضرتك كان المعظم بيقولى توكيل فكنت بحطه (low priority ) أولوية منخفضة
كنت بسأله العربية تبع مرور ايه ؟ اول لما يقولى مرور خارج القاهرة (عشان انا من القاهرة) ان شالله يقولى من الجيزة كنت مابهتمش باللى بعد كدا واحاول انهى معاه (عشان مشاكل ومشاوير نقل الملكية) وان انت حتتشحطط فيها
وبعدين ابتدى اسأل هى العربية فبريكة ولا رشة ؟ عاملة كام كيلو وكنت بحاول اختار العربية اللى عامله كيلوات قليلة على قد ما اقدر
وباخد فى الاعتبار اسلوب الراجل معايا وبحس اذا كان تاجر ولا لأ
وكنت بحاول ابعد عن اللى يقولى العربية موجودة فى معرض .. انا بحب اشترى من صاحبها الاصلى وابقى واجها لوجه معاه
النتيجة ان اشتريت عربيتين واحدة من ظابط قوات مسلحة وكان راجل محترم جداااااا بعد مابصيت على العربية وعجبتنى لقيتوا بيقولى العربية ديه فيها تلات عيوب من ضمنيها زجاج الامامى كان مشروخ ولحمه واللحام كان مش باين ولا كنت واخد بالى منه بجد كان انسان امين وعشان خاطر امنته ديه كانت سبب فى انى اكون مطمن ان اشترى منه زائد ان العربية كانت مسجلة بعقد فى مرور القوات المسلحة فدا كان مخلينى مطمن جداااااااااااا فى مسألة الورقيات
على فكرة ناس بعد ما اشتريت العربية قالولى انت اشترتيها غالية شوية (الفين او تلاتة زيادة) بس حتى لو دا حقيقى فانا اشترىت نفسى بعربية كويسة جدا زائد اوراف مطمنلها وكمان من واحد امين
والعربية التانية كانت لواحد صاحبى . الراجل صاحبها كان بيحلف لصاحبى انه ماغيرش فى العربية ديه غير لمبة الصالون رغم انها كانت عاملة حوالى 26000 كم
المهم نصحيتى ليك انك تحاول تشترى من صاحبها الاصلى ويكون صاحبها دا اول اوتانى مالك (من الاخر تكون عربية اسرة )
وماتكونش عامله كيلوات كتيرة (ماتكونش متهانة) ودا مايمنعنش طبعا انك تكشف عليها فى بنزينة او تاخد معاك حد فاهم
لان كل اللى الحاجات اللى قولتهالك عبارة عن مقدمات كويسة زى مابيقولوا كدا الجواب بيبان من عنوانه
فإذا كنت مطمن من المقدمات ابتدى اروح اشوفها واكشف عليها وهكذا
واستخير وربنا يكرمك ان شاء الله
المفضلات