خدوا بالكو : ميكانيكي حرامي كان هيضيعني انا و عيالي واخويا و لكن ربنا ستر

**a.m.a2011** · 30-07-2015 04:51 PM

السلام عليكم
انا جاي النهاردة عشان أبلغ كل الناس انهم ياخدوا حرصهم من الميكانيكية ، و أوعى حد يقولك هشتغلك في العربية بعدين و تسيبه و تمشي.

انا معايا عربية 126 ، روحت لميكانيكي بشتغل فيها و في عربيات تانية كمان في الإمام ، جنب كوبري التونسي ، شهرته سيد التونسي.
قالي العربية محتاجة بلي ورا عشان البلي ضايع و هوه ده اللي بيعمل الصوت العالي ، كنا في رمضان بعد صلاة الجمعة و كنت جيابله بليتين لكل عجلة و اتنين اولسيه من عند علي شاهين ب 200 جنيه.

قالي مش هشتغل فيها دلوقتي ، لسة هشتغل فيها بعدين عشان عندي شغل كتير، تعلالي بعد الفطار مش قبل 10 او 11 بالليل. و بالفعل مشيت بس رجعتله بعد العصر على 4 ونص عشان اديله زيت يغيرلي زيت المحرك. لقيته بيقولي انا خلصتلها بعد الصلاة الجمعة و كانت سهله وربنا يسرها و خلصت بسرعة و وراني بلي قديم و قالي هوه ده بتاعك اللي انا خلعته.

بعد أسبوعين و انا على المحور على سرعة 70 ، العجلة اللي ورا قفشت و العربية اطوحت و لفت و وخمست و وقفت عكس في وش اللي جاي في الشمال.

ربنا سترها معايا انا و مراتي و اخويا و بنتي و مكنش فيه حاجة ورايا و رجعنا بالسلامة.
الحمد و الشكر لله رب العالمين

وانا عند ميكانيكي تاني امبارح لقى ان البلي بتاع العجلة الشمال قفش و دقر في الصرة لدرجة انه مرديش يفك ، ولما روحنا نخلعها عند المكبس ، الصرة اتكسرت. وطلعت المفاجأه ان البلية بتاعة الفبريكه.
حسبي الله و نعم الوكيل فيه الحرامي
اسمه سيد التونسي
في الإمام
ومشهور انه بيشتغل في 126

ربنا يسترها علينا و عليكوا و الحمد لله رب العالمين على نعمه التي لا تحصى

**amr011111** · 30-07-2015 05:11 PM

ألف سلامة ليك وللأسره الكريمه
والـ 126 مش محتاجه ميكانيكى متخصص تروحله لانها سهله واى حد يشتغل فيها
فروح لاى حد فاضى ويشتغلك فيها وانت واقف على ايده وبالتوفيق

**drcobra** · 30-07-2015 08:38 PM

ربنا يصلح حالنا

**aymanshebl** · 30-07-2015 10:55 PM

الضمير انعدم خلاص

**AlphaCharlie** · 30-07-2015 11:38 PM

لا وفي رمضان.
لا حول ولا قوة الا بالله..

**Bassem Youssef** · 31-07-2015 02:51 AM

لازم تقف علي ايد الصنايعي + تكون عارف ايه عيب عربيتك بالظبط

**Elawany13** · 31-07-2015 12:01 PM

بس مين اللى قالك ان ده بلى الفابريكة !!!
مش انت كنت رايحله بالبلى بيعمل صوت ولما استلمتها منه الصوت اختفى ؟
ممكن يكون البلى الجديد بس ركب بطريقة غلط فى المخرطه أو بسبب الميكانيكى أو نوع رديئ مضروب
الله اعلم
أنا مش بطمن الا لما اشوف كل حاجه بتتعمل قصاد عينى مهما كانت بسيطة أو معقده

**Elawany13** · 01-08-2015 06:08 PM

المشاركة الأصلية كتبت بواسطة a.m.a2011

الشكر لله أولا ثم لكم جميعا على شعوركم الجميل

بصراحة والدي كان واقف مع الميكانيكي الجديد و احنا ما قولنالوش اني عملته قبل كده ، بس هوه قال لوالدي و وراله علامة على البلي تدل انها بتاعة الفبريكة بس مش فاكر والدي قالي ايه العلامة بالظبط

الميكانيكية وكل الصنايعية حتى الفئات الاعلى تعليما زى الدكاتره وغيرهم
كله بيحب يضرب فى شغل غيره ويثبت للزبون ان هوه الافضل والباقى نصابين

أنا شايف ان صعب قوى عربية 126 يكون فيها بلى الفابريكة والله اعلم