مشكلة فى نوبيرا 2 أوتوماتيك رجاء المساعدة
السلام عليكم
عندى نوبيرا 2 أوتوماتيك جابت جوان وش سلندر وتم تغييره وتغيير سير الكاتينة بالمرة وظهرت خشونة فى الكاتينة ولم يعترف بيها الصنايعى وبعد أقل من 20 ك الفتيس ظهر فيه صوت خرفشة زى ميكون الزيت ناقص المهم كشفنا على الزيت الزيت تمام طلع العيب ان الفلتر مكتوم ورحت غيرته وبتاع الفتيس قاللى جه مية على الزيت المهم إنه ظبط ومشيت أكتر من شهر تمام مع ملاحظة الخشونة فى صوت المكنة وكل ما أقول للميكانيكى عليها يقوللى العربية تمام !! فجأة وأنا ماشى على الطريق العربية صوتها على وفصلت ومرضتش تدور تانى والصوت كان مكتوم أثناء محاولة تدويرها المهم سحبتها وروحت للى عملها الجوان ( الله .......) قاللى دا بلية الكاتينة فرطت ودا عمرها رغم إنى جبتله سير كاتينة جديد والمفروض يكون إختبر البلية والشداد قبل ميقفل ولو لاحظ خشونة كان طلب منى غيرها ..زعقت معاه قلتله جتلك كذا مرة وقلتلك على الخشونة وقلتلى بتهيألك والعربية تمام المهم وصلنا لإن العربية عايزة وش كامل جبناه وركب والوضع أحسن من الأول وبعد مشوار صغير برضة الفتيس عمل نفس الحركة القديمة خرفشة ويفصل حركة وأسيب العربية ترتاح شوية وأدور تمشى شوية وتقف وهكذا رحت للعفشجى حل الكارتيرة بتاعة الفتيس لقى طحينة فى أرضية الكارتيرة قال جه على الزيت مية قلتله طب حل ليا الرادياتير أروح أكشف على السربنتينة بتاعته رحت بتاع الرادياتير كشف وقاللى السربنتينة سليمة وعرض عليا يغيرها من باب الإحتياط لأن مفيش إحتمال يوصل للفتيس مية إلا عن طريق سربنتينة الردياتير فمن يأسى وإحباطى قلتله غيرها ورحت وركبناه والعفشجى غير الزيت تانى والعربية مشيت تمام وبعد حوالى 30 ك الفتيس عمل نفس المشكلة وزيادة صوت صرخة من الفتيس مع الدوسة والخرفشة بتاعة كل مرة !!!!!! قلت هجيب فتيس تانى خايف من موضوع المية اللى بتدخل على زيت الفتيس
أفيدونى يرحمكم الله
