هو إيه حكاية العربية دي بالضبط ؟؟..غبور جايبها يموتنا بيها ولا إيه ؟؟؟
أنا قلت أعمل الموضوع في القسم ده عشان أكبر عدد من الناس يشوفوه
دلوقتي الجيلي إمجراند عربيه عملت مبيعات مش قليله ..وسمعت عن عيوب فيها ..بس كانت عيوب ممكن نختلف فيها أو نتفق ..زي مثلا التكييف بتاعها ضعيف ..يقوم واحد تاني رادد ويقول لأ التكييف حلو بس ليه ضبطه معينة ..زي مثلا حكاية الصدأ اللي كان في الأبواب ..ودي محصلتش مع ناس كتير..وراحو التوكيل والتوكيل قام مصنفر الصدا وأهي ماشيه
لكن اللي حصل ولاحظت إن محدش إتكلم عن الموضوع ده ..حكاية الجنط اللي بيتكسر ..ودي بصراحه أنا شفتها مرتين على الفيس بوك ..يعني شفت حادثتين للعربية دي حصلت بنفس الطريقة على الفيس بوك ..حتى كان في واحده منهم زميل لينا هنا عمل موضوع عنها هنا ..وبرضه الموضوع إتقفل ومحدش إتكلم فيه تاني
لكن المصيبة بقى ..لقيت النهارده واحد عامل بوست على الفيس بوك بيقول إن إبن خاله مات في حادثة إمجراند برضه ..وده كان بسبب إن القطمة بتاعة الدريكسيون كلها إتفصلت والعربية لبست في الجزيرة وولعت بصاحبها ..
الله بقى ..هي العربية دي إيه حكايتها بالضبط ؟؟؟..ده حتى لسه الإسبوع اللي فات قاري خبر إن وزارة الصناعه السعودية بتدرس الغاء توكيل جيلي من السعوديه أصلا ..يعني السعودية بدأت تدرك المصيبة وإحنا لسه
وياريت أي حد من الأعضاء يقول أي معلومات عن العربية دي ..يعني دخلت مصر إزاي ..وإيه أصل العربية دي ..أنا حاسس إن العربية دي ملهاش أصل ..وممكن تكون مش إنتاج شركة جيلي أصلا وتم وضع العلامة التجارية لشركة جيلي بعد شراء حق إستخدام العلامة التجارية من شركة جيلي لإستخدامها في العربية دي
يعني أنا أعتبر إن العربية دي نعش متحرك مثلا ..ده أنا كنت مرشحها لواحد قريبي نازل أجازه مصر كام يوم وكان بيدور على عربيه إيجار ..
بصراحه الموضوع بدأ يتحول لرعب عندي من العربية دي وخصوصا إن الحوادث دي كلها في خلال فترة قليله قوي ..يمكن هي فترة تواجدها في مصر