موضوع مهم جدا بالنسبالي وهيترتب عليه تغيير مسار حياتي ! ياريت تساعدوني

أنا مش عارف أبدأ ازاي !

أنا أصلي من المنوفية طبعا قضيت حياتي كلها فيها لحد ما خلصت الكلية
دخلت الجيش وخلصته أول 2015

من وأنا صغير وأنا بحب القاهرة ويمكن الإعلام وخاصة الأفلام حببوني فيها أكتر
بقيت شايف حياة المدينة والناس اللي مش بتنام وقهاوي وسط البلد والناس المثقفة والحوارات والمناقشات السياسية والقهوة البلدي اللي الناس بتلعب عليها طاولة
والناس اللي بتساعد بعض والفرص الكتير ف كل حاجة
والخدمات المتوفرة والصحوبية والسهر وغيره !!

وأنا ف الكلية كنت بسافر كتير القاهرة وكنت بحاول كتير أقنع نفسي بإني هاجي هنا بعد لما أخلص كلية واشتغل واعيش هنا !

حصل فعلا وبعد الجيش دورت على شغل ف القاهرة مع اقناع أهلي بإن المنوفية أفضل وع الأقل هاعيش ببلاش وهحوش المرتب !
أنا مش راضي بالمبدأ ده وقلت لنفسي أنا هييجي عليا وقت واستقل فيبقى من دلوقت أفضل علشان أتعود
غير كدة أنا شخصيتي مستقلة ومنطوية شوية يعني مش أحب ان أهلي يصرفوا على أكلي حتى وأنا بشتغل !
بالرغم من ان اخواتي الكبار عايشين ف المنوفية !

لقيت شغل قعدت فيه شهر ونص وسيبته واشتغلت ف مجال تاني برضه وشايف انه مش مجزي أوي على المدى القصير !

أول لما جيت كنت مبسوط جدا وعادي عايش حياة العمل بقى وقلت اني حققت حلم ليا
كنت بشوف اني عادي بعد الشغل هنزل أفعد على قهوة مثلا أشترك ف جيم جنبي آخد كورسات جنبي كل الشركات أي انترفيو هيبقى قريب مني الفرص كلها قدامي !!

بس اللي ظهرلي غير كدة خالص !
بصرف فلوس كتيييييييييييير جدا يمكن ع الهوا اللي بتنفسه !
مصاريف سكن وأكل وشرب ده بيتجاوز شهريا ال 1500 !!
مش عارف ألاقي وقت أعمل فيه حاجة مفيدة !
كل اللي كنت متخيله عن القاهرة مش صحيح !
الحياة مزعجة جدا والقهاوي اتملت شمامين ومفيش مثقفين ولآ مناقشات سياسية ولآ كورسات عدلة !

بالرغم من اني ساكن ف مدينة نصر وشغلي ف الرحاب يعني مش بشوف زحمة أوي ولآ مناظر مش كويسة !
الا اني زهقان جدا وخصوصا من المصاريف اللي بدفعها دي بالرغم من اني ممكن جدا أوفرها ف المنوفية !!

ف المنوفية ممكن الاقي الشبكة ضعيفة
النور يقطع
مفيش خدمات زي القاهرة

بس كان عندي سلام نفسي !
السلام النفسي ده ف القاهرة برضه بيبقى عندي ساعات بس مش على طول !

الناس هناك كويسة كنت بلاقي وقت أخرج مع اصحابي ونقعد مع بعض وغيره !
كنت بروح بلاقي أكل موجود وجاهز وأحسن طبعا من أكل المطاعم
هدومي مغسولة مفيش مواعين البيت نضيف أهلي حواليا !!

طبعا دلوقت في ناس هتقول ف نفسها اي العبط ده !
يعني انت سايب ده كله وهربان للجحيم !!!!

أنا يمكن أكون دلوقت فعلا الدنيا معايا مش مظبوطة !
بس أنا ببص لقدام أكتر !
عايز أعتمد على نفسي اعتماد كلي
غير كدة شايف ان في فرص كويسة ممكن تجيلي هنا أكتر من المنوفية

والسبب الأهم .... مش عايز أبان ضعيف أو معرفتش أثبت نفسي هنا وعلشان كدة رجعت !!!!!!!!!!!!!!!
أيوة ده أهم سبب بالنسبالي !!!!

فكرت اني أشوف فرصة سفر للخليج خصوصا ان المهندس الزراعي هناك ليه مكانته
بس أنا مش بحب الخليج !!!!!
بس أجرب يعني مفيهاش حاجة
وف نفس الوقت أبقى رحت على حاجة أفضل وحتى تبقى غربة بفلوس أحسن من غربة ومفيش فلوس !!

بس برضه الخليج المكتب أكيد هيحتاج فلوس وأنا مش عايز أطلب من أهلي !!!!!
بالرغم من ان حالتنا المادية حلوة جدا الحمد لله !!!

وهنا مش عارف أحوش !!

طب الحل اي !!؟؟
موضوع كئيب ورخم انا عارف !!!!!

اتعلم الفوركس يامحمود وحوشلك مبلغ بتاع 500$ كده وابدأ بيه
هتعمل احلى فلوس وبعدين قرر هتعيش فين ولا هتعمل مشروع ايه
مع ملاحظة ان شغلك الاساسي متسيبوش خالص لحد ما تقف على رجلك في الفوركس وبعدين اضرب كله بالقلة (بضم القاف)

نفسي اسمع عن حد كسب دولار واحد من الفوركس و البورصه و الكلام ده

يا صاحب الموضوع

خليك ورا موضوع السفر الي الخليج ده و استغل صغر سنك

مش هقولك اكتر من كده

اقتباس:

---

المشاركة الأصلية كتبت بواسطة باسم يوسف

نفسي اسمع عن حد كسب دولار واحد من الفوركس و البورصه و الكلام ده

يا صاحب الموضوع

خليك ورا موضوع السفر الي الخليج ده و استغل صغر سنك

مش هقولك اكتر من كده

---

ان كان على دولار واحد هتلاقي كتييير ههههههههههه

قالوا بلدك فين يا جحا؟؟ ..قال بلدي اللي فيها مراتي ..

يعني بلدك اللي فيها أهلك ...وعيالك وإخواتك ...

يبقى ده أولا

ثانيا ..جالك شغل في القاهره ..جالك شغل في المنوفيه في الشرقيه في إسكندرية في الصين الشعبية ..روح ..مطرح ما تلاقي شغل روح ...

يعني خلاصة القول ..أقعد في المنوفيه ودور على شغل في المنوفية نفسها ..ولو لقيت في القاهره ماشي ..لقيت في إسكندرية ماشي ..لقيت في زرزارة ..بتاعة سنبل بعد المليون ..ماشي ..كله رزق وأكل عيش والرزق يحب الخفيه زي ما بيقولوا

تجربة إقامتك في القاهرة دي لا تقدر بتمن ...شوفت بعينك المصاريف شكلها إيه ..وعرفت أماكن وناس ..ودي هتخليك الفتره الجايه تقدر تحكم على أي فرصة شغل تجيلك خارج المنوفية إذا كانت مجديه ولا لأ

ده رأيي

prof2013 ياكبير فكني أنا من الحوارات دي !

باسم يوسف .... ولحد ما الاقي فرصة السفر دي أفضل ف القاهرة ولآ أرجع !!

Abo_Mazen مش دي الفكرة !!
هو في شغل ف كل مكان بس مع تفاوت الفرص والمرتبات لصالح القاهرة عن بنها أو المنوفية مثلا !!
أدور هناك وارجع ولآ أفضل ف القاهرة

اعتقد انك ماشي في الطريق الصح
كمل وما ترجعش بلدك
لانك لو رجعت بعد شهر مش هتكون مبسوط وهتتخنق

ربنا قال في سورة البلد ..
لقد خلقنا الانسان في كبد

اقتباس:

---

المشاركة الأصلية كتبت بواسطة Mahmoud Naguib

prof2013 ياكبير فكني أنا من الحوارات دي !

باسم يوسف .... ولحد ما الاقي فرصة السفر دي أفضل ف القاهرة ولآ أرجع !!

Abo_Mazen مش دي الفكرة !!
هو في شغل ف كل مكان بس مع تفاوت الفرص والمرتبات لصالح القاهرة عن بنها أو المنوفية مثلا !!
أدور هناك وارجع ولآ أفضل ف القاهرة

---

الأنسان الناجح بينجح فى ظل اى ظروف وانت ممكن تعمل الشغل الى بتحبه فى بلدك وتفيدها افضل ماتعيش مغترب فى القاهرة وخصوصا فعلا الحياه فى القاهرة غاليه حتى عن الأسكندريه انصحك ترجع بلدك وتجتهد فى شغلك فيها وان شاء الله حيكون مستقبلك افضل من القاهرة وحتلاقى وقت فاضى علشان انت عايش مع اهلك تفكر فى مشروع تعمله تفيد اهلك مشتل زهور مثلا او تربيه دواجن طبعا انا مش حاعرفك تخصصك وربنا يوفقك ويوفق كل الشباب المجتهد تحياتى ليك ولكل الشباب المكافح اللى عاوز ياكل لقمه حلال !!!!!
:bravo::bravo::bravo::bravo::bravo:

من كلامك واضح انه حاليا وجودك وسط اهلك قد يميل الى كونه عامل ضغط نفسى اكتر من كونه عامل دعم نفسى احيانا ناس بتضحى بمزايا مادية كتير عشان تحافظ عليه
اذن افضل اختياراتك هى اما فى القاهرة او السفر للخارج
رأيى انك تسعى فى موضوع السفر للخارج. . . و ده هيساعدك فى تحقيق تطلعاتك المادية فى فترة زمنية جيدة بالمقارنة بوجودك فى مصر. . . و سيفيدك ايضا صغر سنك. . . و بعد ما توصل لدرجة معقولة من الاستقرار المادى لو حبيت ترجع ارجع. . . و ساعتها هتشوف الاختيارات قدامك بشكل اهدأ و تقرر هتعمل ايه فى مرحلة ما بعد السفر بناء على المعطيات ساعتها

انا مقدرش افتي و اقولك ارجع المنوفيه و لا خليك في القاهره ... ده تقديرك الشخصي

عموما سواء ده او ده ... خش علي موقع yellowpages.com و اعرف عناوين مكاتب التوظيف في الخليج و اتأكد من انها مرخصه... خدلك لفه علي مكاتب التوظيف دي و اسأل ... اعملك CV نضيف و حطه في موقع bayt.com ... برضه خش علي موقع dubizzle.com و دور و خد وقتك ... اسأل في سفارات الدول الخليجيه

ان شاء الاول لما تلاقي عرض شغل محترم في الخليج ... اعمل بيه موضوع هنا و ان شاء الله الاعضاء يساعدوك و يشوفوا اذ كان العرض ده كويس و لا لأ ... و اتأكد من السفاره ذات نفسها

استغل صغر سنك ده ... ده كنز لا يقدر بثمن

speed_magnum أنا معاك بس قدامي خيارين دلوقت المفروض أختار الأوفر والأفضل مش أقول انا كدة كد هعيش تعبان فمقارنش !!
ياريت بس تقولي لي هتخنق بعد شهر لو رجعت !؟!؟

aw2100 ربنا يخليك

Imhotep يمكن ده أكتر رد حسيته فاهمني !!
بس هي الفكرة ف كون أهلي عايزيني أمشي ف طرق أنا مش بفضلها
وبيحاولوا يقنعوني بشتى الطرق اني أمشيها !
بس من ضمنها وده اللي مريحني شوية اني أشوف فرصة سفر كويسة !
بس برضه أنا مش عارف أرجع ولآ اي !!؟؟

باسم يوسف ..... أنا فعلا محتاج أعمل ده وهبدأ فيه من بكرة !

QUOTE=Mahmoud Naguib;3875988587]
Imhotep يمكن ده أكتر رد حسيته فاهمني !!
بس هي الفكرة ف كون أهلي عايزيني أمشي ف طرق أنا مش بفضلها
وبيحاولوا يقنعوني بشتى الطرق اني أمشيها !
بس من ضمنها وده اللي مريحني شوية اني أشوف فرصة سفر كويسة !
بس برضه أنا مش عارف أرجع ولآ اي !!؟؟ [/QUOTE]

استقر الاول و هيأ نفسك نفسيا على فكرة السفر و ابدأ فى السعى فيها بكل قوتك لغاية ما ربنا يوفقك
اما ترجع بلدك و لا لأ فدى انت الوحيد اللى تقدر تحدد هترتاح فيها و لا لأ لأن ده احساسك انت فى المقارنة بين عيشتك هنا و عيشتك هناك و ايهما افضل او على الاقل اقل عبئا عليك سواء عبء نفسى او عبء مادى. . . و غالبا محدش هيقدر يفيدك فى تحديد النقطة دى بشكل كامل لان العوامل المحددة لها مش مادية بس لكن وفى عوامل نفسية كمان. . . عشان كده انت قارن و شوف ايه اللى هيريحك و يساعدك اكتر فى تحقيق فرصة السفر اللى بتدور عليها. . . و مين عارف. . . مش يمكن لما تتفق مع عيلتك على ان خلاص انت نويت تسافر تلاقيهم بطلوا ضغط عليك بل و ممكن يساعدوك لو احتجت مصاريف لموضوع السفر. . . جس نبضهم بأنك تقولهم انك خلاص قررت السفر و شوف رد فعلهم. . . لو لقيتهم مرحبين و بيشجعوك يبقى خد الموضوع خطوة ابعد و اشرحلهم وضعك فى الحياة فى القاهرة زى ما انت شرحته فى الموضوع ده هنا. . . و شوف هيقولوا ايه. . . جايز تيجى منهم و تلاقيهم يقولولك لأ ارجع و احنا هنساعدك لغاية ما تسافر. . . ما كانش يبقى استمر هنا فى القاهرة لغاية ما ربنا يكرمك بفرصة السفر

ملحوظة جانبية. . . بلاش فكرة انا مش بحب الخليج و الكلام ده. . . انت رايح تشتغل و تكون نفسك و تمن ده هو الغربة لمدة من الزمن . . . يعنى الموضوع زى ما بيسموه بالانجليزى trade-off يعنى حاجة مقابل حاجة. . . و كل حاجة فى الدنيا لها تمن. . . عايز تكون نفسك فى فترة زمنية معقولة يبقى التمن انك تتغرب مدة معينة. . . فى ناس كانت ماشية من مصر و هى بتسب و تلعن. . . بس بعد ما جربت قالت لأ مميزات حياتنا فى مصر احسن. . . و فيه اللى استقر فى الخارج. . . المهم فى الموضوع انك تجرب و تحكم بنفسك انما الافكار المسبقة دى مش هتساعدك لكن ممكن تعوقك عن اختيارات قد تكون جيدة

القاهره فيها اللى مكفياها وزحمه جدا وكله فاكرها الفرص والنجاح مع ان النهارده الاقاليم بقت احسن من القاهره.
وفى نفس الوقت مقدرش اقولك ارجع بلدك دى ارض الله ودى ارض الله
بص بالعقل المشوار اللى بياخد ثلث ساعه بيحتاج ساعتين من الزحمه احنا عمرنا رايح فى الزحمه الواحد مش بيعرف يعمل مشوارين فى يوم واحد لا وقت ولا مجهود. بص تركيا والبرازيل وبلاد كتير لها تجارب فى العاصمه الزحمه تفتكر مطبقتش فى مصر ليه ؟ مع العلم ان السادات فكر فيها من 40 سنه وبنى العاصمه الجديده وسماها السادات ومات الله يرحمه وجه اللى بعده ضم المبانى الاداريه لجامعه المنوفيه !

انا مش بحكي اي حاجة عن حياتي هنا ولا اي اللي بواجهه ممكن علشان بشوف انه ضعف مثلا الحل اللي قلته كويس وهو اني افاتحهم ف موضوع السفر ده ف أول اجازة ليا مثلا . انا لو جت سفرية كويسة هيساعدوني طبعا . كنت متوقع اني بعد ما اخلص هقدر استقل واعيش طبيعي زي شباب اي دولة محترمة بس للأسف مصر مينفعش فيها كده لازم الانسان يتمرمط ف دولة تانية علشان يقدر يعيش فيها محترم بعد ما يضيع شبابه ‏!‏

اقتباس:

---

المشاركة الأصلية كتبت بواسطة mahmoud naguib

انا مش بحكي اي حاجة عن حياتي هنا ولا اي اللي بواجهه ممكن علشان بشوف انه ضعف مثلا الحل اللي قلته كويس وهو اني افاتحهم ف موضوع السفر ده ف أول اجازة ليا مثلا . انا لو جت سفرية كويسة هيساعدوني طبعا . كنت متوقع اني بعد ما اخلص هقدر استقل واعيش طبيعي زي شباب اي دولة محترمة بس للأسف مصر مينفعش فيها كده لازم الانسان يتمرمط ف دولة تانية علشان يقدر يعيش فيها محترم بعد ما يضيع شبابه ‏!‏

---

موضوع السفر مش بالسوداوية دى. . . انت لسه فى اول حياتك و دى ميزة كويسة. . . لو سافرت الخليج خمس سنين مثلا ممكن ترجع و عندك 27 سنة يعنى معجزتش لسه :-) ده غير تجربة السفر المفيدة لك فى اكتساب خبرة مهمة فى الحياة

خلى بالك ممكن فى الخليج تصرف كل مرتبك بجانب الغربة و ظلم الكفيل -الحياة اغلى من مصر
انت بتدور على المدينة الفاضلة و مستعجل-تريث

الحياة مش لونها بمبى -استخير و فكر و توكل على الله
الناس متخيله انك فى الخليج راكب بلدوزر و بتحمل فلوس-الامر خلاف ذلك يا صديقى
و بالتالى فيه ناس السفر لهم افضل و ناس الجلوس افضل
مثلا اخى يعمل فى مصر مرتبه اقل من 2000 جنيه-لكن قاعد مع اسرته و فى بلده
لو سافر الخليج هيقبض مثلا 3000 ريال هيصرف نصفهم و يتبقى نصفهم يبعته لاهله يصرفوا الف ريال مثلا كل شهر اذن هو مسافر ليوفر 500 ريال فى الشهر-بعيد عن اهله و اسرته و الاسرة مشتته و ظلم و قرف عشان 500 ريال فى الشهر
اما لو استقدم اسرته فيمكن يستلف فوق مرتبه

بصراحه تفكيرك غريب أوى

المفروض تستغل صغر سنك وتسافر الخليج فى أول فرصه ولحد ما تلاقى سفر خد دورات وكورسات فى تخصصك تفيدك فى سفرك

Imhotep مش فكرة اني شايف موضوع السفر كئيب !
الفكرة عندي ف اني كنت أحب أفضل ف بلدي وأحاول أعمل حاجة تفيدها وتفيدني ف نفس الوقت
يعني بدل ما أضيع شبابي ف اني أفيد بلد تانية طيب ما بلدي أولى !!

volociximab السؤال مازال مطروح برضه !!
ف كل الحالات سواء فكرت ف السفر أو لآ أرجع بلدي ولآ افضل ف القاهرة !؟!

خالد الشاذلى .. ولحد ما تجيلي فرصة سفر أرجع بلدي !؟!؟

على فكرة في حاجة تانية لاحظتها جدا ف القاهرة !!

لو مش معاك فلوس كتيييييييييييييير مش هتعرف تعيش عيشة آدمية !

المنوفية لو معاك حاجات بسيطة هتعيش مبسوط ومرتاح !

اقتباس:

---

المشاركة الأصلية كتبت بواسطة mahmoud naguib

imhotep مش فكرة اني شايف موضوع السفر كئيب !
الفكرة عندي ف اني كنت أحب أفضل ف بلدي وأحاول أعمل حاجة تفيدها وتفيدني ف نفس الوقت
يعني بدل ما أضيع شبابي ف اني أفيد بلد تانية طيب ما بلدي أولى !!

---

تفكيرك غلط ... بلدك هي اللي فيها اكل عيشك ... اللي تتصان كرامتك فيها ... اللي فيها مراتك و عيالك

طول ما انت مش عارف تعيش في مصر كويس ... توكل علي الله علي اي بلد تانيه بدون تردد

بس احسبها الاول :)

محمود ممكن تقولي بعد اذنك تكاليف العيشة في القاهرة كام ، انا من اسكندرية و عايز ادور علي شغل في القاهرة، و عايز اعرف المرتب اللي يتعرض عليا مناسب ولا لا .
معلش انا طلعت عن الموضوع بس العشم بقي. و شكرااا

خالد الشاذلى .. ولحد ما تجيلي فرصة سفر أرجع بلدي !؟!؟[/quote]


أيوه ارجع بلدك وسط اهلك وكفايه بهدله فى نفسك لحد كده

matrix_it g من اسكندرية وعايز تيجي القاهرة لي !!
يعني اسكندرية فيها فرص كتير حلوة وهتبقى ف بلدك
غير ان كل حاجة بتفتح ف القاهرة لازم ليها فرع ف اليكس !!
لو جايلك ف القاهرة بمرتب 3000 مش أقل من كدة تعالى !
ولو جايلك ف القاهرة 3000 وف اليكس 1500 وسكنك وأكلك مع أهلك خليك ف اليكس !!!

خالد الشاذلى ... تمام جدا أخلص الشهر ده ان شاء الله وأرجع

ياريت كل المنايفة يسمعوا كلامك....

محمود باشا عامل ايه
انا شايف انك ممكن تستفيد بخبراتك وعلاقاتك اللى عملتها فى القاهره وتخليها تساعدك فى بلدك لان بالرغم ان القاهره فى التجاره والتسويق بتكون افضل علشان حجم العملاء الكبير و اختلاف الطبقات الاجتماعيه بس فى عيب خطير وهو المنافسه الطاحنه هناك لان لو فى محافظتك فى مجال ما منافسه بين 10 شخصيات اعتباريه فى القاهره حتلاقيهم 100 وبالتالى كل ميزه كبيره قصادها عيب كبير

فاللى عايز اقولهولك انك شوف شغلك فى محافظتك وكمان جنبه كمل فى التسويق العقارى داخل القاهره بعلاقاتك "لان الاستثمار العقارى مش مرتبط بمكان احيانا كتير بتلاقى واحد فى محافظه ما عايز يشترى سكن او مصيف فى محافظه تانيه" ولو تقدر كمان تشتغل فى مجال قريب من العقارات داخل محافظتك حتستفاد من علاقاتك داخل القاهره وحتكون مختلف عن غيرك

وجودك جنب عيلتك مش بس ميزه ده ممكن يكون حافز انك لازم تحقق اللى بتحلم بيه فى وقت قياسي علشان تثبت لكل اللى بيظيط انك مرجعتش لانك معملتش حاجه لا انت رجعت علشان تعمل حاجه اكبر فمش شرط ان كلامهم يضايقك خليه حافز اكتر منه تقطيم
ولو لقيت فرصه سفر محترمه "خاصه فى دوله غربيه" سافر حتستفاد "مش ماديا" انما خبرات جامده جدا وحتغير نظرتك لأى حاجه تشوفها انما علشان تسافر الخليج وتشتغل وتتفحت علشان بس تجمع ما يكفى انك تعيش وتلاقى نفسك فى دوامه الغربه"زى اغلب المغتربين" اللى ميقدرش ينزل بلده علشان مش حيقدر يعمل اى حاجه تجيب دخل ليه لان لاعنده علاقات ولا عنده رؤيه لاوضاع البلد وبالتالى مفيش قدامه غير انه يعيش ويموت فى الغربه "حتى لو دى مش رغبته " ويفضل عايش طول عمره متشحطط بين بلده ودوله عمله فلا منه مهاجر وهو مواطن فى البلد اللى فيها شغله ولا منه مواطن فى بلده هو ميكس بين الاتنين فى الحاله دى رأيي بلاش السفر مش حتحقق ذاتك حتعيش وتموت زى الموظف فى مصر الفرق الوحيد هو عايش فى بلد مش فى مستوى البلد اللى انت حتعيش فيها وفى المقابل انت مش حتستمتع بالعلاقات الاسريه والاجتماعيه الموجوده فى مصر فمش فارقه كتير

وانا مع العضو اللى بيقول ان بلدك اللى فيها شغلك بس مش شغلك كموظف فى دوله عربيه لانى بعتبرها مجرد هروب من الواقع لواقع مشابه ولكن مع تغييرات على الواجهه الخارجيه بس من الاخر شكل حياه افضل ولكن مع تضحيات اجتماعيه ونفسيه واحيانا تربويه فى المقابل انما لو موظف فى دوله غربيه او كمستثمر فى اى بلد ساعتها بس حتبقي بلدك اللى فيها مصلحتك .

اتمنالك التوفيق وربنا يوفقك للقرار الصح اللى يحققلك طموحاتك
تحياتى .

يا صديقى ارى انك لم تبدأ البداية السليمة فى التفكير فأنت تضع اهدافا تضاد بعضها هل انت تريد المال و الغنى ام تريد الراحة النفسية و السلام النفسى كما تقول ما دمت بتكافح و فى اول حياتك يبقى أجل الراحة و السلام و شكمر عن ساعديك و قول لنفسك استعنى عا الشقا بالله و لا تهدأ حتى تصل لما تريده اما ان اردت الراحة النفسية و المال معا فلن يتحققا الا بعد جهد وفير و سنين طويلة انت الان فى زمن الشقا انا شايف ان سنك صغير و دى فرصة للسفر و تكوين نفسك بالمال صح .. سافر و ضيق على نفسك فى المصروفات و حوش و ارجع بلدك تانى بس ادرس الفرصة الأول و احسبها صح و اعمل دراسة جدوى لمشروع نفسك

اعمل اللى انت عاوزه و جرب كل اللى نفسك فيه و اشتغل اللى تحبه فرصة قبل ما يجى الوقت اللى تبقى فيه التزاماتك تكون زى السلاسل اللى بتربطك فى الارض

JAM يسمعوا كلامي ازاي مش فاهم !


eslamrace حبيبي يا إسلام ... أنا كنت منتظر ردك انت بالأخص !
أظن احنا اتكلمنا مع بعض ساعة أو اكتر وانت فهمت دماغي كويس وعلشان كدة بثق ف كلامك


JOHN YOUSSEF مهي المشكلة اني ممكن أفضل أجري ورا الفلوس وانا سايب راحتي النفسية وموصلش للفلوس وابقى ضيعت الاتنين !
على الأقل أنا لما أضمن الراحة النفسية بعدها ممكن أعمل علشان الفلوس وابقى ضمنت حاجة معايا
وراحة نفسية غير الراحة البدنية يعني أنا ممكن أتعب بدنيا بس أبقى نفسيا مستقر !
أعتقد هيبقى صعب جدا أتعب نفسيا وبدنيا زي دلوقت
ولآ اي رأيك !؟


canner ربنا يكرم بس والاقي نفسي وأنا ف السن ده
أنا مش عايز أفضل سنين أجرب !