وداعا قسم لانوس مرحبا قسم متسوبيشى + مقارنة سريعة للفايدة
السلام عليكم يا شباب نايل موتورز - قسم لانوس
انا عامل الموضوع دة لانى حابب اشكر كل اعضاء المنتدى وخاصة اعضاء دايو وشيفروليه لانى بجد استفد كتير من القسم هنا بشكل خاص دة غير منتدى نايل موتورز عامة ... بس بصراحة قسم الدايو من اقسام المنتدى اللى الواحد بيحس فيه انه متفاعل واكتيف والناس كلها بتحب تخدم وتقول رائيها حتى لو بمعلومة صغيرة وانا فعلا اتعلمت حاجات كتيير من القسم وكان من الواجب انى اشكركم وياريت لو كنت اقدر اشكر واحد واحد بالاسم ...
عموما انا نقلت فى قسم ميتسوبيشى - فرع البوما مش بعيد عنكم ومازلت بتابع قسم دايو
ندخل بقى فى المفيد انا من فترة كنت محتار واخدت رايكم فى انى ابيع عربيتى واخد عربية واحد صاحبى بومة 2006 - 1300 CC - اتو
وبعد تفكير شوية ربنا سهل وبعت اللانوس 2005 وخدت اللانسر ال 2006
- الناس حذرتنى من موضوع ال 1300 مع التكيف وفعلا دة حقيقة العربية سحبها بيقل وخاصة لو عايز اطلع من حد بس بردو للامانة المشكلة مش عويصة واعتقد انها كانت بردو فى اللانوس.
- جوة البلد وخاصة انى ساكن فى الهرم :B4_556:وشغلى فى الزمالك فبصراحة مش فارقة تماما لانى عمرى ما عديت 40كم/س وانا سايق :120146b وبالتالى مش حاسس بمشكلة
- من حيث السواقة .. البومة انعم من اللانوس وابعادها افضل مع انها اطول من اللانوس
- العزل افضل للبومة
- الثبات الحمد لله افضل وبنسبة كبيرة وعايز حد يفسر السبب من حيث التصميم الاتزان
- سافرت بالعربية مطروح فى العيد و طبعا كنت بركب فيها 7 وانا رايح البحر هناك واقدر اقول ان ارتفاعها كويس جدا مقارنة مع اللانوس ومش بتهبط ودى ميزة
- السرعات على طريق السفر كويس جدا بس كنت بسيب العربية تاخد سرعتها براحتها لانها كانت محملة شنط سفر وزوجتى وولدين صغيرين وعلى نفس الطريق كنت بجيب 140 وبردوا بالبومة مشيت 140 / 150 بس البومة افضل وخاصة فى الملفات
- الشنطة فى اللانوس افضل بمعنى ارتفاع الشنطة جوة اللانوس اكبر بس البومة كمساحة مسطحة اكبر
- من جوة الكماليات واحدة ولا يوجد فرق بس من وجهة نظرى البومة اشيك ودى ازواق بس فيها عيب سخيف ... ان الكاسيت مينفعش يركب فيه كاسيت اكبر لان مكانه محدود وزرار الانتظار بعيد شويتين بس شغال
- زاوية الرؤية فى البوما افضل واعتقد ان قطر الدوران فيها اصغر
- قطع الغيار لصالح اللانوس بفرق معقول وساعات يبقى فرق كبير بسبب ان فى تجار مبالغة فى اسعار البومة ودة للاسف.
- العفشة فى اللانوس افضل وانعم
- صوت الموتور واحد فى الاتنين اثناء المشى عالى -- بس السلانسيه فى البومة اقل
تقريبا دى النقط اللى قدرت اقيم بيها العربيتين علشان لو حد حب يغير يبقى يقرا الموضوع ويارب يستفيد
وشكرا لكل رجالة القسم