الموضوع: عمرة كاملة و لا موتور استيراد لنيو اكسنت 2008

المشاركة الأصلية كتبت بواسطة ronin81

استفسار يا جماعة لاني محتار ........انا معايا نيو اكسنت 2008 عاملة 210 الف كم....بعد شكوي ان ميه التبريد بتنقص و كذلك ان العربية بتنشع زيت رحت مركز تكنو وان في الحرفيين فخيروني ما بين اني اعمل عمرة كاملة للموتور القديم او اني اسقط في العربية موتور استيراد...........هل ممكن حد يفيدني أي اختيارافضل فنيا واحسن بالنسبة لعمر العربية ، هل اني اعمل عمرة كاملة للموتور القديم و الا اجيب الموتور استيراد ............جزيل الشكر مقدما يا اجمد شباب في مصر

في رايي المتواضع....مش اي عربية بتنشع زيت او بتنقص ميه ممكن تكون محتاجة عمرة (ممكن تكون محتاجة تغيير جوان وش السلندر) ...تنشيع الزيت دليل على وجود تسريب من حتة معينة...لو مفيش تنشيع زيت والزيت بينقص والعربية بدخن من ورا..يبقى حبك الموتور مش مضبوط وفي الحالة ديه محتاج تعمل عمرة لان حصل تاكل بين البساتم والشميس وده بياثر على سحب العربية وخصوصا في المطالع ......بالنسبة للموتور الاستيراد...فانا مش عارف ازاي هتضمن انه مش عامل كيلوات كتير...ومتنخدعش في المظاهر......الافضل تعمل عمرة عند مركز مضمون لانك هتتاكد بنفسك انه كله جديد في جديد والموتور ممكن يعيش معاك فترة من خمس ل عشر سنين اخرى.....انا بسمع ان ناس سقططت موتور استعمال وراح غيره بعد فترة وجيزة.....لو قدرت تجيب موتور استيراد زيرو (مش عارف ازاي)يبقى افضل وافضل....
تحياتي

انا اتاكدت من موضوع العمرة لاني فحصت بلوك الموتور ووش السلندر بعد الحل ..... و لقيت ريجة علي السلندر من فوق و كذلك كان في حرق في الفواصل مابين السلندرات ، الغريبة ان ماكانش في دخنة بيضا و لا كان في خلط مياه و زيت .

هو فعلا مفيش ضمان للموتور الاستيراد انه يكون جديد او قديم غير حاجتين : التجريب لانه دايما بيبقي في شهر تجربة و قياس كبس الموتور ، بس المشكلة برده ان مفيش ضمان العمرة تتعمل كويس فانا تفكيري ان الموتور يبقي تقفيل بره احسن ما يتطلع في غلطة من الصنايعي اللي بيعمل العمرة ما تبانش غير بعد فترة

صورة لوش السلندر

حضرتك عمرة المكنة بيبقى ليها مشاكل متتالية وحتحس إنك راكب 128 افضل حل تجيب استعمال من تاجر كبير بضمان شهر ولا حاجة ويفضل يكون معرفة الميكانيكي ومتنساش الفاتورة والإفراج