الموضوع: كل مايتعلق بالسيارة كينبو فان 8 راكب الجديدة

المشاركة الأصلية كتبت بواسطة adeldaoud

كنت عايز اخد رأي حضراتكم في تأجير السياره انا معايا كينبو فان 2016 بس للأسف العربيه مش مجازيه معايا خالص تقريبا بدفع القسط بالعافيه وبعدين معايا شريك في العربيه . فشريكي شاف شركه علي النت اسمها جلوريا شغاله وكيل لاوبر و كريم وبيقبلو العربيات الفان اتصل عليهم وبعتلهم صور العربيه قالوله نأجرها منك ب 4000 في الشهر ويتحملو كل شئ صيانه ومخالفات واي مصاريف ويسلمك العربيه زي ما استلمها منك . هي الشركه في شارع المرغني مصر الجديده خلف ابو شقره . بس انا مش عارف الشركات دي عندها مصداقيه في التعامل ولا لأ وايه ضماناتهم .علي أي حال بكره ان شاء الله هروحلهم انا وشريكي وربنا ييسر الأمور . انا بس حبيت اعرض عليكم الموضوع لأن فعلا العربيه حاليا بعد زيادة الاسعار اصبحت عبء كبير علي صاحبها مثلما ذكر الاستاذ الفاضل محمد رشوان

شوف الدنيا ايه معاهم
واتأكد على حفظ حقوقك كاملة
لانه مثلما قلت وانا قلت سابقا مش كل مانتمناه من العربيه بيحصل
وخصوصا لما يكون على السيارة قسط شهرى
ربنا يوفقك وابقى اخبرنى بنتيجة اللقاء
وانا بعتب عليك بسبب قلة مشاركاتك بخصوص متابعه سيارتك
بالتوفيق
اخيك محمد رشوان

المشاركة الأصلية كتبت بواسطة adeldaoud

السلام عليكم
بالنسبه لموضوع تأجير السياره للشركه اللي انا اتكلمت عنها سابقا . بعد تفكير طويل انا وشريكي قررنا عدم تأجير السياره لهم. منعا لبهدلة العربية للأسف نادرا لما تلاقي واحد يحافظ علي عربيتك . وانا عن نفسي بشوف بعيني علي الدائري السواقين بيعملو ايه اهم حاجه عنده انه يجري عشان يحمل قبل التاني مش مشكله بأه العربيه تتكسر تتخبط الموتور يفوت ميهمهوش كل ده . فانا حاليا بشتغل علي العربيه بحمل من الهرم لاكتوبر حيث مكان عملي وبالليل وانا راجع بحمل دائري قوميه وبرجع احمل مريوطيه . بس للأسف علي الوضع ده بدفع القسط بالعافيه وساعات بنكمل القسط من جيوبنا . بس بالنسبه لي كده افضل من اني ادي العربيه لشركه او سواق ويبهدلوها

علشان كده انا بنصح اللى ناوى يشترى انا الدنيا مش وردى
ولازم يفكر كتير وخصوصا اللى بيشترى قسط
انا شاريها قسط وبكمل من مرتبى
ولعلمك احنا بنركب ومخالفين
ومعرضين للمخالفات لا قدر الله
انا عن نفسى عارض سيارتى للبيع
لانى عن جد تغبت نفسيا مغ الركاب
وربنا يوفقنا للخير من السيارة
مع تحياتى
محمج رشوان

المشاركة الأصلية كتبت بواسطة adeldaoud

فعلا احنا مخالفين قانونا احنا مخالفين. انا من اسبوع لولا ان ربنا ستر ومكنش معايا ركاب في العربيه كنت خدت مخالفه في ميدان الحصري في اكتوبر بعد ما نزلت الناس وطالع بلف من قدام مسجد الحصري لقيت لجنه واقفه ومش سايبين حد اللي بيلاقيه محمل يسحب منه الرخص ويقوله وصل الناس اللي معاك وتعالي . اهي تعالي دي فيها 500 جنيه . بس الحمد لله ربنا ستر . اما بالنسبه لموضوع بيع العربيه ده يا استاذي الفاضل انا فكرت فيه ايضا بسبب غلاء البنزين والصيانه ومشاكل الركاب ومشاكل المرور . وفي نفس الوقت العربيه سعرها زاد يعني مش هخسر لو بعتها انا لسه سائل في التوكيل من اسبوع بالظبط قالي سعرها 120000 تكييف وباور واير باج و 2 زجاج كهربا نفس عربيتي بالظبط .فقولت اريح نفسي من ده كله بس للأسف الموضوع بالنسبه لي مختلف شويه علشان معايا شريك في العربيه فبيقولي نصبر شويه العربيه مكملتش 7شهور معانا . ربنا يوفق الجميع للخير وييسر لنا الامور

فى ظل القوانين العفنة فى بلدنا
وفى ظل شراء السيارة بالقسط لتساعد على غلاء المعيشة
لا انصح بشراء سيارة فان بالقسط فى تلك الايام بالذات لانها مش هتجيب همها لسببين
السبب الاول
انت معرض للمخالفة سواء معك ركاب او مع باقى اهلك من الدرجة الثالثة او الرابعة
السبب الثانى
انك فقد سبل الراحه من حيث الكماليات والراحه بركوبك سيارة ميكروباص عفشة نشفة ومعرض لكل من على الطريق يشاور لك فى انه كان بالامكان شراء سيارة افضل من تلك السيارة الفان بمراحل لو انك فكرت قبل الشراء وده اللى بنصح به اغلب الناس
يعنى لو قامت حملة مكبرة فى القاهرة الكبرى على تلك السيارات الفان اغلب الناس هتنضر لان اللى بينفذ القانون اعمى القلب والبصيرة ولا يعلم من اى جاءت تلك السيارة
وكم من الشباب العاطل واللى خارج معاش مبكر واللى مش قادر بواجه الغلاء الفاحش بيعمل على تلك السيارة
ربنا يسترها معاكم ومعايا على سداد باقى اقساطها