سرقة لوجو هيونداي من علي شنطة عربيتي

**zakiali** · 18-11-2008 04:23 AM

ويوم بعد يوم بيزداد كرهي للبلد دي وأنا راكن في منطقة الوراق الملعونه - بحكم شغلي هناك - كنت نازل مستعجل ومغطتش العربية لما نزلت لقيت واحد ربنا ياخده سرق علامه الهيونداي من علي شنطه العربيه في عز الظهر وكاحتها بأله حاده علمت في الشنطه يعني ده معناه ان الناس ولا هاممها أي حد ممكن يعمل اي حاجه في اي حد ولا حد يقوله بتعمل ايه ولا عيب كده .. أنا دمي اتحرق .. عموما انا دورت عليها لفيت كتير في محلات قطع غيار هيونداي وبتوع الاكسسوارات عشان الاقي العلامه الأصليه الكوري المستورده المهم لقيتها اخيرا في التوفيقيه في محل اسمه البنا وده قدام هشام لهيطه اللي في شارع زكي . ونصيحه مني لازم تركن العربيه في جراش سواء جمب البيت او جمب الشغل ولازم تغطي العربيه ولازم تحرص دايما ان الغطا يكون وسخ جدا ومرشوش بنمره العربيه عشان محدش يقعد عليها ويطبقها وميكنش ملفت للنظر . ويارب يطلعنا من البلد دي علي خير .

.

**Nour_Peugeot** · 18-11-2008 04:28 AM

يا راجل دي بلد حسبي الله و نعم الوكيل الناس لو تقدر تاكل بعضها هتاكل

بجد ربنا يستر و ميجيش الوقت الاقي فيه العربيه بدون جنوط و كاوتش

ربنا يعوض عليك

**M.Elsheikh** · 18-11-2008 04:31 AM

ربنا يعوض عليك

**zakiali** · 18-11-2008 04:37 AM

المشاركة الأصلية كتبت بواسطة Mohamed Elsheikh

ربنا يعوض عليك

عموما هي مش بفلوس بس اللي غاظني انها شوهت منظر العربيه وكمان العذاب واللف والدوران وانا اصلا معنديش وقت عشان الاقيها كل ده عشان واحد حاقد حيوان ولا يسوي .

.

**bassem.naguib** · 18-11-2008 10:25 AM

المشاركة الأصلية كتبت بواسطة Nour_Peugeot

يا راجل دي بلد حسبي الله و نعم الوكيل الناس لو تقدر تاكل بعضها هتاكل

بجد ربنا يستر و ميجيش الوقت الاقي فيه العربيه بدون جنوط و كاوتش

ربنا يعوض عليك

أنت بتقول فيها ..حصلت معايا .. كان والدي بيعمل عملية في مستشفى في مصر الجديدة .. المهم قعدت حوالي نص ساعة ساعة إلا ربع بالكتير .. وافتكرت أني نسيت تحاليل وعاوزينها بسرعة .. المهم نزلت جري وركبت العربية .. أجارك الله أكنك ماشي على قضبان سكة حديد .. أنا قلت فيه حاجة في العفشة .. وقلت مش وقته أجيب الحاجة الأول وبعد كده أبقى اشوف فيه ايه .. وأنا ماشي في صلاح سالم وحدة واحدة .. وطالع كوبري الفردوس لاقيت واحد بعربية جنبي عمال يكلكس وأنوار وجاي جنبي وقالي اقف بسرعة العجلة حتطير وبتلق جامد علشان مش مربوطة .. المهم نزلت الكوبري وركنت على جنب لاقيت فعلاً العجلة مربوطة على مسمارين بس من الأربعة وكمان مفكوكين على الأخر وشبة حيخروجوا من مكانهم .

تخيل بقى الموقف لو العجلة طارت وأنا نازل من على الكوبري (حتى لو ماشي بسرعة قليلة) تخيل كم الحوادث اللي كانت حتحصل والعربيات اللي حتخبط في بعضها .. بغض النظر على اللي كان حيحصل ليا .. وحسبي الله ونعم الوكيل .

**DrWaEl** · 18-11-2008 03:32 PM

تحيا مصر ياعم

عظيمه يامصر يارض النعم يامهد الحضارة يامش عارف ايه الكرم

**mzaki** · 19-11-2008 03:26 PM

انا كمان حصلى نفس الموضوع دا, نزلت من البيت النهاردة لقيت حد ربنا يسامحه سارق لوجو هيونداى و كلمة هيونداى و غبور اوتو من على الشنطة , مش هحكيلكوا على الخربشة و التجريح .. حسبى الله و نعم الوكيل

المهم كلمت التوكيل و سألت عليهم قالولى موجودين و الواحدة ب 50 جنية , ان شاء الله هدور عليهم فى الحرفيين النهاردة و أشوف اسعارهم

**zakiali** · 22-11-2008 04:44 AM

المشاركة الأصلية كتبت بواسطة mzaki

انا كمان حصلى نفس الموضوع دا, نزلت من البيت النهاردة لقيت حد ربنا يسامحه سارق لوجو هيونداى و كلمة هيونداى و غبور اوتو من على الشنطة , مش هحكيلكوا على الخربشة و التجريح .. حسبى الله و نعم الوكيل

المهم كلمت التوكيل و سألت عليهم قالولى موجودين و الواحدة ب 50 جنية , ان شاء الله هدور عليهم فى الحرفيين النهاردة و أشوف اسعارهم

روح لمحل اسمه البنا في شارع زكي في التوفيقيه الأصليه بـ 20 جند . ربنا ينتقم من الناس دي .

.