-
حكايتى مع التكييف
السلام عليكم رجالة الاوبل احب اعرفكم حكايتى مع تكييف عربيتي فكترا 97 العربية فبريكة بالكامل والتكييف كان بشحن البلد واناراجع من الشغل ولسة هدخل العربية الجراج سمعت صوت فسسسسسسسس ودخان من تحت الكبوت بسرعة بطلت العربية وفتحت الكبوت وكانت المفاجأة ماسورة الضغط الى طالعه من الكمبروسر اتخرمت وزيت الفريون طار على مواسير الشكمان اتارى كان فيه احتكاك بينها وبين عزل ماسوة البور وطبعا مع حركة المتور والايام والسنين حصل التاكل ده طبعاً دماغى اتشقلب ودمى فار تكيييييييفييييييي حبيييييبييبي دانا مبستغناش عنك تركت العربية تبرد ونزلت بالليل علشان احل شجرة التكييف رفعت العربية وفكيت المصفحة والمسمار 13الى رابط الشجرة بالسربنتينة والمسمار 15الى رابط الشجرة بالكمبروسر والمسمار المشرشر الى رابط الشجرة من عند كوع المياه وتانى يوم لحمت التاكل 50 جنية واشتريت كيلو فريون134وعلبةزيت فريون134 ورجعت البيت وبدأت اقفل الشجرة وضفطت هو فى التكييف لحد 150 وكانت المفاجأة العداد بينزل طيب الحام سلم بدا اكشف بالسفنجة والرغاوى مش قادر اوصل لحاجة لحد ما سمعت صوت تنفيس من خرطوم الشجرة ياة تانى دأنا تعبت فى التقفيل فوك يواد تانى الشجرة طلع خرطوم الضغط مشقق ماشى خلينا فى الجديد مفيش غير صينى عاملة 300اى والله ومحدش شكر فيها وعلشان اشتريها استعمال لازم مشوار سفر روحت ورشة بتشتغل فى كبس وضغط خراطيم الهيدرولك اول ما شاف الشجرة قالى دى بتاع اوبل قلت تمام الله ينور طيب انا عايز اغير الخرطوم دة ماشى يكلفك140جنية لية يا باش مهندس هركبلك خرطوم مقاوم للحراة وتحمل ضغط العالى وعلى مسؤليتى ماشى ركب 10دقائق اتفضل ايه الحلاوة دى وكمان حط علية العزل القديم رجعت قفلت تانى اضغك هو لحد180 تمام التمام وتركت الهواء مضغوط قرابة ثلاثة ساعات كدة تمام فرغت الهواء وفكيت طبة زيت الكمبروسر وزوت الزيت لحد المنسوب المطلوب وعملت فاكيم بمتور ثلاجة عندى انا مجهزة للظروف وبدات اشحن بعد الاستعانة بفديوهات من اليوتيوب والحمد لله تسقيع شديد جداً الفايز بيجيب نقط مياه بتقع على المصفحة خلينا نشوف وانا رايح الشغل ووقت العودة فى شدة الحر تمام طيب كام يوم تانى تمام التمام وكل يوم اقيس ضغط الفريون بالعدادات ثابت // التكلفة لحام المونيوم50جنية تركيب خرطوم الشجرة 140جنية كيلو فريو134 ب52جنيةعلبة زيت فريون143نصف كيلو 50جنية والحمد لله ربنا وفقنى فى هذا العمل وممكن يكون فية فائدة للاعضاء الكرام
-
باشا بامانة الله ينور عليك احلى حاجة انك شغال بايدك فعربيتك بلاش قرف الصنيعية الحرامية اللى مش فاهمين اى حاجة
وعلى فكرة انا عجبتنى اوى طريقة شرحك للموضوع بجد الله ينور
باشا انا معايا استرا 2000 ماتور 1200 سس لسه شاحن التكيف الاسبوع الماضى بس الاداء مش عاجبنى قوى
تفتكر انا ممكن اعمل ايه عشان اخلى التسقيع اعلى من كده
مستنى نصيحتك وشكرا ليك
-
اخى الكريم علشان التكييف يسقع جامد بيعتمد على أكثر من حاجة نوع الفريون احسنهم الامريكى ثم الهندى بعد كدة فريون رزق دا فريون مصرى بس بصراحة ممتاااااااذ ممكن يكون فيه انواع اخري بس دول الى متاكد من ادائهم تانى حاجة ومحدش بياخد بالة منها هى عملية الفاكيم تفريغ الدائرة من الهواء الصناعية بيلخص فى النقطة دى علشان بتاخد وقت وحضرته مشفاضى طيب اية فائدة الفاكيم لما يتعمل صح بيحل محلة نثبة فريون اكتر ولازم الفاكيم يكون 30 تحت الضغط فى العداد الاخضر كمان نظافة السربنتينة الامامية بتاع التكييف نظفها بضغط الهواء مباشرة او فى محطة غسيل بمسدس الماء كل ما تتنظف اكتر هفرق معاك جامد وعن تجربة انا شايف خليك الاول فى نظافة السربنتينة وربنا يوفقك
-
شكرا لاهتمامك طب انا دلوفتى شحنت فريون خلاص تقدر تقولى عشان انضف السربنتينة اعمل اية بالضبط
واى جزء بالتحديد اللى انا هفكة وشكرا ...... مستنى ردك يافندم
وعلى فكرة فى ملحوظة مهمة جدا انا امبارح بالليل كنت مشغل التكييف لاحظت ان درجة التسقيع مختلفة تماما عن وقت الظهر او عند التعرض لاشعة الشمس
-
طب متعرفش حد بيصلح تكيفات اوبل يكون محترم وبيفهم انا برضه التكيف عندى بايظ ومش عارف اروح لمين
-
انا من اسكندرية واللى اعرفة بتاع تكييف وكويس قوى اسمه عماد فى شارع عبد المنعم قبل صلاح الدين
فاهم جدا
-
اخى الاستاذ شادي طالما التكييف بيسقع معاك بعيداً عن الشمس بلاش تيجى عنده بصراحة درجة الحرارة اليومين دول عالية جدا و غير مسبوقة /ثانياً سربنتية التكييف دى فى العربية من الامام ومش هتفوك غير الشبكة ومن خلالها تنظف السربنتينة بالهواء اومسدس المياه بس الى يعمل كده يكون فاهم
-
والله انت تستاهل جائزه انك اشتغلت فى التكييف وصلحته بنفسك رغم قرفه
تكييف الفيكترا قوى
التكييف عندى ليل نهار زي الفل وبيسقع جامد
الازاز بيشبر لما بشغله واوقات بسقع وبطفيه شويه
مشكلته انه غول بنزين وبيأثر على السحب عشان المكنه الصغيره عندى
-
والله انا كتبت قبل ان تكييف الفكترا الى على وضعة ممتاذ ممتاذ التكييف عندى قبل حكاية الشجرة دى وفى عز الحر وكمان انا من الصعيد كنت بشغل التكييف مبين السرعة الاولى والثانية وبعد ما صلحتة نفس الاداء عالى عالى وفى بعض الاوقات بينقط مياه على المصفحة
-
العضو المحترم بجد اوبل 2 شكرا كثيرا لاهتمامك ومعلوماتك وخبرتك
انا فعلا هسيب التكييف كما هو والواحد يحمد ربنا انه شغال وكويس الحمدلله انه مش عامل اى مشاكل فالعربية مش هعمل اى افتكاسات واخربها على نفسى وارجع اندم واقول يارتنى
Content Relevant URLs by
vBSEO 3.6.0 PL2