الموضوع: عاوز اجيب سمك من السويس

لو حضرتك مابتعرفش فى السمك أى شرح هنا هايكون فايدته محدودة , لأن البياع لو معندوش ضمير ممكن يديلك سمكة مش كويسة..ممكن مثلا يديك شعور أو وقار بس تكون بايته عنده و ديه صعب تكتشفها بالوصف من هنا. لو تقدر يكون معاك حد بيفهم فى السمك يكون أفضل و خصوصا انك هاتشترى كميه.
عموما الشعور بيكون من أفضل اسماك البحر ألأحمر و اكترها فى البحر و دايما بتلاقيه فى السوق و فيه منه أنواع كتير , بس اللى هتلاقيه فى السوق الشعور المحسنى و ده بتلاقيه دماغة كبيرة وتحس ان السمكه تخينه شويه و فيه الشعور الحر و ده بتلاقي فيه لون دهبى مع مع لون السمكة و دماغه اصغر من المحسنى. و فيه البونجز و ده سمك الشعور من الحجم الصغير (فى حجم البلطى ) و بيكون جميل جدا فى أكله . مش لازم بكون كل السمك سمك كبير.. يعنى ممكن تجيب سمكتين كبار شعور و وقار تعملهم صوانى أو سنجارى و تجيب الباقى مشكل لو تلاقى من ألأنواع ديه( بونجز- بورى بحر مش مزارع - بربون- سيجان-مرجان ابو أتب-أبو شرارة) و ممكن تجيب شوية سبيط يتعمل مقلى أو طاجن.
أهم حاجة تاخد معاك أيس بوكس كبير و هناك هايجهزولك السمك للسفر بالتلج فى ألأيس بوكس

نورتو الموضوع و اشكر لمهاب الإفادة.. بالنسبة للأسعار..؟